Ku Nyikela Vumbhoni Eka “Vanhu Va Mixaka Hinkwayo”
1 Loko hi hlangana ni vanhu va mindhavuko kumbe va swiyimo swo hambana-hambana swa vukhongeri, hi tsundzuka mhaka ya leswaku ku rhandza ka Yehovha hi leswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Tim. 2:4) Ku tlhandlekela eka nhlayo ya swiphephana ni tibroxara leti lunghiseleriweke, hi ni buku leyinene ngopfu leyi nga tirhisiwaka nkarhi wihi na wihi leswaku hi pfuna vanhu lava vukhongeri bya vona byi nga va dyondzisangiki ntiyiso malunghana ni Xikwembu na Kreste.
2 Buku leyi nge Ku Lavisisa Ka Vanhu Xikwembu yi hi pfuna ku twisisa masungulo ya vukhongeri lebyikulu emisaveni naswona yi nga pfuna swinene eka vanhu hinkwako-nkwako hi ku ringanisa ripfumelo ra vona ni leswi Bibele yi swi dyondzisaka malunghana ni Xikwembu xin’we xa ntiyiso. Loko swi fanerile, u nga ha ringeta swingheniso leswi landzelaka leswaku u kombisa vanhu buku leyi.
3 U nga fambisa buku leyi nge “Ku Lavisisa Ka Vanhu Xikwembu” hi ku vutisa xivutiso, xo tanihi lexi nge:
◼“Xana u ehleketa leswaku Xikwembu xi ma languta njhani mafambiselo ya vukhongeri lama lawulaka timhaka ta misava namuntlha? [Yimela nhlamulo.] Xana a swi ta ku hlamarisa ku tiva leswaku tidyondzo ta xisekelo ta vukhongeri hinkwabyo ta fana ni leswaku ti hambane ngopfu ni tidyondzo ta Bibele?” Loko n’wini wa muti a tiyimisele ku yingisela, n’wi kombise nxaxamelo wa leswi nga endzeni, ivi u hlamusela hi ku komisa leswaku hambiloko munhu a ri wa vukhongeri kumbe e-e, vutomi byakwe bya khumbiwa hi minkucetelo ya matimba ya vukhongeri. Kombisa leswaku a nga vuyeriwa hi ku dyondza xivangelo xa ku lavisisa ka vanhu Xikwembu loku vangeke leswaku ku va ni vukhongeri byo hambana-hambana lebyi hambukiseleke vanhu ekule ni ndlela yo vona vukhongeri bya ntiyiso. Fambisa buku hi munyikelo wa R7,50. U nga si famba, hlaya Yohane 17:3 ivi u vutisa, “Xana hi nga byi kumisa ku yini vutivi lebyi lebyi yisaka evuton’wini lebyi nga heriki?” Endla malunghiselelo lama tiyeke ya ku tlhela u vuya u ta n’wi hlamula.
4 Loko u tlhelela leswaku u ya hlamusela ndlela ya ku nghenisa vutivi lebyi nyikaka vutomi, u nga ha ku:
◼“Ndzi ku tshembise leswaku ndzi ta tlhela ndzi vuya ndzi ta ku kombisa ndlela leyi hi nga nghenisaka ha yona vutivi lebyi yisaka evuton’wini lebyi nga heriki.” Humesa broxara leyi nge Leswi Xi Swi Languteleke, naswona hi ku tirhisa ndzima yo sungula, kombisa ndlela leyi dyondzo yi fambisiwaka ha yona.
5 U nga tlhela u ringeta xiringanyeto lexi:
◼“Tanihi leswi ku nga ni vukhongeri byo tala byo hambana-hambana namuntlha, xana u tshame u tivutisa leswaku hi nga byi kumisa ku yini lebyi amukeriwaka hi Xikwembu?” Endzhaku ko kuma nhlamulo, pfula buku leyi nge Ku Lavisisa Ka Vanhu Xikwembu eka tluka 377. Kandziyisa yinhla ya nomboro 7, ivi u vutisa n’wini wa muti loko a pfumela leswaku vukhongeri bya ntiyiso byi fanele byi hlanganisa vanhu va tinxaka hinkwato. Pfula rin’wana ra matsalwa lama kombisiweke, naswona loko nkarhi wu pfumela, hlamusela tinhla tin’wana leti nga enxaxamelweni wolowo. Fambisa buku. Loko u suka, vutisa xivutiso lexi, “Xana vukhongeri bya ntiyiso byi nga ma khumba njhani mahanyelo ya munhu?” Hlela riendzo ro vuyela leswaku u ta hlamula xivutiso lexi.
6 Loko u tlhelela leswaku u ya hlamusela ndlela leyi vukhongeri bya ntiyiso byi khumbaka vutomi bya munhu ha yona, u nga ha vutisa u ku:
◼“Xana u ehleketa leswaku vukhongeri byi nga ma khumba hi ndlela yihi mahanyelo ya vanhu? [Yimela nhlamulo.] Kreste u hi nyike mpimanyeto lowu vukhongeri byi nga kamberiwaka ha wona.” Hlaya Matewu 7:17-20 leyi nga eka tluka 12 ebukwini leyi nge Ku Lavisisa Ka Vanhu Xikwembu. Kutani kombela n’wini wa muti leswaku a hlaya ndzimana 20 eka matluka 13-14. Loko nkarhi wu pfumela, hlamusela tindzimana 25-9 eka matluka 16-18. Leswi swi nga endla leswaku u sungula dyondzo hi ku tirhisa broxara leyi nge Leswi Xi Swi Languteleke kumbe buku leyi nge Vutivi.
7 Tindlela To Sungula Mabulo: Ku ni swipfuneto swo tala swo dyondza ebukwini leyi nge Ku Lavisisa Ka Vanhu Xikwembu leswi nga ha tirhisiwaka tanihi tindlela to sungula mabulo eka riendzo ro sungula kumbe ro vuyela. U nga sungula bulo hi ku vutisa xivutiso lexi faneleke. Hi xikombiso, xiya swivutiso leswi ni tinhloko-mhaka leti ni matluka lawa ti kumekaka eka wona:
“Swivutiso Leswi Lavaka Nhlamulo” —matluka 17-18.
“Xana Yesu A A Ri Ntsheketo?” —tluka 237.
“I Mani La Tsaleke Bibele?” —tluka 241.
“Qur’ān Ni Bibele” —tluka 285.
“Vumbhoni Bya Ku Tshembeka Ka Bibele” —matluka 340-1.
“Leswi Timbhoni Ta Yehovha Ti Swi Pfumelaka” —matluka 356-7.
“Ndlela Yo Vona Vukhongeri Bya Ntiyiso” —tluka 377.
8 U nga pfula (ma)tluka lama kombisiweke ebukwini leyi nge Ku Lavisisa Ka Vanhu Xikwembu kutani u hlamusela yinhla leyi ku vulavuriwaka ha yona. Kutani hlela riendzo ro vuyela hi ku vutisa xivutiso lexi fambisanaka ni yinhla ya kona lexi nga hlamuriwaka hi broxara leyi nge Leswi Xi Swi Languteleke kumbe hi buku leyi nge Vutivi. Tiyiseka leswaku u rhambela n’wini wa muti eka Nhlangano wa le Rivaleni ni ku n’wi siyela xiphephana xa xirhambo.
9 Mixaka hinkwayo ya vanhu va timbilu letinene yi lavisisa ntiyiso malunghana na Xikwembu na Kreste. Hi nga va pfuna entirhweni wa hina wa ku nyikela vumbhoni. Kutani, a hi hambeteni hi “tirha hi matimba naswona [hi] tikarhata, hikuva hi veke ntshembo wa hina eka Xikwembu lexi hanyaka, lexi nga Muponisi wa vanhu va mixaka hinkwayo.”—1 Tim. 4:10.