Hinkwerhu Ha Laveka Leswaku Ntirho Wu Hela

¹ Mudyondzisiwa un’wana ni un’wana wa Yesu Kreste u fanele a swi twisisa leswaku matshalatshala yakwe ya ku seketela ni ku hlanganyela entirhweni wa ku chumayela hi Mfumo i ya nkoka swinene. Yesu u swi xiyile leswaku vadyondzisiwa vakwe a va ta humesa mihandzu ya Mfumo hi mimpimo yo hambana-hambana. (Mat. 13:23) Hambileswi mpimo lowukulu wa ntirho wa ku chumayela wu endliwaka hi maphayona yo tala lama tirhaka hi matimba, hinkwavo lava hambetaka va dzunisa Xikwembu hi ku hiseka, lava humesaka mihandzu yo tala hilaha swi kotekaka hakona va faneriwa hi ku bumabumeriwa.—Yoh. 15:8.

² Rintiho Rin’we A Ri Nusi Hove: Yesu u vhumbe leswaku matshalatshala lama hlanganeke ya vadyondzisiwa vakwe ma ta humesa mihandzu yo tala ku tlula ya yena. (Yoh. 14:12) Hambiloko swiyimo swa hina swi nga hi pfumeleli ngopfu ku endla swo tala kumbe swi hi pfumelela ku heta nkarhi wo tala eku chumayeleni hi Mfumo, hinkwerhu ka hina ha laveka leswaku ntirho wu hela. Pawulo u vule kahle loko a te: “Miri hinkwawo, hi ku hlanganisiwa swin’we hi vun’we ni ku endliwa leswaku wu tirhisana hi mahlangano hinkwawo lama nyikaka leswi lavekaka, hi ku ya hi matirhelo ya xirho xin’wana ni xin’wana hi mpimo lowu faneleke, wu endla leswaku miri wu kula.”—Efe. 4:16.

³ Van’wana va nga ha vona onge matshalatshala ya vona a ma pfuni nchumu nikatsongo. Hambiswiritano, nchumu wa nkoka emahlweni ya Yehovha hiloko hi endla ntirho wa hina hi mbilu hinkwayo. Xin’wana ni xin’wana lexi hi n’wi endlelaka xona i xa nkoka naswona xa tlangeriwa.—Ringanisa Luka 21:1-4.

⁴ Hambetani Mi Seketela Ntirho: Hinkwerhu ka hina hi ni lunghelo ro nyikela hi swilo leswi vonakaka entirhweni wa misava hinkwayo. Van’wana va nga tlhela va pfuneta hi ntirho wo tika wa mavoko lowu katsekaka eku seketeleni ka ntirho wa Mfumo. Un’wana ni un’wana a nga tikarhatela ku nyikela nhlamulo leyi lunghiseleriweke kahle eminhlanganweni ni ku hlanganyela eXikolweni xa Vutirheli bya le Tilweni. Hi ku tinyika nkarhi wa ku khutaza van’wana, hi hoxa xandla hi ndlela ya nkoka eka vumoya bya vandlha, naswona leswi swi antswisa vuswikoti bya rona byo hetisisa ntirho lowu ri byarhisiweke wona.

⁵ Ina, hinkwerhu ha laveka leswaku ntirho wu ta hela. Ku hava la faneleke a titwa onge a nga laveki. Matshalatshala ya hina lama hlanganeke, lamakulu ni lamatsongo loko hi tirhela Yehovha ma hi kombisa hi ri vagandzeri va ntiyiso va Xikwembu. (Mal. 3:18) Un’wana ni un’wana wa hina a nga endla ntirho wa risima wo dzunisa Yehovha ni le ku pfuneni ka van’wana leswaku va n’wi tiva ni ku n’wi tirhela.