Ku Tinyiketela Ka Hina Hi Rirhandzu eNtirhweni Wun’wana Ni Wun’wana Lowunene
1 Buku yin’wana ya misava yi vulavule hi Timbhoni ta Yehovha yi ku: “A swi olovi ku kuma swirho swa ntlawa wihi na wihi lowu tirhaka hi matimba evukhongerini bya wona ku fana ni Timbhoni.” Ha yini Timbhoni ta Yehovha ti tirha hi matimba swonghasi ni hi moya wo tano wo tinyiketa?
2 Xivangelo xin’wana hi leswaku va ngheniwe hi moya wo tirha hi xihatla. Yesu u xiye leswaku a a ri ni nkarhi wutsongo lowu a fanele ku heta ntirho wa yena emisaveni ha wona. (Yoh. 9:4) Leswi N’wana wa Xikwembu la kwetsimisiweke a fumaka exikarhi ka valala vakwe namuntlha, vanhu va Yehovha va swi xiya leswaku va ni nkarhi wutsongo wo endla ntirho wa vona. Hikwalaho, va hambeta va tinyiketela hi ku tirhandzela entirhweni lowu wo kwetsima. (Ps. 110:1-3) Tanihi leswi ku lavekaka vatirhi vo tala entshovelweni, matshalatshala ya vona a ma nge vi ya hava. (Mt. 9:37, 38) Hikwalaho, va tikarhatela ku tekelela Yesu, loyi a vekeke xikombiso lexinene xa ku tirhandzela ni ku gingirika entirhweni wa yena.—Yoh. 5:17.
3 Xivangelo xin’wana lexi endlaka Timbhoni ta Yehovha ti tirhela Yehovha hi moya-xiviri hinkwawo hi leswaku nhlengeletano ya tona ya misava hinkwayo yi hambane ni mintlawa leyin’wana hinkwayo. Tinhlengeletano ta misava ta vukhongeri hi ntolovelo ti lava nkarhi ni matshalatshala lamatsongo eka valandzeri va tona. Leswi va swi pfumelaka a swi byi khumbi ngopfu vutomi bya vona bya siku na siku, ku tirhisana ni van’wana, kumbe leswi va swi rhangisaka evuton’wini. Hi ku pfumala nsusumeto wa matimba wa ripfumelo ra ntiyiso, va sindzise varisi va vona leswaku va ‘va byela swilo leswi tsakisaka,’ va va tiyisekisa leswaku matshalatshala ya vona yo hetisa nawu ma ringene. (Esa. 30:10) Vafundhisi va vona va endle leswi va swi tsakelaka hi ku ‘hlohlonyisa tindleve ta vona,’ va nghenisa moya wa ku pfumala ku tsakela ni vulolo bya moya.—2 Tim. 4:3.
4 Vona ku hambana lokonghasi eka vanhu va Yehovha! Nchumu wun’wana ni wun’wana lowu fambisanaka ni vugandzeri bya hina wu katsa matshalatshala, ku tinyiketa ni ku tirha. Siku rin’wana ni rin’wana ni le ka swilo hinkwaswo leswi hi swi endlaka, hi kombisa leswi hi swi pfumelaka. Hambi leswi ntiyiso wu hi tiselaka ntsako lowukulu, wu lava ‘hi lwa hi matimba’ leswaku hi ta hetisisa leswi lavekaka. (Ringanisa 1 Vatesalonika 2:2.) Ku khathalela vutihlamuleri bya siku na siku ntsena swi endla vanhu va tshama va khomekile. Hambi swi ri tano, a hi byi pfumeleli vutihlamuleri lebyi leswaku byi hi sivela ku rhangisa swilaveko swa Mfumo ku sungula.—Mt. 6:33.
5 Leswi hi nyikiweke ku swi endla entirhweni wa Yehovha swa vuyerisa swinene naswona i swa xihatla lerova hi susumeteleka ku ‘xava’ nkarhi eka swilo leswin’wana leswi hi swi hlongorisaka ivi hi wu tirhisa hi xitalo etimhakeni ta moya. (Ef. 5:16) Hi ku tiva leswaku ku tinyiketela ka hina eka Xikwembu ni moya wa ku tirhandzela swi tsakisa Yehovha, hi ni nsusumeto lowukulu wo hambeta ni ntirho wa hina hi matimba. Hikwalaho ka mikateko leyi fuweke leyi hi yi kumaka sweswi ni ku langutela vutomi lebyi nga heriki lebyi taka, hi tiyimisele ku hambeta hi “tirha swinene ni ku tikarhatela swona leswi” malunghana ni swilaveko swa Mfumo.—1 Tim. 4:10.
6 Ku Tinyiketela Ni Moya Wa Ku Tikarhata: Vanhu vo tala namuntlha va rhangisa swilaveko swa nyama ni swilo leswi va swi tsakelaka emahlweni ka hinkwaswo. A va voni xihoxo nikatsongo hi ku tikarhatela ngopfu swilo leswi va nga ta swi dya, leswi va nga ta swi nwa kumbe ku swi ambala. (Mt. 6:31) Leswi va nga enerisiwiki hi swilaveko swa vutomi, va susumetiwa hi pakani yo tsakela vutomi lebyinene hi xitalo sweswi ni ku va ni ‘swilo leswo tala leswi hlengeletiweke malembe layo tala, leswaku va ta wisa, va dya, va nwa, va tsaka.’ (Lk. 12:19) Munhu la nghenaka kereke u vona onge matshalatshala wahi na wahi ya munhu hi xiyexe lama laviwaka hi vukhongeri bya yena ma lwisana ni timfanelo takwe. Mhaka ya ku fularhela kumbe hambi ku ri ku tshika ku hlongorisa swilo swo karhi leswi vonakaka kumbe ku hambana ni swilo leswi munhu a swi tsakelaka a yi amukeleki. Leswi a tiehleketelelaka swa yena ntsena, ku hlakulela moya wa ku tikarhata a swi twali, a swi endleki.
7 Mhaka leyi hi yi languta hi laha ku hambaneke. Rito ra Xikwembu ri tlakuse ku anakanya ka hina leswaku hi ehleketa hi mianakanyo ya Xikwembu ku nga ri ya vanhu. (Esa. 55:8, 9) Hi ni tipakani evuton’wini leti tlulaka ku hlongorisa swilo swa nyama. Ku lweriwa ka vuhosi bya Yehovha ni ku hlawulekisiwa ka vito ra yena i timhaka ta nkoka swinene evuakweni hinkwabyo. Mpimo wa timhaka leti i wukulu swinene lerova, hi xiringaniso matiko hinkwawo ma hundzuka “šilo ša hav̌a e mahlweni ka yena.” (Esa. 40:17) Matshalatshala wahi na wahi yo hanya hi ndlela leyi honisaka ku rhandza ka Xikwembu ma fanele ku langutiwa tanihi vuhunguki.—1 Kor. 3:19.
8 Hikwalaho hambi loko swilo swin’wana leswi vonakaka swi laveka naswona swi ri swa nkoka eku hambeteni ni mintirho ya hina ya Mfumo, ha swi tiva leswaku leswi a hi ‘swilo swa nkoka’ hakunene. (Flp. 1:10) Hi pfumelelana ni leswi vuriweke eka 1 Timotiya 6:8 loko hi ringanisa ku hlongorisa ka hina swilaveko swa nyama ivi hi tikarhatela ku hlayisa timbilu ta hina ti ri eka ‘swilo leswi nga voniwiki leswi nga swa nkarhi hinkwawo.’—2 Kor. 4:18.
9 Loko hi ehleketa swinene hi mianakanyo ya Xikwembu, ku vilela loku hi nga na kona hi swilo leswi vonakaka ku ya ku hela. Loko hi anakanyisisa hi leswi Yehovha ana se a hi endleleke swona ni mikateko leyi hlamarisaka leyi a yi tshembiseke ya nkarhi lowu taka, hi ta tiyimisela ku endla gandzelo rihi na rihi leri a hi kombelaka rona. (Mar. 10:29, 30) Hi n’wi kolota vutomi bya hina. Loko a ku nga ri hi musa ni rirhandzu ra yena, a hi nga ta tiphina hi vutomi bya sweswi ni bya nkarhi lowu taka. Hi titwa hi boheka ku tinyikela, tanihi leswi swilo hinkwaswo leswi hi swi endlaka entirhweni wa yena ku nga ‘leswi hi faneleke ku swi endla.’ (Lk. 17:10, xiitaliki i xerhu.) Xin’wana ni xin’wana lexi hi komberiwaka ku xi nyika Yehovha, hi xi endla hi ntsako, hi ku tiva leswaku hi ta “tshovela swo tala.”—2 Kor. 9:6, 7.
10 Ku Laveka Vatirhi Va Ku Tirhandzela Sweswi: Ku sukela emasungulweni ya rona, vandlha ra Vukreste ri nghene enkarhini wa ntirho lowukulu. Vumbhoni bya matimba a byi fanele ku nyikeriwa eYerusalema wu nga si wisiwa hi 70 C.E. Hi nkarhi wolowo vadyondzisiwa va Yesu a va ‘tinyiketele ku dyondzisa rito.’ (Mint. 18:5) Ku andza ka xihatla ku endle leswaku swi fanela ku letela vaevhangeli lava engetelekeke ni varisi lava nga ni vutshila ni ku kuma mpfuno wa vona. Vavanuna lava nga ni ntokoto malunghana ni timhaka ta vulawuri bya tiko kun’we ni lava nga ni vuswikoti byo langutela nhlengo ni ku aviwa ka swilo leswi vonakaka a va laveka. (Mint. 6:1-6; Ef. 4:11) Hambi leswi va nga ri vangani a va tirha eswiyin’weni swa le henhla, vo tala a va nga vonaki ngopfu. Kambe hinkwavo ka vona va ‘tinyiketela hi matimba,’ va tirha swin’we hi mbilu hinkwayo leswaku ntirho wu endliwa.—Lk. 13:24.
11 Hambi leswi a ku ri ni xilaveko xitsongo xa ntirho wa matimba eka xiringaniso xa misava hinkwayo eka malembe-xidzana yo tala lama landzeleke, ku pfuxetiwa lokukulu ka ntirho wa Mfumo ku sungule loko Yesu a nghene ematimbeni ya Mfumo wa yena hi 1914. Eku sunguleni, a hi vangani lava a va xiya leswaku xilaveko xa vatirhi va swilaveko swa Mfumo xi ta va lexikulu swinene, xi lava mpfuno wa timiliyoni leti tirhandzelaka ematikweni ya misava hinkwayo.
12 Namuntlha nhlengeletano yi katseke ngopfu eka mintirho yo tala yo hambana-hambana leyi lavaka rifuwo-pfuneta ra hina hi laha hi nga kotaka ha kona. Ntirho wa Mfumo wu ya emahlweni hi mpimo lowukulu. Rivilo ra minkarhi ya hina ri hi susumetela ku tinyiketa ni ku tirhisa rifuwo rin’wana ni rin’wana leri hi nga rona leswaku hi hetisisa ntirho lowu nga kona. Leswi ku hela ka fambiselo hinkwaro lero biha ku nga ekusuhi, hi langutele ntirho lowukulu swinene emasikwini lama taka. Nandza un’wana ni un’wana wa Yehovha la tinyiketeleke u komberiwa ku tinyiketela hi ku tirhandzela entirhweni wa xihatla wa ku hlengeleta.
13 I Yini Leswi Faneleke Ku Endliwa? Entiyisweni hi nga vula leswaku ku ni ‘swo tala swo swi endla entirhweni wa Hosi.’ (1 Kor. 15:58) Emasin’wini yo tala ntshovelo wu vupfile, kambe vatirhi a va talanga. Hi rhamberiwa ku endla xiphemu xa hina ku nga ri eku nyikeleni ka vumbhoni hi ku hetiseka ensin’wini hinkwayo ya hina ntsena kambe ni ku hlangavetana ni mphikamakaneta ya ku tirha laha xilaveko xi nga xikulu kona.
14 Swa tsakisa ku vona ndlela leyi Timbhoni eswiphen’wini hinkwaswo swa misava ti tinyikelaka hi ku tirhandzela ha yona emintirhweni hinkwayo. Leswi swi nga ha katsa ku pfuneta eku akiweni ka tindhawu ta vugandzeri, ku tirha emintsombanweni ni ku pfuneta hi mintirho ya swilo swo phalala eminkarhini ya timhangu eku basiseni ka Holo ya Mfumo ya vandlha nkarhi na nkarhi. Malunghana ni ntirho lowu hlamuseriweke laha, ku ni mhaka ya ku tiyiseka leswaku Holo ya Mfumo yi siyiwa yi basile naswona yi ri exiyin’weni lexinene endzhaku ka nhlangano wun’wana ni wun’wana. Ku hetisisa mintirho leyi nga ha tikombaka yi nga nyawuli swi kombisa ku twisisa lokunene ka marito ya Yesu lama nga eka Luka 16:10 lama nge: “Loyi a tshembekeke eka leswitsongo, ni ka leswikulu ú ta tshembeka; loyi a nga tshembekangiki eka leswitsongo, ni ka leswikulu a nga ka a nga tshembeki.”
◼ Ku Seketela Mintirho Ya Vandlha: Hambi leswi vandlha rin’wana ni rin’wana ri tirhaka tanihi xiphemu xa nhlengeletano hinkwayo ni ku amukela nkongomiso lowu humaka eka “nandza la tshembekaka, wo tlhariha,” ri vumbiwe hi vahuweleri vo hambana-hambana va Mfumo. (Mt. 24:45) Ku hetisisiwa ka wona ku titshege swinene hi ndlela leyi Mbhoni yin’wana ni yin’wana yi lavaka ni ku kota ku swi endla. Vandlha ri langutane ni ku chumayeriwa ka mahungu lamanene ensin’wini ya rona, ku endla vadyondzisiwa lavantshwa ni ku va tiyisa emoyeni. Un’wana ni un’wana wa hina a nga hoxa xandla entirhweni lowu. Nakambe hi nga tivekela tipakani edyondzweni ya munhu hi xiyexe, ku hlanganyela hi xikongomelo eminhlanganweni, ni ku pfuna lava pfumalaka evandlheni. Mintirho leyi yi hi nyika malunghelo yo tala lamanene yo kombisa ku tinyiketela ka hina.
◼ Ku Rhangela eXikhundleni Xa Vulanguteri: Yehovha u byarhise vakulu lava hlawuriweke ntirho wo langutela vandlha rin’wana ni rin’wana leri va nga eka rona. (Mint. 20:28) Lava i vavanuna lava fanelekaka ku kuma lunghelo leri. (1 Tim. 3:1) Entiyisweni makwerhu un’wana ni un’wana wa xinuna evandlheni u ni timfanelo leti n’wi endlaka a fanelekela vutihlamuleri lebyikulu. Vamakwerhu vo tala va endla nhluvuko emoyeni naswona va fanele ku hambeta va kula ehansi ka vukongomisi ni mpfuno wa rirhandzu wa vakulu va vandlha. Vavanuna lava va fanele ku va swichudeni leswi gingiritekaka swa Bibele ni tibuku ta hina. Va nga kombisa ku tinyiketela ka vona hi ku titsongahata eka vakulu lava hlawuriweke hi moya, va tekelela ripfumelo ra vona ni ku hlakulela timfanelo leti languteriweke eka valanguteri.—Hev. 13:7, 17.
◼ Ku Nghenela Ntirho Wa Nkarhi Hinkwawo: Ngopfu-ngopfu vandlha ri tirha ku chumayela mahungu lamanene. (Mt. 24:14) Mawaku nkateko lowu vaka kona loko van’wana lava gingiritekaka va tiyisa matshalatshala ya vona hi ku tsarisa tanihi maphayona! Hi ntolovelo leswi swi katsa ku endla mindzulamiso evuton’wini bya vona vini. Mindzulamiso yin’wana yi nga ha laveka eka vona leswaku va hambeta ni xiyimo xa ntirho lowu wo hlawuleka. Kambe lava tiyiselaka eka lunghelo leri ematshan’weni yo lan’wa endzhaku ka lembe kumbe ku tlula hikwalaho ka ku hetiwa matimba ka xinkarhana va tiyiseka leswaku va ta kuma mikateko ya Yehovha leyi fuweke. Vakulu lava nga ni rirhandzu ni van’wana lava vupfeke va nga hoxa xandla eka ku humelela ka maphayona, va va khutaza hi marito ni swiendlo. Mawaku moya lowunene lowu kombisiwaka hi vantshwa lava nghenelaka ntirho wa vuphayona xikan’we-kan’we endzhaku ka loko va hete xikolo! Leswi swi tano na hi lavakulu lava tsarisaka tanihi maphayona ya nkarhi hinkwawo endzhaku ka loko va nga ha ri na vutihlamuleri bya ku tihanyisa. Mawaku ku eneriseka loku vaka kona eka Mukreste la tinyiketeleke loko a tirhisana ni ku hatlisisa ka Yehovha ka ntirho wo hlengeleta!—Esa. 60:22.
◼ Ku Hlanganyela Eku Akiweni Ni Le Ku Lunghisiweni Ka Tindhawu Ta Minhlangano: Hi ku kongoma ku akiwe madzana ya Tiholo ta Mfumo ta manguva lawa kun’we ni Tiholo to tala ta Tinhlengeletano. Lexi hlamarisaka, ku lava ku va ntirho hinkwawo wu endliwe hi vamakwerhu va xinuna ni va xisati lava nyikeleke nkarhi ni vutshila bya vona. (1 Tikr. 28:21) Magidi ya vatirhi lava tinyiketeleke va hlayisa miako leyi hi ku endla ntirho wihi na wihi lowu nga ha lavekaka. (2 Tikr. 34:8) Tanihi leswi ntirho lowu ku nga xiphemu xa ntirho wo kwetsima, lava pfunetaka va tinyiketela hi ku swi rhandza, a va kombeli ku riheriwa eka ntirho wa vona emhakeni leyi, tanihi leswi va nga ta ka va nga komberiwi ku hakeriwa eku chumayeleni hi yindlu na yindlu, ku nyikela tinkulumo evandlheni kumbe ku pfuneta entirhweni wa le nhlengeletanweni kumbe entsombanweni. Vatirhi lava va ku tirhandzela va endla mintirho ya vona mahala eku kunguhateni ni le ku akiweni ka tindhawu ta ku gandzela leti dzunisaka Yehovha. Hi ku hiseka va pfuneta hi ku tsala-tsala maphepha ya nawu, ku hlayisa tirhekhodo ta timali, ku endla mintwanano ya ku xaviselana ni ku hlayela ntsengo wa nhundzu leyi lavekaka. Malandza lawa yo tshembeka ya Yehovha a ma engeteli mali ya le tlhelo kumbe hi ndlela yo karhi ma lava ku vuyeriwa hi swilo leswi vonakaka hi ku kongoma kumbe hi ndlela leyi nga kongomangiki eka mintirho leyi ma yi endlaka, tanihi leswi tinyiko ni rifuwo ra vona swi nyiketeriweke eka Yehovha. (Vona Vutirheli Bya Hina Bya Mfumo bya February 1992, tluka 3, ndzimana 10.) Ntirho lowu wu lava vatirhi lava gingiritekaka lava endlaka mintirho ya vona ‘hi moya-xiviri hinkwawo eka Yehovha.’—Kol. 3:23.
15 Hikwalaho, i yini lexi endlaka leswaku ku tinyiketela ka vanhu va Yehovha ku va loku hlawulekeke? I moya wa ku nyika. Ku nyika ka vona ka ku hanana a hi ka mali ni swilo leswi vonakaka ntsena—va ‘tinyiketela hi ku tirhandzela.’ (Ps. 110:3, xiitaliki i xerhu.) Lowu i muxaka wa ku tinyiketela ka hina eka Yehovha. Hi hakeriwa hi ndlela leyi hlawulekeke. Hi kuma ‘ntsako lowukulu’ naswona hi “tshovela swo tala” hikuva leswi hi swi endlaka swa tlangeriwa hi van’wana, lava na vona va hi nyikaka. (Mint. 20:35; 2 Kor. 9:6; Lk. 6:38) Muhakeri wa hina lonkulu i Tata wa hina la nge matilweni, Yehovha, loyi a “rhandza[ka] loyi a nyikaka a tsakile.” (2 Kor. 9:7) U ta hi hakela swinene, hi mikateko leyi nga heriki. (Mal. 3:10; Rhom. 6:23) Kutani loko u kuma malunghelo entirhweni wa Yehovha, xana u ta tinyiketela hi ku tirhandzela ni ku hlamula hi laha Esaya a endleke ha kona loko a te: “Hi mina loyi, nḍi rume”?—Esa. 6:8.