Ku Tinyikela Hi Ku Swi Rhandza
1 Mupisalema Davhida u profete leswaku vanhu va Yehovha “va ta tinyikela hi ku swi rhandza”; leswi vulaka leswaku va ta va “vatirhi va ku tirhandzela lava hisekaka.” (Ps. 110:3, nhlamuselo ya le hansi eka NW) Leswi swa humelela hakunene exikarhi ka vumakwerhu bya hina bya misava hinkwayo. Eka rin’wana ni rin’wana ra malembe ya mune ya ntirho lama hundzeke, vanhu va Yehovha va nyikele tiawara to tlula gidi ra timiliyoni eku hangalaseni ka mahungu lamanene ya Mfumo. Naswona ku ni tindlela to tala, ku engetela eka ntirho wo chumayela ni ku endla vadyondzisiwa, laha hi nga tinyikelaka hi ku swi rhandza leswaku hi pfuna van’wana.
2 Tindlela Leti Hi Nga Kombisaka Ku Swi Rhandza Ka Hina Ha Tona: Van’wana evandlheni va nga ha lava ku pfuniwa ku ya eminhlanganweni. Swi nga va njhani loko wo tihlawulela ku famba na vona? Van’wana va nga ha va va vabya, va nga swi koti ku famba kumbe va ri exibedlhele. Xana u nga va wo rhanga ku va endzela kumbe ku va pfuna hi ndlela yin’wana? Ku nga ha va ni munhu kumbe ndyangu lowu lavaka xikhutazo. Xana u tshame u anakanyisisa hi ku rhamba vanhu vo tano edyondzweni ya ndyangu wa wena minkarhi yin’wana? Phayona kumbe muhuweleri va nga ha lava wo famba na yena evutirhelini. Swi nga va njhani loko wo tinyikela ku tirha na vona ensin’wini? Leti hi tin’wana ta tindlela leti hi nga tinyikelaka ku endlela vapfumeri-kulorhi leswinene ha tona.—Gal. 6:10.
3 Vamakwerhu va xinuna va nga kombisa ku tiyimisela ka vona ku tirhisiwa enhlengeletanweni ya Yehovha hi ku tikarhatela ku fikelela timfanelo ta ku va vakulu ni malandza ya vutirheli. (1 Tim. 3:2-10, 12, 13; Tito 1:5-9) Tanihi leswi hi hambetaka hi kula hi nhlayo, ku laveka vamakwerhu va xinuna lava fanelekaka lava tiyimiseleke ku rhangela eku chumayeleni ni le ku dyondziseni ni le ku riseni ka mavandlha.—1 Tim. 3:1.
4 Kumbexana van’wana va hina va nga tiendla va kumeka entirhweni wa Yehovha hi xitalo hi ku tsarisela vuphayona bya nkarhinyana minkarhi yin’wana. Nakambe, hi ku endla mindzulamiso leyi faneleke eka xiyimiso xa hina, hi nga swi kota ku endla tano nkarhi na nkarhi kumbe hambi ku ri ku nghenela ntirho wa vuphayona bya nkarhi hinkwawo. Xana swiyimo swa hina swi nga hi pfumelela ku rhurhela endhawini leyi ku nga ni xilaveko lexikulu leswaku hi ya pfuneta kona? Xana hi nga tiendla hi kumeka leswaku hi ya tirha eBethele ivi xisweswo hi hoxa xandla hi ku kongoma eku yiseni ka ntirho wa misava hinkwayo emahlweni? Nakambe ku ni swo tala leswa ha endliwaka eku akiweni ka Tiholo ta Mfumo, Tiholo ta Tinhlengeletano ni miako ya marhavi emisaveni hinkwayo, laha vatirhi vo tirhandzela va lavekaka swinene. Lava tinyikeleke emintirhweni leyi leyinene va nkhensiwa swinene, naswona va katekisiwile swinene!—Lk. 6:38.
5 Leyi i minkarhi leyi nyanyulaka. Yehovha, hi ku tirhisa moya wakwe, u endla ntirho lowukulu emisaveni hi ku tirhisa vanhu vakwe lava swi rhandzaka! Loko Yehovha hi ku tirhisa nhlengeletano yakwe, a humesa xirhambo xo hlanganyela entirhweni wa Mfumo lowu yaka emahlweni, hi endla kahle loko hi tivutisa leswaku, ‘Xana ndza ha tinyiketele hi ku swi rhandza?’ Kutani hi fanele hi kambisisa timbilu ni swiyimo swa hina hi vuenti. Ku tinyiketela ka hina eka Xikwembu ku ta hi susumetela ku endla leswi hi nga swi kotaka entirhweni lowu wo kwetsima, xisweswo hi endla mbilu ya Yehovha yi tsaka swinene!—Sof. 3:17.