I Mani La Nga Ta Yingisela Rungula Ra Hina?

¹ Vanhu va kuma marungula hi xitalo ku tlula rini na rini ematin’wini ya munhu, lawa yo tala ya wona ma nga riki ya nkoka naswona ma hambukisaka. Hikwalaho ka sweswo, vo tala va titwa va tikeriwa, naswona swa hi nonon’hwela ku va pfuna leswaku va yingisela rungula ra Mfumo wa Xikwembu. A va swi voni leswaku ku yingisela ka vona Rito ra Xikwembu ku nga va ni vuyelo lebyinene eka vona vini.—Lk. 11:28.

² Ha tsaka leswi eswiphen’wini swo tala swa misava ku nga ni magidi-gidi ya vanhu lava yingiselaka rungula ra hina, naswona va amukelaka nyiko ya hina ya tidyondzo ta le kaya ta Bibele. Hambiswiritano, etindhawini tin’wana n’wangulo wa vona a wu tivikani. Maendzo yo tala lawa hi ma endlaka evutirhelini a ma na vuyelo lebyinene, hikwalaho hi nga ha tivutisa loko hi ta kuma la nga ta yingisela rungula ra hina.

³ Hi fanele hi tivonela leswaku hi nga hetiwi matimba. Pawulo u hlamuserile: “‘Un’wana ni un’wana la khongelaka vito ra Hosi, ú ta ponisiwa.’ Kambe va ta khongerisa ku yini eka loyi . . . va nga twangiki ta yena ke? Va ta ti twisa ku yini, loko va nga ri na mudyondzisi xana? . . . Hilaha ku tsariweke hakona va ku: ‘A hi ku tsakisa ku vona lava taka, va tisa Mahungu Lamanene!’” (Rhom. 10:13-15) Loko hi byala mbewu ya Mfumo hi ku hiseka, Xikwembu xi ta yi mirisa eka lava nga ni timbilu letinene.—1 Kor. 3:6.

⁴ Xilotlelo I Ku Endla Maendzo Yo Vuyela Ya Nkarhi Na Nkarhi: Etindhawini leti ku nga ni vanhu vatsongo lava yingiselaka rungula ra hina, hi fanele hi yisa nyingiso eku landzeleni ka ku tsakela kwihi na kwihi loku hi ku kumaka, hambi hi fambise buku kumbe e-e. Ha yini u hatlisela ku vula leswaku a ku nge vi na mihandzu? Loko hi byala mbewu, a hi tivi lomu yi nga ta mila kona. (Ekl. 11:6) Loko hi tlhelela hi ri karhi hi lunghekele ku va byela swin’wana leswi humaka eMatsalweni, hambiloko swi nga talanga, hi nga swi kota ku fikelela mbilu ya munhu. Hi nga siya xiphephana kumbe hi fambisa magazini wa sweswinyana. Eku heteleleni, hi nga kota ku kombisa nkoka wa dyondzo ya Bibele. Swi ta hi hlamarisa ngopfu ku vona ndlela leyi Yehovha a katekisaka matshalatshala ya hina ha yona.—Ps. 126:5, 6.

⁵ Wansati un’wana loyi a a nga tsakeli ngopfu u siyeriwe xiphephana. A nga kumekanga ekaya kukondza ku hela tin’hweti timbirhi, laha eku heteleleni a nga kumeka kambe a nga ri na nkarhi wo vulavula. U tlhele a siyeriwa xiphephana lexi fanaka. Ku nga khathariseki matshalatshala ya muhuweleri yo n’wi endzela ekaya, ku tlhele ku hela tin’hweti tin’wana tinharhu a nga kumeki, kutani eku heteleleni u kume leswaku a vabya. Makwerhu wa xisati u n’wi endzerile nakambe evhikini leri tlhandlameke, ivi ku landzela bulo ro koma ra leri nga exiphephanini. Loko makwerhu wa xisati a tlhelela evhikini leri tlhandlameke, wansati loyi u kombise ku tsakela ka xiviri eka rungula ra Mfumo. Ku hundzuka ka swiyimo evuton’wini byakwe ku n’wi endle leswaku a xiya ku pfumala kakwe emoyeni. Ku sunguriwe dyondzo ya Bibele, naswona endzhaku ka sweswo u dyondze vhiki rin’wana ni rin’wana hi ku hiseka.

⁶ Tanihi nchumu wun’wana ni wun’wana lowu hi tsakelaka ku wu vona wu kula, ku nga ha va swiluva, matsavu, kumbe ku tsakela eka rungula ra Mfumo, ku hlakula swa laveka. Sweswo swi teka nkarhi, matshalatshala, langutelo ro khathalela ni ku tiyimisela ku nga lan’wi. N’wexemu, vanhu vo tlula nharhu xa miliyoni lava mbewu ya Mfumo yi dzimeke timitsu eka vona va khuvuriwile! Loko hi hambeta hi chumayela, hi nga va ni ntshembo wo kuma vo tala swinene lava nga ta yingisela rungula ra hina.—Ringanisa Vagalatiya 6:9.