Hi Ni Xitirho Lexintshwa Xa Ku Sungula Tidyondzo!
1 Wansati un’wana wa le Amerika a a ri Murhoma Khatoliki la tinyiketeleke. A a nga lavi no twa nchumu hi ku hlaseriwa ka tidyondzo ta kereke ya yena. A a hamba a ya ni le Yindlu-nkulu ya Vupapa. Hambiswiritano, loko a endzeriwe hi Mbhoni ya Yehovha, u pfumele ku dyondzeriwa Bibele. Ha yini? Hikuva a a lava ku dyondza leswi Bibele yi swi vulaka kambe ekerekeni ya yena a va nga ri na yona dyondzo ya Bibele. Ntokoto lowu wu hi dyondzisa yini? Wu hi dyondzisa leswaku a hi va tivi vanhu lava va nga amukelaka dyondzo ya mahala ya Bibele.—Ekl. 11:6.
2 Xana swi tshama swi ku kanakanisa ku byela vanhu leswaku hi tiyimiserile ku dyondza Bibele ni un’wana ni un’wana la swi tsakelaka? Xana vanhu hinkwavo va muganga wa ka n’wina va swi tiva leswaku hi ni lunghiselelo leri ra mahala? Hi nga tiyiseka njhani leswaku va swi tiva? Hi ku tirhisa xitirho lexintshwa! I xiphephana lexi kokaka mahlo, xa matluka ya tsevu lexi nge, Xana U Lava Ku Tiva Swo Tala Hi Bibele? A hi tolovelaneni ni xihlokwana xin’wana ni xin’wana xa xiphephana lexi:
3 “Ha Yini U Hlaya Bibele?” Swivangelo leswi xiphephana lexi xi swi nyikaka swa tsakisa swinene. Xi hlamusela leswaku Bibele yi tamele “nkongomiso wa rirhandzu lowu humaka eka Xikwembu,” xi kombisa ndlela leyi ha yona ku nga komberiwaka mpfuno eka xona hi xikhongelo, ni yo kuma nyiko leyi humaka eka xona ya vutomi lebyi nga heriki. (1 Tes. 2:13) Xiphephana lexi xi vulavula hi ‘mintiyiso yo hambana-hambana leyi voningelaka’ ya Bibele, yo fana ni leswaku i yini leswi endlekaka ha hina loko hi file nileswaku ha yini ku ri ni madzolonga yo tala swonghasi emisaveni. Xi hlamusela “misinya ya milawu ya Xikwembu leyi nga eBibeleni,” leyi loko yi tirhisiwa yi vuyerisaka enyameni naswona yi tisaka ntsako, ntshembo ni timfanelo tin’wana leti navelekaka. Xiphephana lexi xi nyika xivangelo xin’wana lexi engetelekeke xa leswaku Bibele yi hlayiwa—ku nga vuprofeta malunghana ni vumundzuku bya hina lebyi kombisaka leswi nga ta endleka ku nga ri khale.—Nhlav. 21:3, 4.
4 “Mpfuno Wo Twisisa Bibele”: Xiphephana lexi xi ri: “Hinkwerhu hi lava ku pfuniwa leswaku hi twisisa Rito ra Xikwembu.” Kutani xi hlamusela ndlela leyi hi nga dyondzaka Bibele ha yona: “Hakanyingi swa antswa ku dyondza Bibele hakatsongo-tsongo, u sungula hi tidyondzo ta xisekelo.” Hambiloko xi swi veka erivaleni leswaku “Bibele hi yona xihlovo lexi tirhisiwaka ngopfu emhakeni [yoleyo],” xiphephana lexi xi vulavula hi ku kongoma hi broxara leyi nge, Leswi Xi Swi Languteleke tanihi yona leyi nga pfunaka xichudeni ku “twisisa leswi Matsalwa ma vulaka swona malunghana ni timhaka to hambana-hambana.” Xihlokwana lexi landzelaka xi pfuxa xivutiso lexi lavaka leswaku munhu a anakanyisisa.
5 “Xana Wa Swi Rhandza Leswaku Vhiki Rin’wana Ni Rin’wana U Tinyika Nkarhi Wa Ku Twisisa Bibele?” Xiphephana lexi xi hlamusela leswaku ku nga endliwa malunghiselo yo dyondza Bibele hi nkarhi lowu xichudeni xi wu tsakelaka ni le ndhawini leyi xi yi rhandzaka, ku nga ha dyondziwa na xona ekaya ra xona kumbe hi riqingho. I vamani lava nga hlanganyelaka edyondzweni leyi? Xiphephana lexi xi ri: “I vandyangu wa wena hinkwavo. Vanghana va wena hinkwavo lava u va hlawulaka na vona va nga hlanganyela. Kumbe loko u swi lavisa sweswo ku nga dyondziwa na wena ntsena.” Xana dyondzo ha yin’we yi fanele ku teka nkarhi wo tanihi kwihi? Xiphephana lexi xi ri: “Vo tala va va ni awara leyi va yi vekelaka ku dyondza Bibele vhiki na vhiki. Loko u ta swi kota ku dyondza nkarhi lowu engetelekeke kumbe xiyimo xa wena xi nga ku pfumeleli ku dyondza awara vhiki rin’wana ni rin’wana, Timbhoni ti ta ku pfuna.” Yoleyo hi yona yinhla ya nkoka! Hi tiyimiserile ku pfumelelana ni swiyimo swa xichudeni ha xin’we.
6 “Xirhambo Xa Ku Dyondza”: Xiphephana lexi xi ni ndhawu leyi loyi a xi tameleke a nga kombelaka ku rhumeriwa broxara leyi nge Leswi Xi Swi Languteleke kumbe a endzeriwa leswaku a ta hlamuseriwa hi lunghiselelo ra hina ra dyondzo ya le kaya ya Bibele ya mahala. Xifunengeto xa broxara leyi nge Leswi Xi Swi Languteleke xi kombisiwe hi mivala leyi heleke ya broxara. Xana wa swi vona leswaku ha yini xiphephana lexi xi ta khutaza vanhu vo tala va timbilu leti tshembekeke leswaku va amukela mpfuno wa hina? Kutani ke, hi nga xi tirhisa njhani hi ndlela leyinene xitirho lexi lexintshwa?
7 I Vamani Lava U Nga Va Nyikaka Xiphephana Lexi? Xiphephana lexi xi nga nyikiwa vanhu hi ku kongoma kumbe xi siyiwa emakaya lama nga riki na munhu. Xi nga fambisiwa hi yindlu ni yindlu, eswitarateni ni le tindhawini ta mabindzu. Xi ta nyikiwa vanhu, ku nga khathariseki leswaku va ti amukela tibuku ta hina kumbe va ti ala. Xi nghenise eka timagazini kumbe eka minkandziyiso yin’wana leyi u yi fambisaka. Xi nghenise emapapileni lawa u ma tsalaka. Lava u vulavulaka na vona hi riqingho va kombele ku va rhumelela xona. Minkarhi hinkwayo tshama u ri ni tikopi leti u nga ti fambisaka loko u ya exitolo, loko u famba hi swo famba swa mani na mani niloko u chumayela hi xitshuketa. Xi nyike un’wana ni un’wana la ku endzelaka. Xi nyike maxaka, vaakelani, vatirhi-kuloni, lava u nghenaka na vona xikolo ni lava u va toloveleke. Endla matshalatshala ya ku siya xiphephana lexi emavokweni ya un’wana ni un’wana loyi u hlanganaka na yena! I yini lexi u faneleke ku xi endla endzhaku ka sweswo?
8 Loko Munhu O Pfumela Ku Dyondzeriwa Hi Nkarhi Wolowo: Vanhu van’wana va ta pfumela ku dyondzeriwa Bibele hi nkarhi wolowo. Hikwalaho, nkarhi wun’wana ni wun’wana loko u ri entirhweni wa nsimu, tiyiseka leswaku u tshama u ri ni tikopi timbirhi ta broxara leyi nge Leswi Xi Swi Languteleke—yin’we i ya xichudeni kasi leyin’wana i ya wena. Loko munhu a swi tsakela ku dyondzeriwa, namba u sungula dyondza hi nkarhi wolowo. Pfula eka tluka ra vumbirhi, kutani u hlaya laha ku nge “Ndlela Yo Tirhisa Broxara Leyi.” Loko u hetile namba u ya eka dyondzo 1 leswaku u kombisa ndlela leyi dyondzo yi nga ta fambisiwa ha yona. Xana ku ni lexi tikaka hi xingheniso lexi?
9 Loko Muyingiseri Wa Wena A Lava U N’wi Nyika Nkarhi Wo Anakanya: Endla matshalatshala ya ku tlhela u n’wi vona ku nga si hundza nkarhi wo leha. Loko u tlhelela, tiyiseka leswaku u ni broxara leyi nge Leswi Xi Swi Languteleke. N’wi kombe nxaxamelo wa leswi nga endzeni. N’wi pfumelele a hlawula dyondzo leyi n’wi tsakisaka swinene. Yi pfule, ivi u sungula ku yi hlamusela.
10 Tlhelela Eka Lava U Va Fambiseleke Timagazini: Loko u fambise xiphephana ni timagazini, u nga vula leswi landzelaka loko u tlhelela: “Nkarhi lowu hundzeke loko ndzi ku endzerile ndzi tsakile ku va ndzi ku siyele magazini wa Xihondzo xo Rindza. Ndza tshemba u swi xiyile leswaku vito leri heleleke ra magazini lowu ri ri, Xihondzo xo Rindza Xi Huwelela Mfumo Wa Yehovha. Ndzi rhandza ku ku hlamusela leswaku Mfumo lowu i yini ni leswi wu nga ta ku endlela swona xikan’we ni ndyangu wa wena.” Kutani pfula dyondzo 6 eka broxara leyi nge Leswi Xi Swi Languteleke. U tirhisa ndzimana yo sungula, hlaya u tlhela u hlamusela swo tala hi nkarhi lowu n’wini wa muti a nga na wona. Ivi u endla malunghiselelo ya leswaku u tlhelela u ya hetisa dyondzo yoleyo.
11 Tshama U Ri Ni Swiphephana: Mulanguteri wa ntirho ni lava tamelaka tibuku va fanele va tiyiseka leswaku minkarhi hinkwayo evandlheni ku tshama ku ri ni mphakelo lowu ringaneke wa xiphephana lexi nge Tiva Bibele. Tshama u ri na swona exikhwameni xa wena xa hembe kumbe exipachini, emovheni wa wena, laha u tirhaka kona, exikolweni ni le kusuhi ni nyangwa wa yindlu ya wena—kun’wana ni kun’wana laha swi nga kumekaka kona hi ku olova. Nakambe, famba ni swin’wana enkwameni wa wena wa nsimu leswaku u ta swi tirhisa loko u hlangana ni munhu la nga rhandzaka ku bula na wena hi Bibele.
12 Onge Yehovha A Nga Katekisa Matshalatshala Ya Hina: Pakani leyi Vakreste hinkwavo va lavaka ku yi fikelela i ku dyondzisa van’wana ntiyiso. (Mat. 28:19, 20) Xana u karhi u fambisa dyondzo ya le kaya ya Bibele? Loko swi ri tano, xana u nga swi kota ku sungula yin’wana exiyimisweni xa wena xa vhiki ni vhiki? Loko ku ri leswaku a wu fambisi dyondzo sweswi, kunene u nga tsakela ku yi fambisa. Khongela Yehovha leswaku a katekisa matshalatshala ya wena ya ku kuma loyi u nga n’wi dyondzelaka. Kutani u endla hi ku pfumelelana ni swikhongelo swa wena.—1 Yoh. 5:14, 15.
13 Hi ni xitirho lexintshwa xa ku sungula tidyondzo ha xona! A hi xi toloveleni. A hi xi nyikeni mani na mani. Hi endla hinkwaswo leswi hi nga swi kotaka leswaku hi ‘endla leswinene, hi fuwa hi mintirho leyinene, hi hanana ni ku tiyimisela ku avelana ni van’wana’ leswi hi swi dyondzeke hi Rito ra Xikwembu.—1 Tim. 6:18.
[Bokisi leri nga eka tluka 4]
MINKARHI LEYI XIPHEPHANA XI NGA FAMBISIWAKA HA YONA
◼ Eka mabulo ya siku ni siku
◼ Loko munhu a amukela minkandziyiso ya hina
◼ Loko ku nga ri na munhu ekaya
◼ Loko hi endla maendzo yo vuyela
◼ Loko hi hlangana ni munhu eku chumayeleni ka le xitarateni
◼ Loko hi chumayela etindhawini ta mabindzu
◼ Loko hi chumayela hi xitshuketa
◼ Loko hi tsala mapapila
◼ Loko hi famba hi swo famba swa mani na mani
◼ Loko munhu a hi endzela
◼ Loko hi vulavula ni maxaka, vaakelani, vatirhi-kulorhi, lava hi nghenaka na vona xikolo ni lava hi va toloveleke