Tshama U Lunghekele Ku Sungula Dyondzo Ya Bibele
1. I yini leswi katsekaka eku hetisiseni ka xileriso xa Yesu lexi nga eka Matewu 28:19, 20?
1 Yesu u hi lerise leswaku hi ‘endla vadyondzisiwa hi va dyondzisa.’ (Mat. 28:19, 20) Kutani hi lava ku tshama hi lunghekele ku sungula tidyondzo ta Bibele, ku nga ri ntsena hi siku ro hlawuleka leri vekeriweke ku sungula tidyondzo ta Bibele. Swiringanyeto leswi landzelaka swi nga ha pfuna.
2. I vamani lava hi nga ha kombelaka ku dyondza na vona Bibele?
2 Yi Sungule: Loko hi tikarhatela ku sungula tidyondzo ta Bibele, hi ta ti kuma. (Ekl. 11:6) Xana u tshame u kombela munhu hi ku kongoma? Vandlha rin’wana ra le United States ri heta n’hweti hinkwayo ri ri karhi ri sungula tidyondzo ta Bibele. A ri tikoti hi ntsako leswi se ri sunguleke tidyondzo ta Bibele ta 42! U nga ehleketi leswaku vanhu lava u va endzelaka va swi tiva leswaku u lava ku dyondza na vona Bibele. Ha yini u nga kombeli ku va fambisela dyondzo ya Bibele loko u tlhela u va endzela? Loko va nga pfumeli, u nga vileli. U nga ha ya emahlweni u hlakulela ku tsakela. Xana u tshame u kombela vaakelani va wena, maxaka, swichudeni-kuloni kumbe vatirhi-kuloni loko va ta swi tsakela ku dyondza Bibele na wena? U nga ha vutisa swichudeni swa wena swa Bibele loko swi ri ni vanghana kumbe maxaka lama nga ha tsakelaka ku dyondza Bibele.
3. Hi xihi xitirhisiwa xa nkoka lexi nga hi pfunaka ku sungula tidyondzo ta Bibele naswona hi nga xi tirhisa kwihi?
3 Xitirhisiwa Xa Nkoka: Xitirhisiwa xa nkoka lexi nga hi pfunaka leswaku hi sungula tidyondzo ta Bibele i xiphephana lexi nge Xana Wa Swi Lava Ku Kuma Tinhlamulo Ta Swivutiso Swa Nkoka Swinene eVuton’wini? U nga xi nyika vini va miti ku nga khathariseki leswaku va yi amukerile minkandziyiso ya hina kumbe a va yi amukelanga. U nga xi tirhisa loko u tirha nsimu etindhawini ta mabindzu, loko u chumayela exitarateni, loko u tsalela vanhu mapapila niloko u endla maendzo yo vuyela. U nga ha xi siya ni le mitini leyi u nga kumangiki munhu eka yona. Ha yini u nga fambi na xona loko u famba hi swo famba swa mani na mani, loko u ya exitolo niloko u ya entirhweni? Tluka ra xona ro hetelela ri hlamusela ndlela leyi dyondzo ya Bibele yi nga sunguriwaka ha yona hi ku komisa, hi ku tirhisa buku leyi nge Leswi Bibele Yi Swi Dyondzisaka.
4. Hi nga xi tirhisa njhani xiphephana lexi nge Swivutiso Swa Nkoka Swinene leswaku hi sungula tidyondzo ta Bibele?
4 Endzhaku ko xi nyika munhu, u nga n’wi komba swivutiso leswi nga eka tluka ro sungula kutani u ku, “Hi xihi xivutiso lexi u nga tsakelaka ku kuma nhlamulo ya xona?” Endzhaku ka sweswo, mi nga kambisisa nhlamulo ya xona endzeni ka xona kutani u hlaya kumbe u katsakanya tluka ro hetelela leri hlamuselaka malunghiselelo ya dyondzo ya Bibele. U nga tlhela u n’wi komba buku leyi nge Leswi Bibele Yi Swi Dyondzisaka, leyi nga ni rungula leri engetelekeke hi mhaka yoleyo kutani u n’wi nyika yona. Endla malunghiselelo yo tlhela u n’wi endzela leswaku mi ta yisa bulo ra n’wina emahlweni.
5. Ha yini hi fanele hi tshama hi lunghekele ku sungula tidyondzo ta Bibele?
5 Nsimu ya hina ya ha ri ni vanhu vo tala lava navelaka ku tiva swo tala hi Bibele. Loko hi ya hi tikarhatela ku sungula tidyondzo ta Bibele, hi ta tiphina hi ku pfuna van’wana leswaku va famba egondzweni leri yisaka evuton’wini.—Mat. 7:13, 14.