Tshama U Tiyimisele Ku Endla Vanhu Vadyondzisiwa
1. I yini leswi hi faneleke hi swi endla leswaku vanhu va ponisiwa?
1 Xiviko xa ntirho xa lembe ra 2014 xi kombisa leswaku vanhu va Xikwembu va hiseka naswona va tiyimisele ku chumayela mahungu lamanene ya Mfumo. (Mat. 24:14) Hi fikelela vanhu vo tala hi rungula ra le Bibeleni ku tlula khale, loko hi chumayela hi yindlu ni yindlu, hi fambisa swiphephana ni swirhambo eka matsima yo hlawuleka ni loko hi chumayela etindhawini ta mani na mani. Hambiswiritano, leswaku vanhu va ponisiwa hi fanele hi va pfuna leswaku va va vadyondzisiwa va Yesu hi ku dyondza na vona Bibele.—1 Tim. 2:4.
2. Hi swihi swivutiso leswi hi nga tivutisaka swona leswi nga hi pfunaka leswaku hi tshama hi lunghekele ku kombela dyondzo ya Bibele?
2 Tshama U Lunghekele Ku Kombela Dyondzo Ya Bibele: Loko munhu a kombisa ku tsakela, xana u kombela adirese kumbe nomboro yakwe ya riqingho ivi u tlhelela eka yena hi ku hatlisa hi xikongomelo xo sungula dyondzo ya Bibele? U hetelele rini ku ringeta ku kombisa n’wini wa muti ndlela leyi dyondzo ya Bibele yi fambisiwaka ha yona eka riendzo ro sungula? U hetelele rini ku kombela dyondzo ya Bibele eka lava u va yiselaka timagazini nkarhi ni nkarhi? Xana u tshame u komba vatirhikuloni, vadyondzikuloni, vaakelani, maxaka ni van’wana lava u tolovelaneke na vona vhidiyo leyi nge, Ha Yini U Fanele U Dyondza Bibele? ni leyi nge, Leswi Endlekaka Eka Dyondzo Ya Bibele? Loko u tirhisa xigolonyana kumbe tafula ro veka minkandziyiso, xana wa va byela lava va tekaka nkandziyiso lowu hi wu tirhiselaka ku fambisa dyondzo leswaku va nga fambiseriwa dyondzo ya Bibele ya mahala?
3. Ku laveka yini leswaku hi dyondzisa vanhu ntiyiso hi ndlela leyi humelelaka?
3 Mpfuno Lowu Humaka Eka Yehovha Na Yesu: Leswi Yesu a sunguleke xileriso xakwe xa leswaku hi ya ‘endla vanhu vadyondzisiwa’ hi rito leri nge “fambani,” u kombise leswaku hi fanele hi endla matshalatshala hi tlhela hi teka goza. Hambiswiritano, a nga hi tshikanga hi ri hexe kambe u tshembise ku va na hina. (Mat. 28:19, 20) Ku engetela kwalaho, Yehovha u hi nyike moya wakwe lowo kwetsima ku katsa ni switirhisiwa ni ndzetelo lowu hi wu lavaka leswaku hi dyondzisa vanhu ntiyiso. (Zak. 4:6; 2 Kor. 4:7) Hi nga khongelela “matimba ya ku rhandza ni ku endla” ntirho lowu wa nkoka.—Filp. 2:13.
4. Ha yini hi fanele hi tshama hi lunghekele ku endla vanhu vadyondzisiwa?
4 Ku chumayela mahungu lamanene swi hi tisela ntsako lowukulu. Hambiswiritano, ntsako wa hina wa engeteleka loko hi dyondzisa munhu ntiyiso hi tlhela hi n’wi pfuna leswaku a fambisana na hina ‘egondzweni leri yisaka evuton’wini.’ (Mat. 7:14; 1 Tes. 2:19, 20) Xa nkoka swinene, loko hi tshama hi lunghekele ku endla vanhu vadyondzisiwa, hi tsakisa Yehovha loyi ‘a nga naveliki leswaku ku lova ni un’we kambe a navelaka leswaku hinkwerhu hi hundzuka.’—2 Pet. 3:9.