Rito Ra Xikwembu Ra Kongomisa
1 “Hi hanya emisaveni leyi nga ni swirhalanganya swo tala ngopfu naswona ku ni ntlhantlho wutsongo ngopfu. Timiliyoni to tala nkarhi na nkarhi ta sika. Tinhlayo leti andzaka ta lava godzomberiweke hi swidzidzirisi. Mindyangu yo tala ya hohloka. Ku tekana ka maxaka ni madzolonga ya ndyangu nkarhi na nkarhi swi le mahungwini. Moya lowu hi wu hefemulaka ni mati lama hi ma nwaka ma ngheniwa hi chefu hakatsongo-tsongo. Hi nkarhi lowu fanaka, vo tala va hina va hlaseriwa hi vugevenga.”
2 Buku leyi nge Bibele—I Rito Ra Xikwembu Kumbe I Ra Munhu? yi sungurisa xisweswo. Xingheniso xa yona xa faneleka swinene namuntlha ku tlula loko buku leyi ya ha ku humesiwa malembe ya nkombo lama nga hundza. Vanhu va fanele va swi tiva leswaku Rito ra Xikwembu ra kongomisa naswona ri nyikela mintlhantlho eka swiphiqo hinkwaswo leswi va hlaselaka. Hi December hi ta tikarhatela ku pfuna vanhu hi ku va fambisela buku leyi nge Bibele—I Rito Ra Xikwembu Kumbe I Ra Munhu? New World Translation of the Christian Greek Scriptures ya kumeka hi Xibunu, Xisuthu, Xixhosa na Xizulu, naswona hi ta va hi endla kahle loko hi yi fambisela vanhu hinkwavo lava vulavulaka tindzimi leti. Kavula, ku siyela munhu buku ntsena a hi xitiyisekiso xa leswaku u ta amukela nkongomiso wa Xikwembu. Hi fanele hi endla maendzo yo vuyela hi ri ni pakani yo sungula dyondzo ya Bibele. Ha tiyisekisiwa leswaku hi ta pfuniwa loko hi endla matshalatshala yo tano. (Mt. 28:19, 20) Hi leswi swingheniso swin’wana leswi ringanyetiweke:
3 Loko u kuma munhu la dyuhaleke, u nga ha ringeta xingheniso lexi: ◼“Ndzi kombela ku vutisa: Loko wa ha ri ntsongo, xana vanhu va le ndhawini ya ka n’wina a va hanyisana njhani? [Yimela nhlamulo.] Swilo swi cincile manguva lawa, a swi tano ke? Xana u vona onge xivangelo xa ku cinca loku i yini? [Yimela nhlamulo.] Entiyisweni ha ku vona ku hetiseka ka vuprofeta bya le Bibeleni. [Hlaya 2 Timotiya 3:1-5.] Handle ko hlamusela hi ku kongoma leswi misava yi nga xiswona namuntlha, Bibele yi tlhela yi tshembisa misava leyinene ku nga ri khale. Hikwalaho ka xivangelo xexo hi khutaza un’wana ni un’wana leswaku a hlaya Bibele.” N’wi kombe buku leyi nge Bibele—I Rito Ra Xikwembu Kumbe I Ra Munhu?, ivi u kombisa ndzima 10, leyi hlamuselaka vuprofeta byin’wana lebyi hi voneke ku hetiseka ka byona. Fambisa buku hi munyikelo wa R4,00.
4 Loko u tlhelela eka munhu la dyuhaleke loyi u n’wi fambiseleke buku, u nga ha ku:
◼“Loko hi vulavula enkarhini lowu nga hundza, hi pfumelelanile leswaku hi tindlela to tala vanhu va manguva lawa va cince ngopfu loko va pimanisiwa ni ndlela leyi vutomi a byi ri xiswona malembe ma nga ri mangani ntsena lama nga hundza. Hambiswiritano, ndzi tele ku ta ku kombisa leswaku Bibele yi hi tshembisa misava leyinene enkarhini lowu taka. [Hlaya Nhlavutelo 21:3, 4.] Ku tiva leswaku leri i Rito ra Xikwembu swi fanele swi hi khutaza ku languta eka swin’wana leswi Bibele yi swi vulaka.” Pfula buku leyi nge Rito Ra Xikwembu eka ndzima 14, ivi u hlaya tindzimana 3-4. Hlamusela ta dyondzo ya le kaya ya Bibele ya mahala.
5 Loko u vulavula na muntshwa, u nga ha ku: ◼“Ndzi kombela ku ku vutisa xivutiso: Leswi u nga muntshwa, xana u vona onge u ni xivangelo xo langutela leswa ha taka hi ntshembo? Xana vumundzuku byi ku khomele yini? [Yimela nhlamulo.] Nkateko wa kona, ku ni xivangelo lexi twalaka xo langutela vumundzuku hi ntshembo. [Hlaya Pisalema 37:10, 11.] Tanihi leswi vanhu va nga ni mavonelo yo hambana hi Bibele ni leswi yi swi dyondzisaka, hi kandziyise buku leyi nge Bibele—I Rito Ra Xikwembu Kumbe I Ra Munhu? Xiya swivangelo leswi yi swi nyikelaka swa ku hlaya Bibele. [Hlaya tindzimana 16-17 eka matluka 10-11.] Loko ho kala hi pfumela leswaku leswi Bibele yi swi vulaka i ntiyiso, hi ta va ni ntshembo lowu tiyeke hi vumundzuku. Loko u lava ku hlaya buku leyi, ndzi ta tsakela ku ku siyela yona hi munyikelo wa R4,00.”
6 Loko u tlhelela ku ya vona muntshwa loyi a tekeke buku leyi nge “Rito Ra Xikwembu” u nga ha sungula hi ku: ◼“Ndzi tsakisiwe hi ku twa ndlela leyi u khumbekaka ha yona hi vumundzuku. Tsundzuka leswaku ndzi ku kombise tsalwa ra Bibele leri hi tshembisaka vumundzuku lebyi tsakisaka ni lebyi sirhelelekeke. Hi leri tsalwa rin’wana. [Hlaya Nhlavutelo 21:3, 4.] Buku leyi ndzi ku siyeleke yona yi nyikela vumbhoni lebyi khorwisaka bya leswaku Bibele i Rito ra Xikwembu, hayi ra munhu. Ntiyiso wo tano wu ni nkucetelo lowu enteke. Xiya leswi nkucetelo lowu wu nga swona. [Hlaya tindzimana 1-2 eka matluka 184-5.] Loko u swi rhandza, ndzi ta tsakela ku dyondza Bibele na wena mahala.”
7 Munhu la nga tiviki lomu a nga yaka kona leswaku a ku-ma nkongomiso wo langutana ni swiphiqo swa vutomi a nga ha angula kahle eka xingheniso lexi: ◼“Hi hanya enkarhini lowu un’wana ni un’wana a langutaneke ni swiphiqo leswikulu. Vo tala va hundzulukela eka vatsundzuxi vo hambana-hambana leswaku va kuma nkongomiso. Van’wana va ya eka vakambisisi va miehleketo leswaku va pfuniwa. Xana u ehleketa leswaku hi nga yi kuma kwihi ndzayo leyi twalaka leyi nga ta hi vuyerisa? [Yimela nhlamulo.] Bibele yi hlamusela yinhla ya nkoka leyi hinkwerhu ka hina hi faneleke hi yi twisisa.” Hlaya Yeremiya 10:23. Pfula buku leyi nge Bibele—I Rito Ra Xikwembu Kumbe I Ra Munhu? eka tluka 187, ivi u hlaya ndzimana 9. “Buku leyi yi ta ku pfuna leswaku u twisisa ndlela leyi ehansi ka Mfumo wa Xikwembu, swiphiqo hinkwaswo swi nga ta herisiwa ha yona. Xana u nga tsakela ku yi hlaya?” Fambisa buku hi munyikelo wa R4,00.
8 Loko eriendzweni ro sungula u vulavule hi xilaveko xa munhu xa nkongomiso, u nga yisa bulo emahlweni eka riendzo ro vuyela hi ku vula u ku: ◼“Loko hi hlangana ro sungula, hi pfumelelanile leswaku hi lava nkongomiso wa Xikwembu leswaku hi ta kota ku langutana ni swiphiqo swa vutomi hilaha ku humelelaka. Malunghana ni sweswo, ndzi ehleketa leswaku u ta rhandza nhlamuselo yo hetelela leyi nga ebukwini leyi ndzi ku siyeleke yona. [Hlaya tindzimana 12-13 eka tluka 189 ra buku leyi nge Rito Ra Xikwembu.] Ndzi tsakela ku ku fambisela dyondzo ya le kaya ya Bibele ya mahala, naswona ndzi lunghekele ku ku kombisa maendlelo ya yona sweswi.”
9 Yehovha u ta katekisa matshalatshala ya hina loko hi pfuna lavakulu ni lavatsongo hi ku fanana leswaku va vona nkoka wa Rito ra Xikwembu ni nkongomiso wa rona evuton’wini bya hina.—Ps. 119:105.