Vatswari Lava Tsakaka!
1 Loko u ri muntshwa naswona u tshama ekaya ra Vakreste, ku ni ndlela yo hlawuleka leyi u nga tsakisaka vatswari va wena ha yona. Loko u famba hi ndlela leyo lulama, ‘tata wa wena ni mana wa wena va ta tsaka.’ (Swiv. 23:22-25) Hi ntumbuluko vatswari va wena va ku navelela leswinene. Ku hava lexi nga va tsakisaka ku tlula ku ku vona u endla ntiyiso wu va wa wena ni ku nyiketela vutomi bya wena eka Yehovha.
2 U fanele ku tsaka hi ku va ni vatswari lava nga entiyisweni. Ku sukela eku velekiweni ka wena, a va ku phamela, va ku ambexa ni ku ku kumela yindlu hambi ku ri ku ku ongola eminkarhini ya mavabyi. Xa nkoka ngopfu, va tikarhatele ku ku dyondzisa hi Yehovha ni tindlela ta yena leto lulama; lowu i ndzetelo lowu nga tiyisekisaka ku hanya ka wena hi masiku. (Ef. 6:1-4) Xana u nga ku kombisa njhani ku tlangela ka wena?
3 Endla Ntiyiso Wu Va Wa Wena: Vatswari va wena va ringete ku ku dyondzisa leswaku u teka ntiyiso wu ri wa nkoka, u endla nhluvuko emoyeni ni ku tshama ekusuhi ni nhlengeletano ya Yehovha. U nga kombisa ku tlangela hi ku tsakela dyondzo ya ndyangu handle ko sindzisiwa. Kombisa ku navela ku ya eminhlanganweni, u va wo sungula ku tilunghisa leswaku ndyangu hinkwawo wu ta fika ka ha ri ni nkarhi. Tshama ni vatswari va wena hi nkarhi wa minhlangano, kutani u nyikela nyingiso lowukulu hi ku landzelerisisa etibukwini leti dyondziwaka. Hlanganyela eminhlanganweni hi ku hlamula. Tikombise u ri xichudeni lexi tinyiketeleke eXikolweni xa Vutirheli bya le Tilweni, u amukela swiavelo ni ku tikarhatela ku swi hetisisa. Tinyiketeli ku pfuna hi mintirho ya le Holweni ya Mfumo, laha mpfuno wa wena wu nga ta tirha kona. Ku katseka emintirhweni yo tano ku nga endla leswaku mbilu ya wena yi tshama yi ri eka swilo leswinene hi tlhelo ra moya.
4 Tivekele Tipakani To Endla Nhluvuko: Tikarhatele ku hlanganyela hi xitalo entirhweni wa nsimu, u kombisa ku navela ku fanelekela ku va muhuweleri. Fambisana ni ku hlaya ka Bibele ka vhiki na vhiki, hambi ku ri ku hlaya Bibele hinkwayo hi wexe. Tiva leswaku u ta hlangavetana ni swilaveko swa ku tinyiketela ni nkhuvulo. Vatswari va wena va nga ku pfuna ku hlawula tidyondzo ta le xikolweni hi vukheta, hi xikongomelo xo kuma vuleteri lebyi nga ta ku havaxerisa ku hlanganyela hi xitalo entirhweni wa Yehovha. Tshama u ri karhi u tirhela ku va ni vito lerinene leri nga ta susumetela van’wana leswaku va ku bumabumelela malunghelo yo hlawuleka yo tanihi vuphayona ni ntirho wa le Bethele. (Mint. 16:1, 2) Ku fikelela tipakani swi nga ku pfuna leswaku u “hlawula leswi nga swinene ku tlula swin’wana . . . mi ta tala hi mihandzu ya leswo lulama.”—Flp. 1:10, 11.
5 Vuntshwa i nkarhi wo dyondza, ku kuma ntokoto ni ku dyondza tindlela to hanyisana ni van’wana. I nkarhi lowu u nga ta tsakela vutomi lebyi nga riki na mintshikilelo ni vutihlamuleri lebyi vaka kona loko u ri munhu lonkulu. Solomoni u te: “Džaha, ṭakela v̌untŝha bya wena, mbilu ya wena yi ku ṭakisa hi masiku ya v̌untŝha bya wena.” (Ekl. 11:9) Loko mbilu ya wena yi anakanya hi ku tirhela Yehovha evuntshweni bya wena, u ta kuma mikateko leyi nga heriki.—1 Tikr. 28:9.
6 Loko u “kongoma ku lulama” ku nga ri “ku navela loku telaka lavantshwa,” u ta rhula vatswari va wena ndzwalo lowukulu wa ku vilela ni ku pandza tinhloko. (2 Tim. 2:22) U ta va ni xivangelo xo tsaka embilwini ya wena. (Swiv. 12:25) Ku tlula hinkwaswo, u ta tsakisa Muvumbi wa wena, Yehovha Xikwembu.—Swiv. 27:11.