Moya Lowu Yehova A Wu Katekisaka

“HOSI a yi ve ni moya wa wena. Tintswalo a ti ve na wena.” Hi marito lawa, Pawulo u dlayelele papila rakwe ra vumbirhi eka Timotiya. (2 Timotiya 4:22) I ntsako muni wonghasi lowu marito lawa yo bumabumela ya faneleke ya ve na wona eka Timotiya ni lava a va ri na yena—ku tiva leswaku va kombise moya lowu Yehova a wu katekisaka!

Kambe i yini moya lowu Yehova a wu katekisaka? I yini lexi kahle-kahle xi hlawulaka lava va nga ni moya lowu? Naswona xana hi nga kombisa moya lowu ivi hi kuma nkateko wa Yehova hi ndlela yihi?

Ku ku pfuna ku hlamula swivutiso leswi, a hi tlhelele endzhaku enkarhini wa Muxe. Vaisrayele va le mananga. Yehova sweswinyana u endle ntwanano wa Nawu na vona, kutani manuku u va letela ndlela leyi va faneleke ku n’wi gandzela ha yona. Leswi swi katsa ku aka tende ro hlanganyela leri rhwalekaka leri ri nga ta lava ntsengo lowukulu wa nsuku, swivunguvungu, ni vanhu lava nga ni vutshila byo aka. Nkarhi wo endla mihlengo ya tinyiko to tirhandzela yo avela switirho leswi lavekaka ni ntirho swi nyikeriwile eka tiko hi marito lawa: “E munhu uṅwana ni uṅwana l’a ŝi ranḍaka hi mbilu, o ta tisela Yehova e ku nyika ka yena: e nsuku, ni silver, ni kopor; ni šiv̌unguv̌ungu . . . Kutani v̌av̌anuna hikwav̌o la’v̌o tlhariha e šikari ka ṅwina, v̌a ta ta, v̌a ta tira hikwaŝo le’ŝi lerisiweke i Yehova: E Tabernakela, ni nṭonga wa yona, ni šifunengeto ša yona.”—Eksoda 35:5-19.

Xana tiko ri amukele nkarhi lowu hi ndlela yihi? Xiphemu lexi saleke xa ndzima 35 xi hi byela leswaku lava ‘timbilu ta vona ti va susumeteke’ ni lava ‘moya wa vona wu va nyanyuleke’ va endle minyikelo ni ku tinyiketela ku tirha hi xihatla loku kombeke leswaku va fuwe nkarhi lowu a va vekeriwe wona. (Tindzimana 21, 22, 26) Ku amukela ka vona a ku ri loku ndzima 36, ndzimana 6, yi hi byelaka leswaku “kutani Moše a lerisa leŝaku v̌a huwelela e mišašeni e mhaka le’yi nge: V̌av̌anuna ni v̌av̌asati va nga ha ṭhuki v̌a lungisa mitiro ya nhlengo wa V̌ukwetsimelo. E tiko ri siv̌eriwa ŝeŝo e ku tisa ŝilo.” Ina, a va fanele ku siveriwa! Yehova a nga tirhisanga marhengu ya ntshikilelo loko a endle leswaku ku va ni xitiviso: “E munhu uṅwana ni uṅwana l’a ŝi ranḍaka hi mbilu . . . ” Vuyelo a ku ri leswaku tiko ri kombe moya wa ku swi rhandza, kutani leswi swi tise mikateko hi xivumbeko xa ntsako lowukulu, kun’we ni nsirhelelo wa Yehova ni nkongomiso eka hinkwaswo leswi va swi endleke.

Malembe endzhakunyana, moya lowu fanaka wu kombisiwile nakambe. Leswi swi humelele loko Hosi Ezekiyasi a tirhele ku hlayisa vugandzeri lebyi tengeke eIsrayele. Mhaka yi hi byela leswaku, loko a nyikiwe nkarhi, “kav̌a loko nhlengeletano yi tisa ŝitlhav̌elo ni maganḍelo ya ku nkhensa, kutani hikwav̌o la’v̌a nga ŝi ranḍa v̌a humesa tiholokosta.” Vuyelo ku ve byihi? “Ezekias ni tiko hikwaro v̌a ṭaka, hikuv̌a Šikwembu a ši nghenisile moya lo’wunene ka v̌anhu v̌a tiko; hikuv̌a mhaka leyi yi endliwile kaṅwe-kaṅwe.”—2 Tikronika 29:31-36.

Vakriste Va Kombisa Moya Lowunene

Xana hi xiya moya lowu fanaka wa magandzelo ya ku swi rhandza eminkarhini ya Vakriste? Xiya leswi Pawulo a swi tsaleke hi ta Vakriste va Filipiya eka Vafilipiya 1:3-5: “Ndzi nkhensa Xikwembu xa mina minkarhi hinkwayo, loko ndzi mi anakanya. Nkarhi wun’wana ni wun’wana loko ndzi mi khongelela n’wina hinkwenu, ndzi khongela hi ku tsaka, hikwalaho ka ndlela leyi mi ndzi pfuneke ha yona entirhweni wa Evangeli, ku sukela siku ro sungula ku fikela namuntlha.” Ku hi tindlela tihi Vakriste va le Filipiya a va ri emahlweni hi ‘munyikelo wa vona wa mahungu lamanene’? Tindzimana leti yaka emahlweni ti swi veka erivaleni leswaku a va rhandza ku twananisa mahanyelo ya vona ni milawu ya Bibele leswaku va ta yisa emahlweni mahungu lamanene ntsena kambe a va hiseka eku chumayeleni ka vona ni ku dyondzisa mahungu lamanene eka van’wana.

Leswaku Vakriste hinkwavo va fanele hi ku swi rhandza va hlanganyela entirhweni wa ku chumayela hi tindlela leti swi kandziyisiwile eka Vaheveru 13:15: “Loko swi ri tano, a hi humeseni magandzelo masiku hinkwawo ha yena Yesu, hi dzunisa Xikwembu ha wona, hi leswaku, hi fanele ku vonga vito ra xona hi marito lama humaka emilon’weni ya hina.” Kutani ku chumayela ka mahungu lamanene ka Mukriste un’wana ni un’wana i ndlela-nkulu leyi hi nga kombaka moya wa ku swi rhandza lowu hambanisaka vagandzeri va ntiyiso va Yehova namuntlha. Tlhandla-kambirhi, Vakriste va tsundzuxiwile leswaku a va fanelanga ku ‘rivala ku endla leswinene ni ku pambulela van’wana leswi va nga na swona, hikuva magandzelo lawa hi wona lama tsakisaka Xikwembu.’—Vaheveru 13:16.

Vamakwerhu va le Filipiya va kombise moya lowu wa ku swi rhandza hi ndlela yin’wana. Eka ndzima 4 Pawulo u hlamusela makhamba yo tala loko va tile ku ta n’wi pfuna hi ndlela ya swa timali, leswaku ku chumayeriwa ka mahungu lamanene ku ta ya emahlweni. (Vafilipiya 4:14-17) Xisweswo va tekelele xikombiso lexinene xa vagandzeri volavo vo sungula va Yehova. Xisweswo va dzunisile “Yehova hi rifuwo ra [vona].” (Swivuriso 3:9) Xana hi komba moya lowu fanaka loko minkarhi leyi fanaka yi ri emahlweni ka hina?

Moya Lowu Amukeriwaka I Vumbhoni namuntlha

Psalma 110 yi komba leswaku ku ta va ni swikombiso swo tala leswi kombaka moya lowu fanaka lowunene wa magandzelelo ya ku swi rhandza emasikwini ya makumu ya mafambiselo lawa ya swilo laha vunyingi bya vanhu byi tsakelaka ku “mina” ntsena. Eka ndzimana 3 hi byeriwe leswaku, endzhaku ka loko Mesiya a teke vuhosi eMfun’weni hi 1914, vanhu va Xikwembu a va ‘ta va va mafundza’ ni leswaku lava va endlaka tano a va ta tala ku fana ni “mbera.” Xana leswi swi tikombe ku ri ntiyiso?

Hi April 1881 Xihondzo xo Rindza xa Xinghezi xi gandlise xikombelo xa vachumayeri va 1 000 xa ku nghenela ntirho wa nkarhi hinkwawo wo chumayela. Nkandziyiso wa May 1881 wu kandziyise leswaku lava va nghenelaka ntirho lowu va fanele va va lava “tirhelaka tihakelo ta le tilweni.” Hi malembe ya mune, ku tlula 300 va xi amukerile—leswi a swi xiyeka hikwalaho ka nhlayo leyintsongo ya Vakriste lava tinyiketeke lava hlanganyeleke ni Sosayiti ya Watch Tower enkarhini wolowo.

Moya lowu wu fanaka wu hambeta wu ri vumbhoni namuntlha. Hi xikombiso, hi 1986 a ku ri ni maphayona (vatirheli va nkarhi hinkwawo) va 391 294 lava vikeke, hi xiringaniso n’hweti na n’hweti. Koloko a ku ri ku andza ka tiphesente ta 21,2 kumbe 68 473 ku tlula lembe leri hundzeke ra kona! Hambi swi ri tano, moya lowu wa ku swi rhandza a wu hikiwanga eka lava va swi kotaka ku heta nkarhi wa vona hinkwawo entirhweni wo chumayela.a

Vo tala, hi vutihlamuleri byin’wana bya Matsalwa—byo tanihi ku khathalela ndyangu, ku khathalela vatswari lava lamaleke kumbe lava dyuhaleke—ni lava rihanyo ra vona ri nga va pfumeleriki ku hlanganyela evutirhelini bya nkarhi hinkwawo bya Vukriste, nakambe va komba moya lowu wu fanaka wa magandzelo ya ku tirhandzela lama tsakisaka eka Yehova. Leswi swi va vumbhoni loko munhu a xiya leswaku vunyingi bya ntirho wo chumayela wa Mfumo ematikweni yo tala hakanyingi wu endliwile hi vatirheli lava a va fanele ku heta xiphemu lexikulu xa nkarhi wa vona va tirha emintirhweni yin’wana yo tihanyisa kumbe ku khathalela mindzhwalo ya ndyangu kumbe vutihlamuleri byin’wana bya Matsalwa. Hakunene i xikombiso lexi bumabumelekaka xa moya lowu Yehova a wu katekisaka.

Ku Kombisa Moya Lowunene eTindhawini Tin’wana Ta Vutomi

Tanihi le sikwini ra Muxe na Ezekiyasi, minkarhi yo komba moya wa ku swi rhandza ya tihumelerisa namuntlha loko mabandlha ya le kusuhi ya aka Holo ya Mfumo kumbe miako yin’wana leyi fanaka. Xana moya lowu fanaka i vumbhoni etimhakeni to tano? Ina, hakunene hi wona!

Leswi swi kombisiwile hi ku hlawuleka eka endlelo ra sweswinyana ra ku akiwa ka Tiholo ta Mfumo hakanyingi loku vuriwaka miako ya xihatla ya Tiholo ta Mfumo. Magidi yo tala ya Timbhoni ya hlangana kun’we ivi ya tirha ku sukela hi Mugqivela nimixo ku fikela hi Sonto nimadyambu—van’wana va tirha vusiku hinkwabyo—ku hetisisa leswi maphepha-hungu ya swi vuleke “singita ra mahelo-vhiki.” A ku nga ri nchumu kambe xiphepherhele xa khonkhriti xo tala hi Ravuntlhanu, Holo ya Mfumo leyi hetiweke yi tirhiseriwe nhlangano hi Sonto nimadyambulb

Hambi yi ri minkarhi leyikulu yo kombisa moya wa ku swi rhandza ya tikomba mayelana ni ku akiwa ka miako ya rhavi ematikweni yo hambana-hambana. Mpimo wa ntirho wo tinyiketa hi ku helela, lowu endleke leswaku ku va ni ntirho lowu endliweke eka miako leyi yo hambana-hambana wa hlamarisa. Ku engetela eka minyikelo ya vatirhi, kavula, ku na minyikelo ya swa timali leyi endlaka leswaku swi koteka ku xava switirho leswi lavekaka. Hakanyingi, Timbhoni hi ntumbuluko ti ta nyikela swilo leswi lavekaka leswi hungutaka nxavo wa muako swinene.

Xikombiso xa leswi xi humelele enkarhini wa muako wa rhavi lerintshwa eSydney, Australia. Kwalaho, vamakwerhu lava tshamaka en’walungu-mpfungwe wa Queensland va lunghiselerile ivi va rhumela emuakweni mindzhwalo ya swilorana swa mune ya timhandzi leti nga vaka ta nxavo wo sukela eka R85 000 ku ya eka R100 000! Enkarhini wa ku akiwa ka rhavi, Timbhoni leti tateke bazi ti fambe mpfhuka wo ya fika eVupela-dyambu bya Australia, tikhilomitara ta 4 000 hi vukule, ku ya tirha ntirho wo tirhandzela hi mavhiki ya mune hi nkarhi wun’we. Va nga ri vangani va vatirhi lava nga ni vutshila hi ku tirhandzela va tirhe emuakweni hi tin’hweti to tala naswona ku ringana lembe kumbe ku tlula. Leswi hakunene a ku ri xikombiso xa moya lowu fanaka lowu Yehova a wu katekiseke hi xitalo hi malembe xidzana lama hundzeke naswona sweswo hakanyingi swi phindhiwile namuntlha ematikweni man’wana.

Minkarhi leyi engetelekeke yo komba moya wa ku swi rhandza yi tihumelerise loko Timbhoni ti hlengeletana etinhlengeletanweni na le mintsombanweni. Nhlengeletano yin’wana ni yin’wana yo tano yi lava vatirhi vo tirhandzela vo tala, hakanyingi hi tin’hweti emahlweni ka xiendlakalo, ku tiyiseka leswaku xin’wana ni xin’wana xi ta famba kahle ni ku hleleka swinene. Kutani loko yi kala yi sungula, minkarhi yin’wana yin’we eka mune wa Timbhoni leti vaka kona ti ta tinyikela hi ku tirhandzela ku pfuna ku endla mintirho yo tala leyi fanelaka leyi endlaka leswaku ntsombano wu tsakisa naswona wu humelela. Ntirho wu nga ha katsa ku phamela swakudya ni ku basisa. Ku nga ha va ntirho lowu nga xiyiwiki hi vunyingi bya lava nga kona. Kambe a wu vi lowu nga xiyekiki eka Yehova! U hakela lava hi ku swi rhandza va tinyikelaka ku endla leswi lavekaka. Xana u tshovela hakelo leyi tikombaka loko Vakriste va ‘tirhelana hi rirhandzu’ hi ku tirhandzela va nyikela mintirho ya vona hi minkarhi ya nhlengeletano? Xana u anakanye ku endla tano tanihi ndyangu?—Vagalatiya 5:13.

Loko miako leyi yo hlawuleka yi hi nyika minkarhi leyinene yo tinyikela hi moya lowu wa ku swi rhandza, ku na minkarhi yin’wana yo tala yo kombisa moya lowu fanaka siku na siku ni vhiki na vhiki. Hi xikombiso, loko Holo ya Mfumo yi akiwile, xana u hlanganyela hi xitalo eku yi basiseni ni ku yi hlayisa? U seketela ku tirha ka yona hi ku endla minyikelo ya swa timali tanihi loko Yehova a ku katekisa enyameni? Xana u seketela ntirho wo chumayela etikweni ra ka n’wina hi ku endla minyikelo eka hofisi ya rhavi ra ka n’wina? Naswona xa nkoka ngopfu, nkarhi na nkarhi u hlanganyela entirhweni wo chumayela mahungu lamanene ni ku endla vadyondzisiwa va vanhu endhawini ya ka n’wina? Ku hava lexi hakunene xi nga sivaka ku hlanganyela ka munhu hi xiyexe entirhweni lowu, lowu Yesu a wu kombiseke tanihi ntirho wa nkoka swinene lowu faneleke ku endliwa enkarhini wa sweswi, ku nga si fika makumu ya mafambiselo lawa.—Matewu 24:14; 28:19, 20; Mintirho 1:8.

Hinkwavo lava hlakulelaka moya lowu Yehova a wu katekisaka hi laha ku fuweke va kume ku ri ntiyiso leswaku Yehova ‘a nga na mona, a nga ka a nga rivali ntirho wa vona ni rirhandzu leri va ri kombiseke hikwalaho ka vito ra yena.’ Na wena u nga swi kota, hi ku kombisa moya lowu wa magandzelo ya ku swi rhandza, u komba leswaku “mikateko ya Yehova—yi fuwisa munhu, a nga ṅwi engeteli mikaralo.”—Vaheveru 6:10; Swivuriso 10:22.

[Tinhlamuselo ta le hansi]