Va Endle Ku Rhandza Ka Yehovha

Minyikelo Ya Ku Tirhandzela Ya Ku Yisa Vugandzeri Byo Tenga eMahlweni

VAISRAYELE a va ri timbhoni to tivonela hi mahlo eka matimba yo ponisa ya Yehovha. Va vone mati ya Lwandle ro Tshwuka ma pfuleka hi hlori, ma va pfumelela ku tsemakanya emisaveni leyi omeke kutani va balekela vuthu ra Vaegipta. Loko va ri ekulenyana eka tlhelo lerin’wana, va vone mati wolowo ma vuya ma hima valala va vona. Yehovha u byi ponisile vutomi bya vona!—Eksoda 14:21-31.

Lexi vavaka, Vaisrayele van’wana a va swi tekelanga enhlokweni leswi Xikwembu xa vona xi swi endleke. Loko Muxe a ha ri eNtshaveni ya Sinayi, va nyike Aroni swingwavila swa vona swa nsuku naswona va sindzisa leswaku a va endlela xifaniso leswaku va ta gandzela eka xona. Loko Muxe a vuya, u kume ntshungu lowu wa vaxandzuki wu ri karhi wu dya, wu nwa, wu cina ni ku nkhinsamela rhole ra nsuku! Hi nkongomiso wa Yehovha, kwalomu ka 3 000—kumbexana vahlohloteri lavakulu va ku xandzuka loku—va dlayiwile. Siku rero, vanhu va Xikwembu va dyondze dyondzo ya nkoka malunghana ni xilaveko xa ku tinyiketela eka Yehovha ntsena.—Eksoda 32:1-6, 19-29.

Endzhakunyana ka xiendlakalo lexi, Muxe u lunghekele ku sungula xileriso xa Xikwembu xo aka tabernakela, nxaxa wa vugandzeri lowu rhwalekaka. Muako lowu a wu ta lava switirho leswi durhaka ni vatirhi lava nga ni vuswikoti. Xana a swi ta kumiwa kwihi leswi? Naswona hi nga dyondza yini eka xiendlakalo lexi xa le Bibeleni?

Minyikelo Ya Switirho Ni Vutshila

Yehovha u lerise Vaisrayele hi ku tirhisa Muxe: “Hlengeletelani Yehovha munyikelo. Un’wana ni un’wana la nga ni mbilu leyi swi rhandzaka a a wu tise wu ri munyikelo wa Yehovha.” Munyikelo wa njhani? Swin’wana swa swilo leswi Muxe a swi longoloxeke a ku ri nsuku, silivere, koporo, harani, tinsimbi, madzovo, tihunyi, ni maribye ya risima.—Eksoda 35:5-9, NW.

Vaisrayele a va ri ni swilo swo tala swo nyikela ha swona. Tsundzuka, loko va suka aEgipta, a va teke swilo swa nsuku ni swa silivere, ku hlanganisa ni tinguvu to tala. Kunene a ‘va tekele Vaegipta swilo swa vona.’a (Eksoda 12:35, 36) Emahlweni ka leswi, Vaisrayele hi ku tirhandzela va teke swingwavila swa vona va endla xifaniso xa vugandzeri bya mavunwa. Xana sweswi a va ta nyikela hi ku hiseka ku fana ni le ku sunguleni loko va nyikela leswaku vugandzeri bya ntiyiso byi ya emahlweni?

Xiya leswaku Muxe a nga boxanga mpimo wa leswi munhu ha un’we a a ta swi humesa, naswona a nga tirhisanga marito yo va susumetela ku titwa va ri ni nandzu kumbe tingana leswaku a va khutaza ku nyikela. Ematshan’weni ya sweswo, u endle xikombelo ntsena eka “un’wana ni un’wana la nga ni mbilu leyi swi rhandzaka.” Entiyisweni Muxe a nga kalanga a vona xilaveko xo sindzisa vanhu va Xikwembu. A a tiyiseka leswaku un’wana ni un’wana u ta nyikela hi hinkwaswo leswi a nga swi kotaka.—Ringanisa 2 Vakorinto 8:10-12.

Hambiswiritano, muako a wu ta lava leswi tlulaka minyikelo ya nhundzu. Nakambe Yehovha u byele Vaisrayele: “Hinkwavo va timbilu to tlhariha exikarhi ka n’wina a va te va ta endla hinkwaswo leswi Yehovha a swi leriseke.” Kunene, tsima ro aka a ri lava vatirhi lava nga ni vutshila. Hakunene, “muxaka wun’wana ni wun’wana wa ntirho wa mavoko”—ku katsa ni vuvatli, ku fula nsimbi, ku sasekisa hi swin’wetsin’wetsi—a wu ta laveka ku heta ntirho lowu. Ina, Yehovha a a ta kongomisa vatirhi lava nga ni vuswikoti, naswona ku humelela ka muako lowu a ku ta endla leswaku ku dzunisiwa yena.—Eksoda 35:10, 30-35; 36:1, 2, NW.

Hi mahika Vaisrayele va angule kahle eka xirhambo xo nyikela hi rifuwo ra vona ni vutshila bya vona. Rungula ra Bibele ri ri: “Kutani va ta, un’wana ni un’wana loyi mbilu yakwe yi n’wi susumeteke, ni un’wana ni un’wana loyi moya wakwe wu n’wi hlohloteleke, va tisa munyikelo wa Yehovha wa ntirho wa ntsonga wa nhlangano ni vutirheli bya wona hinkwabyo ni wa tinguvu to kwetsima. Va hambeta va ta, vavanuna ni vavasati, un’wana ni un’wana la nga ni mbilu leyi swi rhandzaka.”—Eksoda 35:21, 22, NW.

Dyondzo Eka Hina

Namuntlha ntirho lowukulu wo chumayela mahungu lamanene ya Mfumo wa Xikwembu wu endliwa hi minyikelo ya ku tirhandzela. Ngopfu-ngopfu minyikelo ya kona i mali. Eka swiyimo swin’wana, vamakwerhu va xinuna ni va xisati va Vakreste va tirhisa rifuwo ra vona ra ntokoto va pfuna ku aka Tiholo ta Mfumo, Tiholo ta Tinhlengeletano ni miako ya marhavi. Kutani ku ni mintirho leyi endliwaka emakaya ya Bethele lama tlulaka dzana emisaveni hinkwayo, ntirho lowu katsaka vutshila byo hambana-hambana. Hinkwavo lava timbilu ta vona ti swi rhandzaka, lava endleke minyikelo yo tano va nga tiyiseka leswaku Yehovha a nga ka a nga ku rivali ku tikarhata ka vona!—Vaheveru 6:10.

Swa fana ni le ka xiphemu lexi un’wana ni un’wana wa hina a nga na xona evutirhelini bya hina bya Vukreste. Hinkwavo va khutaziwa leswaku va xava nkarhi leswaku va hiseka entirhweni wo chumayela. (Matewu 24:14; Vaefesa 5:15-17) Van’wana va endla leswi hi ku va vavuri va evhangeli va nkarhi hinkwawo, kumbe maphayona. Hikwalaho ka swiyimo, van’wana a va swi koti ku heta nkarhi wo tala evutirhelini tanihi maphayona. Hambiswiritano, na vona va tsakeriwa hi Yehovha. Ku fana ni minyikelo ya tabernakela, Yehovha a nga vekanga ntsengo lowu kongomeke lowu un’wana ni un’wana a faneleke ku nyikela ha wona. Kambe lexi a xi lavaka hi leswaku un’wana ni un’wana wa hina a n’wi tirhela hi mbilu hinkwayo, hi moya-xiviri hinkwawo, hi mianakanyo hinkwayo, ni hi matimba hinkwawo. (Marka 12:30) Loko hi endla sweswo, hi nga tiyiseka leswaku u ta hi hakela hikwalaho ka minyikelo yo tirhandzela leyi hi yi nyikelaka leswaku vugandzeri bya ntiyiso byi ya emahlweni.—Vaheveru 11:6.

[Nhlamuselo ya le hansi]