‘Tiendlele Vanghana Hi Rifuwo Leri Nga Lulamangiki’

“Tiendleleni maxaka hi xuma xa misava leyi . . . Loyi a tshembekeke eka leswitsongo, ni ka leswikulu ú ta tshembeka.”—LUKA 16:9, 10.

1. Xana Muxe ni vana va Israyele va n’wi dzunise njhani Yehovha endzhaku ka ku pona aEgipta?

KU PONISIWA hi hlori—i ntokoto lowu tiyisaka ripfumelo hakunene! Ku huma ka Israyele aEgipta a ku vangiwanga hi un’wana handle ka Yehovha, wa Matimba Hinkwawo. A swi hlamarisi leswi Muxe ni Vaisrayele va yimbeleleke va ku: “Yehova i matimba ya mina, ni risimu ra mina; hi yena Mukuṭuri wa mina. Hi šona Šikwembu ša nga; nḍi ta ši ḍunisa; i Šikwembu ša tatana, nḍi ta ši twarisa.”—Eksoda 15:1, 2; Deteronoma 29:2.

2. Xana vanhu va Yehovha va hume na yini aEgipta?

² Ntshunxeko lowu Vaisrayele a va ha ku wu kuma a wu hambana ngopfu ni xiyimo xa le Egipta! Sweswi a va kota ku gandzela Yehovha handle ko kavanyetiwa. Naswona a va humanga aEgipta va nga ri na nchumu. Muxe u ri: “E v̌ana v̌a Israel . . . v̌a lomba, e ka v̌a-Egipta e ŝibya ŝa silver, ni ŝa nsuku, ni tinguv̌u. Kambe Yehova a katekisa tiko e mahlweni ka v̌a-Egipta, leŝaku v̌a v̌a nyika. Kutani v̌a tekela v̌a-Egipta.” (Eksoda 12:35, 36) Kambe xana va ri tirhise njhani rifuwo leri ra Egipta? Xana ri endle leswaku va ‘tlakusela Yehovha ehenhla’? Xana hi dyondza yini eka xikombiso xa vona?—Ringanisa 1 Vakorinto 10:11.

‘Munyikelo Wa Yehovha’

3. Ndlela leyi Vaisrayele va tirhiseke nsuku ha yona evugandzerini bya mavunwa yi vange leswaku Yehovha a endla yini?

³ Enkarhini wa pfhumba ra Muxe ra masiku ya 40 eNtshaveni ya Sinayi a ya amukela swiletelo leswi Xikwembu a xi swi nyika Israyele, vanhu lava a va rindzile ehansi va sungule ku sihalala. Va susa swingwavila swa nsuku swa le tindleveni, va byela Aroni leswaku a va endlela xifaniso va ta xi gandzela. Aroni u va akele ni altari, naswona hi mixo wa siku leri tlhandlamaka, va endlele eka yona magandzelo. Xana ku tirhisiwa ka nsuku hi mukhuva lowu ku n’wi tsakisile Mukutsuri wa vona? Nikatsongo! Yehovha a byela Muxe a ku: “Nḍi ṭhike ŝeŝi, nḍi v̌a karihela, nḍi v̌a heta.” Yehovha u tshike tiko leri hikwalaho ka xikombelo xa Muxe ntsena, hambi leswi varhangeri lavo sihalala va dlayiweke hi khombo leri humaka eka Xikwembu.—Eksoda 32:1-6, 10-14, 30-35.

4. ‘Munyikelo wa Yehovha’ a ku ri yini, naswona a wu nyikeriwa hi vamani?

⁴ Endzhakunyana, Vaisrayele va kume nkarhi wo tirhisa rifuwo leri a va ri na rona hi ndlela leyi tsakiseke Yehovha. Va humese ‘munyikelo wa Yehovha.’a Nsuku, silivhere, koporo, voya bya muhlovo wa rihlaza ra tilo, swilo swa mivalavala, madzovo ya tinyimpfu, madzovo ya timbuti, ni murhi wa munga a swi ri swin’wana swa minhlengo yo aka ni ku sasela tabernakele. Mhaka leyi yi yisa nyingiso wa hina eka langutelo ra loyi a endlaka munyikelo. “Munhu uṅwana ni uṅwana l’a ŝi ranḍaka hi mbilu, o ta tisela Yehova e ku nyika ka yena.” (Eksoda 35:5-9) Vaisrayele va angule hi ndlela yo hlamarisa. Hikwalaho, tabernakele a yi ri muako wa “vuxongi ni nsaseko lowukulu,” hi ku ya hi marito ya xidyondzi xin’wana.

Minyikelo Ya Tempele

5, 6. Malunghana ni tempele, xana Davhida u ri tirhise njhani rifuwo rakwe, naswona van’wana va angurise ku yini?

⁵ Hambi leswi Hosi Solomoni wa Israyele a kongomiseke ku akiwa ka yindlu leyi tiyeke ya vugandzeri bya Yehovha, Davhida, tata wakwe, a a endle malunghiselelo lamakulu ya yona. Davhida u hlengelete nsuku, silivhere, koporo, nsimbhi, timhandzi ni maribye yo tala ya risima. Davhida u byele vanhu vakwe a ku: “Hi ku ranḍa loku nḍi ranḍaka ha kona yindlu ya Šikwembu ša nga, leŝi nḍi nga na ŝona ŝa nsuku ni ŝa silver, le’ŝi nga ŝa mina kunene, nḍa ŝi nyika ŝi v̌a ŝa yindlu ya Šikwembu ša nga, e handle ka hikwaŝo leŝi nḍi ŝi hlengeleteleke yindlu ya v̌ukwetsimelo: ti ri titalenta ta 3 000 ta nsuku . . . ni titalenta ta 7 000 ta silver le’yi basisiweke, ku nameka e makhumbini ya tindlu.” Davhida u khutaze van’wana leswaku va hanana na vona. Va angule kahle ngopfu: nsuku, silivhere, koporo, nsimbhi ni maribye yo tala ya risima. Vanhu va “humeserile Yehova e mihlengo hi timbilu hikwato ta v̌ona.”—1 Tikronika 22:5; 29:1-9.

⁶ Hi minyikelo leyi ya ku tirhandzela, Vaisrayele va phofule ku tlangela loku enteke hi vugandzeri bya Yehovha. Davhida u khongele hi ku titsongahata a ku: “Nḍi mani šana, ni tiko ra nga i rihi šana, leŝaku hi tiv̌a ku humesa ŝilo leŝi?” Ha yini? “Hikuv̌a hikwaŝo ŝi huma ka wena, kutani leŝi hi ku humeselaka ŝona hi nyikiwile hi v̌oko ra wena. . . . Loko nḍi ri mina, nḍi humesile ŝilo leŝi hikwaŝo hi ku lulama ka mbilu ya nga.”—1 Tikronika 29:14, 17.

7. Hi yihi dyondzo ya xitsundzuxo leyi hi yi kumaka enkarhini wa Amosi?

⁷ Kambe tinxaka ta Israyele ti tsandzekile ku rhangisa vugandzeri bya Yehovha emianakanyweni ni le timbilwini ta tona. Hi lembe-xidzana ra vukaye B.C.E., Israyele la avaneke u ve ni nandzu wa ku honisa swilo swa moya. Malunghana ni mfumo wa le n’walungwini wa tinxaka ta khume ta Israyele, Yehovha u vule leswi hi Amosi: “Mi ni khombo ṅwina la’v̌a ṭakeke Sion, na ṅwina la’v̌a ṭhembeke nṭhav̌a ya Samaria!” U va hlamusele tanihi vanhu lava “seketele[ke] henhla ka ŝiṭhamo le’ŝi endliweke hi timhonḍo ta ndlopfu, v̌a tiolorile henhla ka masangu ya v̌ona, v̌a dya ŝinyimpfana ŝa ntlhambi, ni marole la’ma nonisiweke. V̌a nwa vinyo e mikambaneni.” Kambe rifuwo ra vona a ri nga ri nsirhelelo. Xikwembu xi tsundzuxile xi ku: “V̌a ya v̌ukhumbini, v̌a rangisiwile mahlweni ka hikwav̌o la’v̌a yisiwaka kona; kutani huwa ya la’v̌a tiololaka yi ta hela.” Hi 740 B.C.E., Israyele ri xanisiwe hi Asiriya. (Amosi 6:1, 4, 6, 7) Naswona hi nkarhi wa kona mfumo wa le dzongeni wa Yuda na wona wu rhandze swilo leswi vonakaka.—Yeremiya 5:26-29.

Matirhiselo Lamanene Ya Rifuwo eMinkarhini Ya Vukreste

8. Hi xihi xikombiso lexinene lexi Yosefa na Mariya va xi vekaka malunghana ni ku tirhisa rifuwo?

⁸ Kambe, vusiwana bya malandza ya Xikwembu eminkarhini leyi hundzeke a byi ma sivelanga ku kombisa ku hisekela ka wona vugandzeri bya ntiyiso. Anakanya hi Mariya na Yosefa. Hi ku landza xileriso xa Khezari Agosto, va fambe va ya etikweni ra rikwavo, eBetlehema. (Luka 2:4, 5) Yesu u fike a tswaleriwa kona. Endzhaku ka masiku ya 40, Yosefa na Mariya va ye etempeleni ya le Yerusalema va ya nyikela gandzelo leri a ri laveka ra ku basisiwa. Lexi kombisaka leswaku a va ri swisiwana, Mariya u nyikele hi swinyanyana swimbirhi leswitsongo. Yena na Yosefa a va tshikanga ku nyikela hi mhaka ya vusweti. Kambe, hi ku titsongahata va tirhise swilo switsongo leswi a va ri na swona.—Levhitika 12:8; Luka 2:22-24.

9-11. (a) Marito ya Yesu eka Matewu 22:21 ma nyika nkongomiso wihi malunghana ni matirhiselo ya mali? (b) Ha yini munyikelo lowutsongo wa noni wu nga vanga wa hava?

⁹ Endzhaku, Vafarisi ni valandzeri va Heroda va ringete ku kanganyisa Yesu, va ku: “U nga hi byela miehleketo ya wena emhakeni leyi: Xana swa fanela ku humesela Khezari endzuvo, kumbe a swi faneli ke?” Nhlamulo ya Yesu yi kombise ku twisisa ka yena. Loko a kombetela eka mali leyi a va n’wi nyike yona, Yesu u vutisile a ku: “Xifaniso lexi i xa mani ke? Ni vito leri i ra mani ke?” Va hlamula va ku: “I swa Khezari.” Hi vutlharhi u te: “Nyikani Khezari leswi nga swa Khezari, ni Xikwembu leswi nga swa Xikwembu.” (Matewu 22:17-21) Yesu a a swi tiva leswaku valawuri lava endleke mali a va langutele leswaku swibalo swi hakeriwa. Kambe hi sweswo u pfune valandzeri vakwe ni valala vakwe va lemuka leswaku Mukreste wa ntiyiso u tikarhatela ku nyika “Xikwembu leswi nga swa Xikwembu.” Leswi swi katsa ku tirhisa swilo swa hina leswi vonakaka hi laha ku faneleke.

¹⁰ Mhaka leyi Yesu a yi voneke etempeleni yi kombisa leswi. A ha ku sandza vatsari lava nga ni makwanga lava ‘dyelelaka tindlu ta tinoni.’ Luka wa vika: “Loko Yesu a tlakusa mahlo, a vona swifumi leswi hoxaka tinyiko ta swona exibyeni xa nhlengo wa Tempele. [Yesu] a vona ni noni leyi a yi ri xisiwana, yi hoxa swimalana swimbirhi leswi lavaka ku ringana sente ntsena. Kutani a ku: ‘Hakunene ndzi ri ka n’wina: Noni leyi ya xisiwana yi humesile ku tlula hinkwavo; hikuva vanhu lava hinkwavo va humesile tinyiko leti va ti pambuleke exumeni xa vona lexo tala, kasi wansati loyi u humesile swa vusiwana bya yena, swi nga hinkwaswo leswi a a ta hanya ha swona.’” (Luka 20:46, 47; 21:1-4) Vanhu van’wana va vule leswaku tempele a yi sasekisiwe hi maribye ya risima. Yesu u hlamule a ku: “Loko swi ri leswi mi swi vonaka, ku ta ta masiku lawa ku nga ta ka ku nga ha sali ribye ehenhla ka ribye rin’wana; hinkwawo ma ta hindzimuxiwa.” (Luka 21:5, 6) Xana nyiko yoleyo leyitsongo ya noni a yi ri ya hava? A swi tano nikatsongo. Yi seketele lunghiselelo leri Yehovha a ri vekeke enkarhini wolowo.

¹¹ Yesu u byele valandzeri vakwe va ntiyiso a ku: “A ku na nandza loyi a nga kotaka ku tirhela tihosi timbirhi, hikuva ú ta venga yin’wana, a rhandza leyin’wana; kumbe ú ta namarhela yin’wana a fularhela leyin’wana. Mi nge koti ku tirhela Xikwembu ni rifuwo ra misava leyi.” (Luka 16:13) Xisweswo, xana hi nga ku kombisa njhani ku ringanisela loku faneleke eku tirhiseni ka xuma xa hina?

Malandza Yo Tshembeka

12-14. (a) Vakreste i malandza ya rifuwo rihi? (b) Hi tihi tindlela to hlawuleka leti vanhu va Yehovha namuntlha va kombisaka ku va malandza yo tshembeka ha tona? (c) Mali yo seketela ntirho wa Xikwembu namuntlha yi huma kwihi?

¹² Loko hi nyiketela vutomi bya hina eka Yehovha, kahle-kahle hi vula leswaku xin’wana ni xin’wana lexi hi nga na xona, rifuwo ra hina hinkwaro, i swa yena. Kutani, xana hi fanele hi swi tirhisa njhani leswi hi nga na swona? Loko a bula hi ntirho wa Vukreste evandlheni, Makwerhu C. T. Russell, muungameri wo sungula wa Sosayiti ya Watch Tower, u tsale a ku: “Un’wana ni un’wana u fanele ku tilanguta tanihi nandza loyi a hlawuriweke hi Hosi leswaku a endla swilo hi nkarhi wa yona n’wini, a xiya ndlela leyi a khumbaka van’wana ha yona, malunghana ni mali ni swin’wana, naswona un’wana ni un’wana u fanele ku lava ku tirhisa titalenta leti hi ku ya hi vuswikoti bya yena hinkwabyo, leswaku ku dzunisiwa N’wini.”—The New Creation, tluka 345.

¹³ Vakorinto vo Sungula 4:2 yi ri: “Leswi lavekaka eka valanguteri hileswaku munhu a kumeka a ri la tshembekeke.” Tanihi nhlengeletano ya matiko hinkwawo, Timbhoni ta Yehovha ti lwela ku namarhela nhlamuselo yoleyo, ti tirhisa nkarhi wa tona wo tala hi laha ti nga kotaka ha kona evutirhelini bya Vukreste, ti hlakulela vuswikoti bya tona byo dyondzisa hi vukheta. Ku engetela kwalaho, mintlawa ya vatirhi vo tirhandzela leyi kongomisiwaka hi Tikomiti to Aka ta Swifundzha yi nyikela nkarhi wa yona, matimba, ni vutivi bya yona hi rirhandzu leswaku yi aka tiholo to saseka to hlanganela eka tona leti tirhiseriwaka vugandzeri. Yehovha u tsakisiwa ngopfu hi hinkwaswo leswi.

¹⁴ Xana mali yo seketela tsima leri lerikulu ro dyondzisa ni ntirho wo aka yi huma kwihi? Yi huma eka vanhu va timbilu letinene hi laha a swi ri ha kona emasikwini ya ku akiwa ka tabernakele. Xana hina vini, ha hoxa xandla eka leswi? Xana ndlela leyi hi tirhisaka mali ya hina ha yona yi kombisa leswaku ntirho wa Yehovha i wa nkoka swinene eka hina? Etimhakeni ta mali, onge hi nga va malandza yo tshembeka.

Ntila Wa Ku Hanana

15, 16. (a) Xana Vakreste va le nkarhini wa Pawulo va ku kombise njhani ku hanana? (b) Hi fanele hi ri languta njhani bulo leri ra hina?

¹⁵ Muapostola Pawulo u tsale malunghana ni moya wa ku hanana wa Vakreste va le Makedoniya ni le Akaya. (Varhoma 15:26) Hambi leswi a va swerile, va endle nhlengo wo pfuna vamakwavo hi mbilu yo basa. Pawulo u khutaze Vakreste va le Korinto leswaku na vona va hanana, va nyikela hi swilo leswi va nga na swona leswaku ku pfuniwa lava pfumalaka. A nga kona loyi a nga vaka ni mfanelo yo hehla Pawulo a ku wa va dyelela. U tsale a ku: “Loyi a byalaka switsongo, ú ta tshovela switsongo; kambe loyi a byalaka swo tala, ú ta tshovela swo tala. Un’wana ni un’wana a a nyike hilaha a pimaniseke hakona embilwini ya yena, a humesa hi ku ntshunxeka, ku nga ri hi ku vilela, hikuva Xikwembu xi rhandza loyi a nyikaka a tsakile.”—2 Vakorinto 8:1-3, 14; 9:5-7, 13.

¹⁶ Minyikelo ya ku hanana leyi vamakwerhu ni vanhu lava tsakelaka va yi endlelaka ntirho wa Mfumo wa misava hinkwayo namuntlha yi kombisa ndlela leyi va ri tekelaka ehenhla ha yona lunghelo leri. Kambe, hi laha Pawulo a tsundzuxeke Vakorinto ha kona, i swinene leswaku hi teka bulo leri tanihi xitsundzuxo.

17. Hi rihi lunghiselelo ra ku nyika leri Pawulo a ri khutazeke, naswona xana leswi swi nga tirhisiwa namuntlha?

¹⁷ Pawulo u khutaze vamakwavo leswaku va landzela lunghiselelo ro karhi eku nyikeni ka vona. U te: “Hi siku ro sungula ra vhiki, un’wana ni un’wana wa n’wina a a veke swin’wana hi tlhelo, eka leswi a swi bindzuriseke.” (1 Vakorinto 16:1, 2) Sweswo swi nga va xikombiso xa ku nyika eka hina ni le ka vana va hina, ku nga khathariseki leswaku hi swi endla evandlheni kumbe hi ku kongoma eka hofisi ya rhavi ra Sosayiti ya Watch Tower leyi nga ekusuhi. Mpatswa wun’wana wa varhumiwa lowu averiweke ku ya chumayela etikweni ra le Vuxeni bya Afrika wu rhambe vanhu lava tsakelaka leswaku va ta edyondzweni ya Bibele. Eku heleni ka nhlangano wo sungula, varhumiwa, hi vutlharhi, va hoxe malinyana ebokisini leri tsariweke, “Minyikelo ya ntirho wa Mfumo.” Van’wana lava a va ri kona va endle sweswo na vona. Endzhakunyana, loko vanhu lava lavantshwa se va ri evandlheni ra Vukreste, mulanguteri wa xifundzha loko a endzile u bumabumele minyikelo ya vona leyi va yaka emahlweni va yi endla.—Pisalema 50:10, 14, 23.

18. Hi nga va pfuna njhani vamakwerhu lava xanisekaka?

¹⁸ Nakambe hi ni lunghelo ra ku tirhisa rifuwo ra hina ku pfuna lava hlaseriweke hi timhangu ta ntumbuluko ni lava hanyaka etindhawini leti nga ni nyimpi. A hi tsakile swinene loko hi hlaya hi mphalalo lowu rhumeriweke eYuropa Vuxa tanihi leswi mpfilumpfilu wa ikhonomi ni wa tipolitiki wu funengeteke tiko rero! Minyikelo ya swilo ni ya mali yi kombise ku hanana ni vun’we bya vamakwerhu eka Vakreste lava pfumalaka.b—2 Vakorinto 8:13, 14.

19. Hi swihi swilo leswinene leswi hi nga swi endlelaka lava nga entirhweni wa nkarhi hinkwawo?

¹⁹ Kunene ha wu tlangela swinene ntirho wa vamakwerhu lava nga entirhweni wa nkarhi hinkwawo, tanihi maphayona, valanguteri lava famba-fambaka, varhumiwa ni lava pfunaka eBethele, a swi tano? Loko swiyimo swa hina swi hi pfumelela, onge hi nga va pfuna hi swilo leswi vonakaka hi ku kongoma. Hi xikombiso, loko mulanguteri wa xifundzha a endzela vandlha ra ka n’wina, mi nga ha kota ku n’wi lunghiselela byetlelo, swakudya, kumbe mi n’wi pfuna hi timali to famba. Tata wa hina wa le tilweni loyi a lavaka malandza yakwe ma hlayiseka, u ku xiya hinkwako ku hanana ko tano. (Pisalema 37:25) Emalembeni lama hundzeke makwerhu un’wana loyi a koteke ku lunghiselela swakudya swo khomisa nyoka ntsena u rhambe mulanguteri la famba-fambaka ni nsati wakwe va ya ekaya rakwe. Loko mpatswa lowu wu suka wu ya entirhweni wa nsimu wa nimadyambu, makwerhu loyi u tamerise vaendzi vakwe mvhilopho. Endzeni ka yona a ku ri ni mali (yo ringana ni rhandi) swin’we ni xiphephana lexi a xi tsaleke hi voko lexi nge: “Mi ta nwa hi yona tiya kumbe mi chela thonsi ra petirolo.” Mawaku ku tlangela lokunene loku kombisiweke hi ndlela leyi ya ku titsongahata!

20. Hi rihi lunghelo ni vutihlamuleri leswi hi nga fanelangiki hi swi honisa?

²⁰ Hi tlhelo ra moya, vanhu va Yehovha va katekile! Hi tsakela minkhuvo ya moya etinhlengeletanweni ni le mintsombanweni ya hina, laha hi amukelaka tibuku letintshwa, dyondzo yo saseka ni ndzayo leyi tirhaka. Hi timbilu leti khapaka ku nkhensa hikwalaho ka mikateko yerhu ya moya, a hi rivali lunghelo ni vutihlamuleri bya hina bya ku nyikela mali leyi tirhiseriwaka ku yisa emahlweni swilaveko swa Mfumo wa Xikwembu emisaveni hinkwayo.

‘Endlani Vanghana Hi Rifuwo Leri Nga Lulamangiki’

21, 22. Ku ta endleka yini ku nga ri khale hi ‘rifuwo leri nga lulamangiki,’ leswi lavaka leswaku hi endla yini sweswi?

²¹ Entiyisweni, ti tele tindlela leti hi nga kombisaka ha tona leswaku vugandzeri bya Yehovha byi va emahlweni evuton’wini bya hina, naswona ndlela ya nkoka swinene yi katsa ku yingisa xitsundzuxo xa Yesu: “Tiendleleni maxaka hi xuma xa misava leyi, leswaku loko mi tshuka mi pfumarile, va mi amukela emintsongeni leyi nga heriki.”—Luka 16:9.

²² Xiya leswaku Yesu u vulavule hi ku pfumaleka ka rifuwo leri nga lulamangiki. Ina, ri ta fika siku leri mali ya mafambiselo lawa yi nga ta ka yi nga ha pfuni nchumu. Ezekiyele u profetile a ku: “V̌a ta tšukumeta silver ya v̌ona e miṭenḍeleni, ni nsuku wa v̌ona wu ta v̌a tšhyaka e ka v̌ona, kasi silver ni nsuku a ŝi nga koti ku v̌a ponisa e sikwini ra v̌ukari bya Yehova.” (Ezekiyele 7:19) Ku kondza ku endleka leswi, hi fanele hi va ni vutlharhi ni ku twisisa endleleni leyi hi swi tirhisaka ha yona swilo swa hina leswi vonakaka. Xisweswo a hi nge tisoli hi ku tsandzeka ku yingisa xitsundzuxo xa Yesu lexi nge: “Loko mi nga tshembekanga exumeni xa misava leyi, i mani la nga ta mi tshemba eka xuma lexi nga xa xiviri xana? . . . Mi nge koti ku tirhela Xikwembu ni rifuwo ra misava leyi.”—Luka 16:11-13.

23. I yini leswi hi faneleke ku swi tirhisa hi vutlharhi, naswona hakelo ya hina yi ta va yihi?

²³ Kutani, onge hinkwerhu ka hina hi nga yingisa switsundzuxo leswi hi ku tshembeka, hi rhangisa vugandzeri bya Yehovha evuton’wini bya hina ni ku tirhisa swilo swa hina hinkwaswo hi vutlharhi. Hi ndlela yoleyo hi nga hlayisa vunghana bya hina na Yehovha na Yesu, lava tshembisaka leswaku loko mali yi nga hi pfuni va ta hi amukela “emintsongeni leyi nga heriki,” hi ri ni ntshembo wa vutomi lebyi nga heriki eMfun’weni wa le tilweni kumbe emisaveni ya paradeyisi.—Luka 16:9.

[Tinhlamuselo ta le hansi]

Wa Tsundzuka Xana?

◻ Xana Vaisrayele va angurise ku yini eka xirhambo xa Yehovha xo nyikela eku akiweni ka tabernakele?

◻ Ha yini munyikelo wa noni wu nga vanga wa hava?

◻ Hi byihi vutihlamuleri lebyi Vakreste va nga na byona eka ndlela leyi va tirhisaka rifuwo ra vona ha yona?

◻ Hi nga ku papalata njhani ku tisola hi ndlela leyi hi tirhisaka mali ha yona?

[Xifaniso lexi nga eka tluka 15]

Munyikelo wa noni, hambi leswi a wu ri wutsongo a wu nga ri wa hava

[Swifaniso leswi nga eka tluka 16, 17]

Minyikelo ya hina yi seketela ntirho wa Mfumo wa misava hinkwayo