Ku Tshovela Hi Mpimo Wa Matshalatshala Ya Munhu Hi Xiyexe
1 Yehova Xikwembu u kombise rirhandzu ra yena eka vanhu hi tindlela to tala. Yesu u kombise rirhandzu lerikulu ra Xikwembu, hi ku kombetela eka ntshungu lowu hlengeletaneke leswaku Xikwembu xi “tsuvukisa dyambu ra [xo]na ehenhla ka lavo biha ni lavanene, [xi] nisa mpfula ehenhla ka lavo lulama ni lavo homboloka.” (Mat. 5:43-48) Eka xiendlakalo xin’wana, Yesu u kombise xikombiso lexi xiyekaka swonghasi xa rirhandzu ra Tata wa yena—gandzelo ra N’wana wa yena la nga swakwe, loyi Xikwembu xi n’wi nyikeleke ku ta hi ponisa. (Yoh. 3:16) Yesu u lerise vayingiseri va yena ku amukela rirhandzu ra Yehova hi ntsako. Xana ha ringeta ku endla sweswo?
2 Leswaku hina hi ta kombisa ku tlangela loku taleke naswona hi kuma mimbuyelo leyi nga heriki eka rirhandzu ra Yehova, hi fanele ku n’wi tiva. (Yoh. 17:3) Hi lava ndzayo ni nkongomiso wa ndlela leyi hi nga n’wi tirhelaka ha yona hi laha ku amukelekaka. Yehova u kombise nkhathalelo wa yena wa rirhandzu hi ku hi nyika Rito ra yena leri huhuteriweke, Bibele, na hi ku tlakusa nhlengeletano ya yena leyinene, leyi ha yona hi amukelaka ndzayo ni ndzetelo. (Mat. 24:45-47; 2 Tim. 3:16, 17) Tanihi vanhu va Yehova lava tinyiketeleke, hi dyondzisiwe hi ndlela ya yena. Kambe xana hi kombisa leswaku hi tlangela rirhandzu ra Yehova hi matshalatshala ya munhu hi xiyexe? Xana hi yingisa ndzayo ya yena leswaku hi n’wi tsakisa ivi hi vuyeriwa hi hexe? (Esa. 48:17; Yak. 1:22) Muapostola Pawulo u tsarile eka 1 Vakorinto 3:8: “Loyi a byalaka ni loyi a cheletaka va ringana, hambileswi un’wana ni un’wana a nga ta amukela hakelo ya yena hi mpimo wa ntirho wa yena.”
3 Ina, hi fanele ku lwela ku endla leswi Xikwembu xi lavaka leswaku hi swi endla. A hi un’wana ni un’wana la endlaka nhluvuko emoyeni hi goza leri fanaka. Ku na swivumbeko swo tala leswi nga tirhaka eka nhluvuko wa hina naswona a ku ta va ku nga ri vutlhari ku endla ku ringanisa loku hetaka matimba. Hambi swi ri tano, xa nkoka swinene i matshalatshala ya munhu ha un’we-un’we lawa hi ma endlaka. Hi nga endla yini leswaku hi tshinela ekusuhi ni nhlengeletano? Xana ti kona tindhawu leti hi nga antswisaka eka tona hi ku amukela vutihlamuleri bya munhu hi xiyexe tanihi Vakriste? Swi lava matshalatshala wahi ku nyikela nseketelo lowu antswaka eka mintirho ya bandlha? Xana ku ni tinhla leti hi faneleke ku ti tirhisa hi ndlela ya swiletelo leswi nhlengeletano yi hi nyikaka swona?—1 Tim. 4:16.
KU TEKELELA LAVO TSHEMBEKA
4 Mahungu lamanene ya Mfumo a ma ri karhi ma chumayeriwa hi makume ya malembe hi vamakwerhu vo tshembeka vaxinuna ni vaxisati. Vanhu lava vo tshembeka, tanihi Pawulo, va faneriwa hi ku tekeleriwa. (1 Vakor. 11:1) Va amukele rirhandzu ra Xikwembu naswona va tshovele mimbuyelo yo tala hikwalaho ka ntirho wa vona wo nonon’hwa ni matshalatshala ya vona ya munhu hi xiyexe yo landzela ndzayo ya Bibele. Va vumba ntlawa lowu tiyeke wa vatirhi lava chivirikaka ebandlheni, lava nga honisiki vutihlamuleri bya vona bya munhu hi xiyexe. Hi nga yi vona mihandzu ya mintirho ya vona ha un’we-un’we.—Varhoma 1:13; 2 Vakor. 3:1-3.
5 Sweswi, makume ya magidi ya lavantshwa ma khitikanela enhlengeletanweni lembe rin’wana ni rin’wana. (Esa. 60:8) Nakambe na vona va hisekela ku tirhela ku va vanhu lava kuleke kahle emoyeni, naswona ku chivirika ka vona entirhweni wo chumayela ku faneriwa hi ku tlangeriwa. Va pfuneka hi ku vona ndlela leyi Yehova a katekisaka lava tirhaka hi ku hiseka entirhweni wa yena. Xikombiso xa vamakwerhu vaxinuna ni vaxisati lava vupfeke xi pfuna lavantshwa ku twisisa leswaku lowu a hi wona nkarhi wo kokela endzhaku kumbe wo karhala entirhweni wa hina eka Xikwembu. Loko hi ri vantshwa kumbe vahuweleri lava nga ni ntokoto, xana hi ya emahlweni hi kula emoyeni, hi amukela vutihlamuleri bya hina bya munhu hi xiyexe bya Vukriste ni ku tirhisa malunghiselelo hinkwawo ya le tilweni?
KU TIRHISA LESWI HI SWI DYONDZAKA
6 Le ndzhaku, Yakobo a nga si tsala leswaku hi fanele ku va ‘vaendli va ntirho,’ Muxe u byele Vayuda a ku: ‘Mi fanele ku tirhisa marito lawa.’ (Yak. 1:25; Deut. 11:18) Kutani ke, vutivi hi byoxe a byi nga anelanga. Vayuda a va fanela ku tirhisa marito ya Nawu hi ku yingisa Yehova. Nsinya lowu wa nawu wa xisekelo a wu cinci. Yesu, N’wana wa Xikwembu, hakunene a wu tiva nkoka wa ku yingisa. (Yoh. 8:28) Eka Matewu 7:24 u te: “Un’wana ni un’wana la yingisaka marito ya mina lawa, a va a famba ha wona, ú ta fana ni wanuna lowo tlhariha.”
7 Xana ha swi tirhisa leswi hi swi dyondzaka eminhlanganweni ya xifundza? Xana ha swi twisisa leswaku ha yini swi ri swa nkoka enkarhini lowu ku tshama hi xalamukile ni ku tikhoma? Xana ha yi xalamukela minhlaselo ni mintlhamu ya vukanganyisi leyi vekiwaka hi Diyavulosi? Xana ha yi tlangela ndzayo ni switsundzuxo leswi hi nyikiwaka swona hi ku phindha-pindha hi nhlengeletano mayelana ni xilaveko xo basa emahanyelweni ni le moyeni ebandlheni? Xana hina ha un’we-un’we hi tirhisa leswi hi swi twaka hi mpimo wihi?—Yak. 1:23-25.
8 Nongonoko wa nhlengeletano ya siku ro hlawuleka ya sweswinyana wu tshikilela xilaveko xa hina xo va lava hlawulekeke, tanihi leswi Yehova a hlawulekeke. (1 Pet. 1:14-16) Ku hlawuleka swi vula ku basa kumbe ku tenga, ku kwetsima ka vukhongeri. Ku kombisa xiyimo lexi vekeriweke etlhelweni xa ntirho wa Xikwembu. Hi nyikiwe vutirheli bya mahungu lamanene. Hikwalaho ke, hi fanele hi basa emoyeni, emahanyelweni ni le nyameni leswaku hi fanelekela ku rhwala Rito ro kwetsima ra ntiyiso. Leswi swi lava leswaku hi nyikela nyingiso wo tlula lowu hi toloveleke ku tinyika wona. (Vahev. 2:1) Loko hi endla tano, hi ta tshovela mikateko hi mpimo wa matshalatshala ya hina ya munhu hi xiyexe.
KU PFUNIWA HI DYONDZO YA MUNHU HI XIYEXE
9 Dyondzo ya munhu hi xiyexe yi hi pfuna ku aka ripfumelo leri tiyeke, naswona yi kurisa ku tlangela ka hina ntiyiso. Yi hi nyika ntshembo ni ku hi hlomisela ku vulavula hi xivindzi. Yi hi nyika vutlhari ni ku twisisa naswona yi hi pfuna ku ambala vumunhu lebyintshwa. (Vakol. 1:9-11) Hambi swi ri tano, dyondzo leyi tswalaka mihandzu yi teka nkarhi ni matshalatshala, naswona a ku na ndlela yo tsemakanya eku kumeni ka vutivi lebyi kongomeke ni vuenti bya moya. Leswi hi swi dyondzaka hi leswi hi nga ta swi twisisa.—2 Vakor. 9:6, 7; Vagal. 6:7.
10 Xana hi veka etlhelo nkarhi lowu ringaneke wo lunghiselela minhlangano ya bandlha vhiki na vhiki? Leyi i ndlela yin’wana leyi hi nga kombisaka ku tlangela swakudya swa moya leswi Yehova a hi nyikaka swona hi ku tirhisa nandza lowo tshembeka ni wa vutlhari. Ku lunghiselela loku faneleke ka minhlangano ku hi pfuna leswaku hi namarhela eka xiyimiso xo hlaya ni ku dyondza Rito ra Xikwembu. Xana ha wu veka nkarhi etlhelo wo endla ku hlaya ka hina Bibele vhiki rin’wana ni rin’wana hi laha ku vekiweke ha kona eka nongonoko wa Xikolo xa Vutirheli bya le Tilweni? Siku rin’wana ni rin’wana swi teka timinete ti nga ri tingani ku hlaya ni ku anakanyisisa hi mhaka. Nhlangano wa Ntirho wu hi pfuna ku hambeta hi xalamukela tindlela leti hi nga endlaka vutirheli bya hina bya le rivaleni byi humelela ha tona. Xana ha lunghiselela, hi ehleketisisa hi ndlela leyi hi nga tirhisaka mhaka leyi evutirhelini hi vukheta ha yona? Naswona xana ha ya endla matshalatshala yo yi tirhisa hi ku hatlisa? Malunghiselelo lama kongomeke ma fanele ku endliwa leswaku ku lunghiseleriwa Dyondzo ya Xihondzo xo Rindza ni Dyondzo ya Buku ya Bandlha. Xana ha swi endla sweswo?
KU HLANGANYELA EMINHLANGANWENI
11 Hi nga vuyeriwa ngopfu eminhlanganweni loko hi hlanganyela eka yona. Ku lunghiselela minhlangano ivi hi endla matshalatshala yo hlanganyela ku hi endla hi tshama hi yingisela hi nkarhi wa minhlangano ivi ku swi endla swi hi olovela ku pfuneka eka tinhlamuselo ta van’wana. Vo tala va ha wu tsundzuka ntirho wa matimba lowu va wu endleke enhlamuselweni ya vona yo sungula enhlanganweni kumbe nkulumo ya vona ya xichudeni xo sungula eka Xikolo xa Vutirheli bya le Tilweni. Hambi loko ku chava lokukulu ku nga va ku herile, xana hi ya emahlweni hi tirha hi matimba eku endleni ka leswaku ku kula ka hina ka moya ku vonaka eka hinkwavo? (1 Tim. 4:15) Van’wana va vuyeriwa naswona va khutaziwa hi tinhlamuselo ta hina. Loko hi lunghiselele kahle, hi va hi dyondze mhaka leyi nga ta langutiwa eminhlanganweni, ku hlanganyela ka hina loku twisisekaka eka yona ku ta susumetela van’wana ku va ni rirhandzu ni mintirho leyinene.—Vahev. 10:23-25.
12 Tinhlamuselo ta hina a ti fanelanga ti leha ni ku nga twisiseki. Hi ntolovelo i swinene ku endla tinhlamuselo to koma leti hlamulaka swivutiso leswi tlakusiweke hi ku kongoma kumbe ti pfuna ku hlamusela ku tirhisiwa ka tsalwa. Loko hi lunghiselele kahle, hi ta swi kota ku hlamusela hi marito ya hina. Loko hi endla sweswo, mimbuyelo ya hina ni ya van’wana i yikulu swinene. Ha yini? Hikuva swi lava leswaku hi ehleketa hi leswi hi swi vulaka ivi hi hlamusela yinhla hi laha hi yi twisisaka ha kona. Leswi swi nga ha olovisela van’wana ku twisisa mhaka. Nakambe, swi ta hi pfuna ku tsundzuka rungula leri hi nga ta ri tirhisa nkarhi wun’wana.
BYALA HI RIRHANDZU ENSIN’WINI
13 Vutirheli bya hina bya Vukriste i ntirho wa rifuwo. (2 Vakor. 4:7) Xana u byi languta hi ndlela yoleyo? Hikwalaho ka vutirheli, hi na lunghelo ro kombisa ripfumelo ra hina eka van’wana. Yesu u vule leswaku nomu wu vulavula leswi mbilu yi taleke swona. (Luka 6:45) Matshalatshala ya munhu hi xiyexe lawa hi ma endlaka ka ha ri emahlweni leswaku hi hlanganyela hi xitalo evutirhelini bya nsimu ma hi pfuna ku tshovela mimbuyelo yo tala. Ku twisisa ka hina ntiyiso ka kurisiwa naswona hi kurisa vuswikoti lebyikulu byo tirhisa Bibele. Hi na ntsako wo tisela van’wana ntiyiso ni ku va pfuna ku dyondza hi ta Muvumbi wa vona Lonkulu. Hi yima tanihi timbhoni eka vunene bya ku fuma ni matimba ya Xikwembu. Ha tsaka hikuva ha swi tiva leswaku hi tsakisa Yehova, hi ku va hi endliwe hi fana na yena naswona hi endla ku rhandza ka yena.—Mat. 5:48.
14 Loko hi ku phindha-phindha, hi pima matshalatshala ya hina ya munhu hi xiyexe, vugandzeri bya hina eka Yehova a byi nge vi ntirho wo hetisa nawu. Sweswo swi vula yini? Swi vula leswaku a hi nge pfumali ku tsakela ku fambisana ni ku rhandza ka Xikwembu, hi endla ntirho wa xivumbeko ntsena eka yena kumbe mpimo wo karhi handle ka ku tinyiketela ni matshalatshala ya xiviri ya mbilu hinkwayo. Ntirho wa hina eka Yehova wu fanele wu va lowu heleleke. Hi na xiboho xa Matsalwa xo tinyiketela entirhweni wa yena. (Vakol. 3:23, 24) I ntiyiso, swiyimo swa hambana, naswona Yehova a nga lavi swo tala eka hina ku tlula leswi hi kotaka ku swi endla. Hambi swi ri tano, u hi langutele ku endla leswi hi nga swi kotaka! (Mat. 22:37) Tanihi leswi mukhuva wa munhu lowu tsaneke wu voyameleke eku tilanguteleni, i swinene ku tikambisisa nkarhi na nkarhi ivi hi vona laha hi nga endlaka kona nhluvuko eku tirheleni ka hina Xikwembu. Xana hi swi toloverile ku endla sweswo?
15 Hi fanele hi xalamuka loko hi ta swi kota ku papalata ku pfumelela minsusumeto ni ku navela ka munhu hi xiyexe ku hi sivela ku tinyiketela hi xitalo entirhweni wa Yehova. Mintsako, mintlango ni mintirho yo titsakisa swi fanele ku vekeriwa ndhawu ya swona. Nakambe, hi fanele ku xiya mboyamelo wo katseka ku tlula mpimo eka mintirho ya ku tihanyisa. Hi ku yingisela ndzayo ya Yesu eka Matewu 6:22, 23, handle ko kanakana hi ta swi kota ku endla matshalatshala lama engetelekeke eku landzeleleni ka swilaveko swa moya ivi hi tshovela hi laha ku faneleke.
16 Tanihi leswi hi yaka emahlweni hi tirha hi ku hiseka eku ambaleni ka munhu lontshwa, hi ta amukela vutihlamuleri bya hina eku tirhiseni ka ndzayo ni swiringanyeto leswi hi swi kumaka eminhlanganweni ya bandlha, tinhlengeletano, mintsombano na hi ku tirhisa tibuku. Onge un’wana ni un’wana wa hina a nga dyondza hi ku hiseka, a hlanganyela hi ku chivirika eminhlanganweni ni ku hlanganyela entirhweni lowu lowukulu wo endla vadyondzisiwa ku fikela eka mpimo lowu swiyimo swa hina hi hexe swi nga ta hi pfumelela wona. Xisweswo hi ku hlamula hi ntsako erirhandzwini ra Xikwembu, hi nga tiyisekisiwa hi ku tshovela mimbuyelo ya moya leyi teleke sweswi, ivi hi hlayisa ntshembo lowu tiyeke wa vutomi lebyi nga heriki emisaveni leyintshwa ya Yehova.