Humesa Vanhu Emunyameni Va Ya Eku Vonakaleni

1 Munyama wa moya wu funengete misava. (Esa. 60:2) Ku sukela loko vanhu va wele exidyohweni, Sathana, “xikwembu xa misava leyi,” u hlayise vanhu va ri emunyameni wa moya naswona vuyelo ku ve ku onhaka ka mahanyelo.—2 Vakor. 4:4.

2 Leswi sweswi hi voningeriweke hi ntiyiso, xana hi twela vanhu vusiwana hi laha Yesu a endleke ha kona? (Mat. 9:36) Loko swi ri tano, hi ta tlangela nkoka wa ntirho lowu a wu nyikeke muapostola Pawulo leswaku ‘a pfula mahlo ya vanhu a va humesa emunyameni va ya eku vonakaleni, ni leswaku va huma eku fumiweni hi Sathana va ya eka Xikwembu.’—Mintirho 26:16-18.

VONINGELA MIANAKANYO NI TIMBILU

3 Tanihi leswi Sathana a pfalaka mianakanyo naswona a tlanyataka timbilu ta vahlaseriwa va yena, hi nga endla yini leswaku hi va pfuna? Hi fanele hi fikelela timbilu ni mianakanyo ya vona hi Rito ra Xikwembu. Pawulo u khongelele leswaku Vaefesa va voningeriwa mahlo ya timbilu ta vona. (Vaef. 1:17, 18) Ku hava nchumu wo fikelela mbilu lowu nga ni matimba ku tlula Rito ra Xikwembu. (Vahev. 4:12) Ku tiva leswi ku fanele ku hi susumetela leswaku hi engetela vuswikoti bya hina eku tirhiseni ka Bibele loko hi vulavula ni van’wana.

4 Tinhlamulo ta wena eka swivutiso leswi landzelaka ti nga ha ku pfuna leswaku u humelela swinene evutirhelini. Xana u wu lunghiselela kahle ntirho wa nsimu? Xana u na yona minkarhi yo dyondza ku titoloveta ni swingheniso swa mabulo leswaku u koka ku tsakela ka vini va miti? Xana u endla matshalatshala yo dyondza Mhaka yo Vulavurisana ya sweswinyana ivi u ringeta ku yi tirhisa? Xana u ringeta ku anakanyisisa hi ndlela yo kucetela hi Matsalwa emakaya?—Mintirho 17:2.

XIHONDZO XO RINDZA I MPFUNO

5 Xihondzo xo Rindza xi pfune timiliyoni leswaku tihuma emunyameni ti ya eku vonakaleni. Xi hi kombisa ndlela yo tirhisa misinya ya milawu ya mahanyelo ya Bibele, ku twisisa vuprofeta bya yona esikwini ra hina, naswona xi kombisa ku hambana exikarhi ka vugandzeri bya ntiyiso ni bya mavunwa leswaku hi famba endleleni leyi Yehova a yi amukelaka.

6 I yini lexi ntiyiso wa Bibele wu xi humeseke hi laha swi seketeriwaka ha kona eka Xihondzo xo Rindza? Tinxaka hinkwato ta vanhu ta karhi ta pfuniwa ehenhleni ka ku ponisiwa hi vutivi lebyi kongomeke bya Xikwembu ni N’wana wa xona. (Yoh. 17:3; 1 Tim. 2:4) Muhlayi un’wana u tsarile a ku: ‘Mawaku ndlela leyi ndzi tlangelaka Xihondzo xo Rindza ha yona! Swihloko swi fanele ku pfuna hinkwavo ku vona kahle minkarhi ni tinguva leti hi hanyaka eka tona. Ndza nkhensa swinene hikwalaho ka ndzavisiso, dyondzo ni ntirho lowukulu lowu endliweke eku lunghiseleleni ka Xihondzo xo Rindza, leswi hakunene ku nga swakudya swa moya.’

TIRHISA VUTLHARI

7 Hi n’hweti leyi ya vumbirhi ya tsima ra xikhokhelo xa Xihondzo xo Rindza, hi fanele hi lavisisa minkarhi yo humesa vanhu emunyameni va ya eku vonakaleni. Mabulo ya Bibele ni vanhu lava hi va endzelaka hi yindlu na yindlu ma hi pfuna ku endla leswi. Loko hi kuma vanhu lava kombisaka ku tsakela ka xiviri eka rungula ra Mfumo, hi nga ha kombisa mpfuno wa ku hlaya Xihondzo xo Rindza nkarhi na nkarhi. Loko n’wini wa muti a tolovelane ni magazini naswona a wu tsakela, u nga ha n’wi vutisa loko a ta swi tsakela ku endla xikhokhelo xa wona. Loko xikhokhelo xa lembe xi ariwa, nyikela xikhokhelo xa tin’hweti ta tsevu. Yana emahlweni u endzela hinkwavo lava endleke xikhokhelo hi langutelo ro sungula dyondzo ya le kaya ya Bibele leyi tswalaka mihandzu.

8 Loko hi famba hi yindlu na yindlu, hi nyikela vumbhoni hi xitarata kumbe ku nyikela vumbhoni eka vatirhi-kulorhi, vadyondzi-kulorhi ni maxaka, hi hlanganyela eku hangalaseni ka ntiyiso lowu nga ntshunxaka vanhu. (Yoh. 8:32) Xihondzo xo Rindza i xitirho xo hlawuleka lexi nga va pfunaka ku kuma ntshunxeko naswona va xiya ntshembo wa vutomi lebyi nga heriki, xi va humesa emunyameni va ya eku vonakaleni.