Tirhisa Bibele Entirhweni Wa Nsimu
1 Marito lama huhuteriweke ya Bibele ma nga va ni nkucetelo wa matimba evanhwini. Hikwalaho ka leswi, Vakriste va lembe xidzana ro sungula va tirhise Matsalwa hi ndlela leyinene loko va twarisa mahungu lamanene. Pawulo u ‘anakanyisise hi Matsalwa,’ a hlamusela ni ku kombisa tinhla ta yena hi tinhlamuselo. (Mintirho 17:2, 3) Apolosi, loko a nyikela vumbhoni eka Vayuda, ‘u kombise hi Matsalwa leswaku Yesu a a ri Kriste.’—Mintirho 18:24-28.
2 Timbhoni ta Yehova namuntlha ti landzelela xikombiso lexi. Hi laha swi hlamuseriweke ha kona eka Xihondzo xo Rindza xa March 1, 1986, tluka 26: “Loko va hlanganyela evutirhelini bya le rivaleni, va lava leswaku vanhu va swi twisisa leswaku rungula leri va ri twarisaka a ri sunguriwanga hi vona vini kambe ri huma eRitweni ra Xikwembu. Kutani va tirhisa Bibele hi ku kongoma, entiyisweni va yi hlayela van’wana loko swi koteka.” Xana u tirhisa Bibele hi laha ku teleke evutirhelini bya wena?
MHAKA LEYI YI HUMELELAKA HA YONA
3 Ha yini Bibele yi humelela swinene? Hikuva i Rito ra Xikwembu naswona “ri kota ku hlaya mianakanyo ni makungu ya mbilu.” (Vahev. 4:12) Minsusumeto ya vanhu ya ntiyiso ya humelela loko yi paluxeriwa entiyisweni wa Matsalwa. Vanhu va timbilu letinene va kokeriwa eka wona. Hi xikombiso, mpatswa wun’wana lowuntshwa lowu endleke nhluvuko wa xihatla eku tirheleni ka Yehova wu vutisiwe mhaka leyi ha yona wu hlamuleke hi xihatla eka mahungu lamanene. Yi ve yihi nhlamulo ya vona? “A ku ri Bibele.” Loko vahuweleri lava va va endzeleke va kokele nyingiso wa vona eBibeleni, va twe rito ra “murisi lonene.”—Yoh. 10:14; w78 6/1 matl. 22-3.
4 Xana minkarhi yin’wana u titwa u nga aneriseki loko u tirhisa Bibele ya wena entirhweni wa nsimu? Nongonoko lowunene wa dyondzo ya munhu hi xiyexe, ku katsa ni ku lunghiselela minhlangano ni ku va kona eka minhlangano hinkwayo ya bandlha, swi ta ku hlomisela ntirho wun’wana ni wun’wana lowunene naswona swi ku nyika ntshembo lowu engetelekeke. (2 Tim. 3:16, 17) Lava fambaka swin’we ensin’wini ni swirho swa ndyangu va nga titoloveta ku kambisisa Mhaka yo Vulavurisana swin’we. Nakambe, swingheniso swo tala eka matluka 9-15 ya buku leyi nge Reasoning swi katsa ku hlaya tsalwa eku sunguleni ka bulo. Ha yini u nga titoloveti swin’wana swa leswi? Tirhisa leswi tirhaka ivi u pfuxa ku tsakela ka vanhu ensin’wini ya ka n’wina.
TIRHISA KU AVANYISA LOKUNENE
5 Ku ni minkarhi leyi hi nga ta lava ku rhambela n’wini wa muti leswaku a tikumela kopi ya yena n’wini ya Bibele ni leswaku a kambisisa na hina matsalwa. Tirhisa ku avanyisa lokunene eswiyin’weni swo tano. (Vona buku leyi nge Reasoning, tluka 67, ndzimana 3, na tluka 279, ndzimana 2.) Loko ku laveka rungula ro koma, hi nga ha kunguhata ku hlaya ndzimana yin’we ntsena eka Mhaka ya hina yo Vulavurisana. Kumbe loko n’wini wa muti a ri bizi ngopfu, hi nga ha tshaha nhlamuselo leyi faneleke ntsena, leswaku n’wini wa muti a swi tiva leswaku yi huma eBibeleni. Yesu ni vaapostola a va nga ri na tikopi ta Matsalwa ya Xiheveru ta munhu hi xiyexe leswaku va famba na tona loko va chumayela. Hambi swi ri tano, va tshahe hi xitalo eka wona. Na hina hi fanele hi endla matshalatshala yo nhlokohata matsalwa leswaku hi tiva ku ma tirhisa evutirhelini bya hina.
6 Pawulo u khutaze Timotiya ku ‘tamela rito ra ntiyiso hi ndlela leyinene.’ (2 Tim. 2:15) Xileriso lexi fanaka xa tirha eka hina namuntlha. Hi fanele ku tekelela Yesu ni vaapostola hi ku tirhisa Bibele nkarhi na nkarhi evutirhelini bya hina bya nsimu. Yi hlaye loko swi koteka, kambe loko swi fanerile, tshaha yi huma emianakanyweni. Ku endla ka hina leswi hi laha ku humelelaka swi ta swi veka erivaleni leswaku hi vatirheli va Xikwembu ni leswaku rungula ra hina ri seketeriwe eRitweni ra xona hi laha ku tiyeke.