Ku Khutaza Ku Tirhisa Bibele

KU NAVELA ka hina i ku yisa mianakanyo ya vanhu hinkwavo eRitweni ra Xikwembu, Bibele. Buku yoleyo yo kwetsima i xisekelo xa rungula leri hi ri chumayelaka, kutani hi lava leswaku vanhu va xiya leswaku leswi hi swi vulaka swi huma eka Xikwembu, hayi eka hina. Vanhu va fanele va hlakulela moya wa ku tshemba Bibele.

Entirhweni Wa Nsimu. Loko u tilunghiselela ku ya entirhweni wa nsimu, minkarhi hinkwayo hlawula tsalwa rin’we kumbe ku tlula lawa u nga ta bula ha wona ni vanhu lava rhandzaka ku yingisa. Hambiloko u kunguhate ku tirhisa xingheniso xo koma xo fambisa buku yo karhi leyi sekeriweke eBibeleni, hakanyingi swa pfuna loko u hlaya tsalwa leri faneleke ra Bibele. Bibele yi ni matimba swinene ya ku kongomisa vanhu lava fanaka ni tinyimpfu, ku tlula marito wahi ni wahi lawa hina hi hexe hi nga ma vulaka. Laha swi nga kotekiki ku hlaya Bibele hi ku kongoma, u nga yi tshaha kunene. Eka lembe-xidzana ro sungula, vo tala a va nga ri na tona tikopi ta Matsalwa-songwa. Kambe Yesu na vaapostola vakwe va tshahe Matsalwa hi ku phindha-phindha. Na hina hi fanele hi tikarhatela ku tiva matsalwa hi nhloko kutani hi ma tirhisa hi mfanelo evutirhelini bya hina, minkarhi yin’wana hi ma tshaha kunene.

Loko xiyimo xi pfumela leswaku u hlaya eBibeleni hi ku kongoma, yi khome hi ndlela ya leswaku n’wini wa muti a ta languta na wena loko u hlaya. Loko n’wini wa muti a fambisana na wena a khome Bibele yakwe, swi nga endleka leswaku a angula kahle eka leswi a swi vonaka hi ku kongoma eka ya yena.

Kambe tsundzuka leswaku vahundzuluxeri van’wana va Bibele va tiendlele swa vona loko va hundzuluxela Rito ra Xikwembu. Swi nga endleka leswaku vuhundzuluxeri bya vona byi pfa byi nga fambisani ni leswi a swi ri eka tindzimi to sungula ta Bibele. Vuhundzuluxeri byo tala bya manguva lawa byi suse vito ra Xikwembu, byi sohasohe leswi tindzimana ta tindzimi to sungula ti swi vulaka malunghana ni xiyimo xa vafi, byi tlhela byi pfuvapfuva leswi Bibele yi swi vulaka malunghana ni xikongomelo xa Xikwembu hi misava. Leswaku u komba munhu leswi endliweke, u nga ha ringanisa tindzimana-nkulu to karhi hi ku tirhisa Tibibele to hambana-hambana kumbe vuhundzuluxeri byo sungula hi ririmi rero. Etimhakeni to hlaya, buku leyi nge Ku Hlamulana Hi Matsalwa yi kombisa tindlela leti vuhundzuluxeri byo hambana-hambana byi swi hundzuluxeleke ha tona swiga swa tindzimana leti tirhisiwaka ngopfu. Mani na mani la rhandzaka ntiyiso u ta tsakela ku tiva mhaka yo tano.

Eminhlanganweni Ya Vandlha. Vayingiseri hinkwavo va fanele va khutaziwa ku tirhisa Tibibele ta vona eminhlanganweni ya vandlha. Leswi swa pfuna hi tindlela to tala. Swi endla leswaku mianakanyo ya vayingiseri yi tshama yi dzike eka leswi ku vulavuriwaka ha swona. Swi endla leswaku vayingiseri va kota ku swi vona hi xiviri leswi xivulavuri xi va dyondzisaka swona. Naswona swi pfuna vanhu lava ha ku sungulaka ku hlanganyela ku vona leswaku hakunene Bibele hi yona xihlovo xa vupfumeri bya hina.

Hakanyingi vayingiseri va wena va ta pfula Matsalwa va fambisana na wena eTibibeleni ta vona loko u va khutaza ku endla tano. Ku va khutaza hi ku kongoma i ndlela yin’wana leyinene.

Swi le ka wena tanihi xivulavuri leswaku hi wahi matsalwa lawa u lavaka ku ma kandziyisa hi ku kombela vayingiseri leswaku va ma pfula. I swinene ku hlaya matsalwa lama nga ta ku pfuna ku ndlandlamuxa tinhla-nkulu ta wena. Kutani loko nkarhi wu pfumela, engetela ni man’wana yo hlayanyana lama nga ta seketela nhlamuselo ya wena.

Ina, ku vula tsalwa ntsena kumbe ku kombela vayingiseri leswaku va ri pfula hakanyingi a swi enelanga. Loko u hlaya ndzimana yo karhi kutani u tlulela eka yin’wana vayingiseri va wena va nga si kuma leyo sungula, va ta hatla va nyama timbilu kutani a va nge he tikarhati va pfula Bibele va fambisana na wena. Vana ni vuxiyaxiya. Loko vo tala va yi kumile ndzimana, yi hlaye.

Anakanya ka ha ri emahlweni. Vula ndzimana u nga si yi hlaya. Sweswo swi ta endla leswaku u nga peti dyambu wa ha yimele vayingiseri leswaku va kuma ndzimana ya kona. Hambileswi ku nga ta hlanganisiwa mhaka yitsongo loko u nyika vayingiseri nkarhi wo pfula matsalwa, vuyelo byi ta va lebyinene.