Bokisi Ra Swivutiso

◼ Ha yini swi vuyerisa leswaku vayingiseri va pfula matsalwa loko xivulavuri xi va kombela ku endla tano loko xi ri karhi xi nyikela nkulumo?

Swilo swo fana ni mhaka leyi hlamuseriwaka ni loko nkulumo yi katsa ku hlamuseriwa ka tsalwa hi tsalwa eRitweni ra Xikwembu, hi swona swi lawulaka nhlayo ya matsalwa lawa vayingiseri va nga komberiwaka ku ma pfula.

I swa nkoka ku tsundzuka leswaku xikongomelo xin’wana xa ku languta matsalwa i ku tiyisekisa leswaku leswi vuriwaka swi sekeriwe eBibeleni. (Mint. 17:11) Xikongomelo xin’wanyana i ku kambisisa vumbhoni bya Matsalwa lebyi sekelaka leswi hlamuseriwaka leswaku ripfumelo ra hinkwavo ri ta tiyisiwa. Loko vayingiseri va vona leswi Bibele yi swi vulaka loko ku hlayiwa tsalwa-nkulu, swi ta endla leswaku leswi hlamuseriwaka swi dzika swinene emiehleketweni ya vona. Ku engetela eku hlayeni ka matsalwa, swa vuyerisa ku tsala tinhla ni ku fambisana ni leswi vuriwaka.

Hambiloko phepha ra nkulumo ra Sosayiti ri kombetela eka Matsalwa yo tala lama akaka mhaka ya nkulumo, matsalwa wolawo ma pfuna xivulavuri leswaku xi ma tirhisa loko xi lunghiselela nkulumo ya xona. Ma nga ha xi nyika rungula ra xisekelo ni ku xi pfuna ku dzikisa mongo wa misinya ya milawu ya Matsalwa emiehleketweni ya xona, ni ku twisisa ndlela leyi rungula rero ri akiweke ha yona. Xivulavuri hi xona xi hlawulaka matsalwa lawa ma nga ya nkoka enkulumeni ya xona, kutani xi kombela vayingiseri va fambisana na xona loko xi ri karhi xi ma hlaya ni ku ma hlamusela. Matsalwa man’wana lama seketelaka mhaka yoleyo, ma nga ha boxiwa kumbe ma vekiwa hi ndlela yin’wana, kambe a swi bohi leswaku vayingiseri va ma pfula.

Loko xivulavuri xi hlaya matsalwa lama hlawuriweke, xi fanele xi ma hlaya hi ku kongoma ku suka eBibeleni, hayi ephepheni ro karhi leri kandziyisiweke ku suka eka khompyuta. Loko xivulavuri xi kombela vayingiseri leswaku va fambisana na xona loko xi hlaya, xi fanele ku vula vito ra buku ya Bibele swi twala, kun’we ni ndzima ni (ti-)ndzimana. Hi ku yimanyana leswaku xi tlakusa xivutiso kumbe ku vulanyana swo karhi malunghana ni ku hlayiwa ka tsalwa rero, xivulavuri xi nyika vayingiseri nkarhi wa ku kuma tsalwa rero. Ku phindha tsalwa rero swi ta tlhela swi pfuna vayingiseri leswaku va ri tsundzuka. Kambe, a swi khutaziwi ku vula tluka leri tsalwa ri kumekaka eka rona, hikuva matluka ya hambana hi ku ya hi minkandziyiso ya Tibibele leti vayingiseri va ti khomeke. Loko vayingiseri va pfula matsalwa loko va komberiwa ku endla tano, swi ta va pfuna leswaku va vuyeriwa ematimbeni ya Rito ra Xikwembu loko ri ri karhi ri hlamuseriwa hi nkarhi wa nkulumo.—Hev. 4:12.