Dyondzo 21

Mhaka Leyi Dyondzisaka, Leyi Nyikeriwaka Khwatsi

1-3. Ha yini ku laveka mhaka leyi kongomeke leswaku nkulumo ya munhu yi dyondzisa?

¹ Tinkulumo leti pfunaka ti sungula hi ku lunghiselela ka ku chivirika, naswona sweswo swi lava nkarhi ni matshalatshala. Kambe swa vuyerisa swonghasi! U engetela mpimo wa wena wa vutivi lebyi kongomeke naswona u na swo karhi leswi pfunaka hakunene swo avelana swona ni vayingiseri va wena. Ematshan’wini yo vulavula hi leswi tolovelekeke, u na vuxokoxoko lebyi dyondzisaka byo byi nyikela, naswona wa swi tiva leswaku leswi u swi vulaka swi lulamile. Leswi swi aka ku tlangela ka vayingiseri Rito ra Xikwembu, swi dzunisa Yehova. Ku xiya ka hina mhaka leyi dyondzisaka ngopfu-ngopfu ku katsa leswi u swi vulaka enkulumeni ya wena. Hi ku komisa kambisisa swivumbeko swo hambana-hambana swa mhaka. I yinhla yo sungula exiphephanini xa Ndzayo ya Nkulumo.

² Mhaka leyi kongomeke. Nkulumo leyi vulavulaka hi leswi tolovelekeke yi pfumala ntikelo ni matimba. A yi twisiseki. Yi siya vayingiseri va kanakana. Loko tinhla ti ta tsundzukeka ti fanele ti kongoma, ti pakanisa. Leswi swi nyika vumbhoni bya ndzavisiso ni vutivi bya mhaka.

³ Mfanelo leyi yi nga kumiwa eku lunghiseleleni hi ku vutisa leswaku, ha yini? Rini? Kwihi? ni swin’wana. Hakanyingi a swi enelanga ku vula leswaku xo karhi xi humelerile. Nyika mavito ya tindhawu, masiku, kumbexana ni swivangelo. A swi enelanga ku vula mintiyiso yo karhi. Kombisa mhaka leyi yi nga ntiyiso ha yona; kombisa mhaka leyi yi nga ya nkoka ha yona ku yi tiva. Loko u nyika ndzayo, hlamusela ndlela leyi nchumu wo karhi wu faneleke ku endliwa ha yona. Leswaku i nhluvuko wo tanihi kwihi wa muxaka lowu lowu lavekaka swi ta voniwa hi mpimo wa leswi ana se vayingiseri va swi tivaka. Kutani xiya vayingiseri leswaku u tiva vuxokoxoko lebyi nga ha lavekaka.

4-6. Leswaku nkulumo ya wena yi dyondzisa eka vayingiseri va wena vo karhi, i tinhla tihi leti u faneleke u ti tsundzuka?

⁴ Yi dyondzisa vayingiseri va wena. Leswi swi nga ha dyondzisaka vayingiseri van’wana swi nga ha va leswi nga engeteriki nchumu eka vutivi bya ntlawa lowun’wana, kumbe swi nga ha wu siya wu ri emunyameni hi ku helela. Kutani ke, swi le rivaleni leswaku mhaka yi fanele yi fanela vayingiseri vo karhi. Hi xikombiso, eka nkulumo ya ndlela leyi ntirho wa hina wu endliwaka ha yona, mhaka yi nga tameriwa enhlanganweni wa ntirho hi laha ku hambaneke ku tlula loko u vulavula ni munhu la lunghekelaka ku tinyiketela eka Yehova, kumbe loko u vulavula ni ntlawa wa misava.

⁵ Tinhla leti na tona ti fanele ti xiyiwa eka swiavelo swo hambana-hambana eka Xikolo xa Vutirheli bya le Tilweni. Mhaka leyi nyikeriwaka eka nkulumo yihi na yihi leyi aviweke yi fanele yi xiyiwa malunghana ni vayingiseri, mavekelo ni xikongomelo xa nkulumo. Tinhla leti ti ta kombisiwa hi muxaka wa nkulumo ni mavekelo lawa xivulavuri xi ma hleleke. Kavula, nkulumo ya ndzayo yi ta va nkulumo leyi kongomisiwaka ebandlheni. Tinkulumo tin’wana ti nga ha cinca-cinca, vayingiseri ni xikongomelo swi lawuriwa hi mavekelo ya kona. Minkarhi hinkwayo, xichudeni ni mutsundzuxi va nga tivutisa, Xana mhaka yi fanela vayingiseri vo karhi lava katsekaka emhakeni? Xana vayingiseri va ta dyondzisiwa ni ku leteriwa hi yona?

⁶ Loko u lunghiselela tivutise, I yini lexi ndzi lavaka ku xi kandziyisa enkulumeni leyi? Eka leswi ndzi lavaka ku swi vula xana vanhu kumbe ntlawa lowu wu tiva swo tanihi kwihi ha swona? I xisekelo xihi lexi ndzi faneleke ku xi veka ndzi nga si hlamusela tinhla leti? Ndzi nga ti vula njhani hi ndlela yin’wana eka ntlawa lowu hambaneke hi ku helela? Hakanyingi swifaniso swi hlamusela malangutelo ya hina. Ringeta swingheniso swo hambana-hambana eka mintlawa yo hambana-hambana loko u lunghiselela leswaku u kuma ku hambana hi ku xiya vayingiseri ni ku endla leswaku mhaka yi dyondzisa eka vayingiseri vo karhi lava u nga ta vulavula na vona.

7, 8. Hi nga ti endla njhani tinkulumo ta hina ti tirha?

⁷ Mhaka leyi u nga kotaka ku yi tirhisa. Swi tele leswi faneleke swi dyondziwa, kambe a hi hinkwaswo leswi tirhaka. Eka hina, mhaka leyi dyondzisaka yi khumba swilo leswi hi fanelaka ku swi tiva evuton’wini bya Vukriste, evutirhelini bya hina. Hi lava ku tiva ndlela yo tirhisa rungula leri hi ri kumeke.

⁸ Xichudeni loko xi lunghiselela, ni mulanguteri wa xikolo loko a nyika ndzayo, va nga ha xiya yinhla leyi hi ku vutisa va ku: Hi yihi misinya ya milawu leyi kongomisaka, leyi nga ta kumiwa enkulumeni? Xana mhaka leyi yi nga tirhisiwa eku endleni ka swiboho? Xana rungula leri nyikeriwaka ri nga endliwa ri fanela vutirheli bya nsimu? Xana ri dzunisa Rito ra Xikwembu ni ku kombetela eka xikongomelo xa xona? Tinkulumo ti nga ri tingani ti nga nyikela rungula leri hinkwaro, kambe leswaku ri tirha, mhaka leyi nyikeriwaka yi fanele yi tirhiseka hi ndlela yo karhi eka vayingiseri.

9-11. Ha yini ku pakanisa ka nhlamuselo ku ri ka nkoka swinene?

⁹ Ku pakanisa ka nhlamuselo. Timbhoni ta Yehova i nhlengeletano ya ntiyiso. Hi fanele hi lava ku vulavula ntiyiso naswona hi pakanisa hi ku helela eka vuxokoxoko byin’wana ni byin’wana minkarhi hinkwayo. Leswi a swi fanelanga swi va tano malunghana ni dyondzo ntsena, kambe ni le ku tshaheni ka hina, leswi hi swi vulaka hi van’wana kumbe ndlela leyi hi va yimelaka ha yona, ni le timhakeni leti katsaka mintiyiso ya sayense kumbe swiendlakalo swa mahungu.

¹⁰ Tinhlamuselo leti hoxeke leti nyikeriwaka eka vayingiseri ti nga ha phindhiwa ivi xihoxo xi kurisiwa. Swihoxo leswi xiyiwaka hi vayingiseri swi tisa ku kanakana hi nkucetelo wa xivulavuri eka tinhla tin’wana, kumbexana ku tisa ku kanakana eka ntiyiso wa rungula hi roxe. Munhu loyi a ha ku tsakelaka la twaka tinhlamuselo to tano, naswona a twe langutelo leri hambaneke ri kandziyisiwa nkarhi wun’wana, a nga ha gimeta hi ku vula leswaku ku na ku nga twanani ka mianakanyo exikarhi ka Timbhoni ta Yehova ivi a tshika ku hlanganyela handle ko paluxa xivangelo xa yena.

¹¹ Mutsundzuxi a nga fanelanga a xopaxopa nhlamuselo yin’wana ni yin’wana leyi endliwaka hi xichudeni, ngopfu-ngopfu lexi nga xintshwa entiyisweni naswona xi nga ri na vutivi byo enta hi swilo swa Rito ra Xikwembu. Ematshan’wini ya sweswo, hi vutlhari u ta pfuna ku aka mianakanyo ya xichudeni ivi a xi komba ndlela yo antswisa ku pakanisa ka xona hi ku lunghiselela ka ha ri emahlweni hi vukheta.

12, 13. Hi wihi nkoka wa rungula rin’wana leri vekaka mhaka erivaleni?

¹² Rungula rin’wana leri vekaka mhaka erivaleni. Mianakanyo leyi nyikeriwaka hikwalaho ka ku anakanyisisa kumbe leyi kumiweke hi ndzavisiso lowu engetelekeke emhakeni yi nga pfuna swinene enkulumeni naswona nkarhi wun’wana yi nga sivela ku vuyelela loku nga dyondzisiki ka mhaka leyi ana se yi toloveriweke hi vayingiseri. Yi nandzihisa nkulumo, yi pfuxa ku tsakela ka vayingiseri, naswona yi nga endla mhaka leyi tolovelekeke yi tsakisa hakunene. Nakambe, yi nyika xivindzi eka xivulavuri. U sungula nkulumo ya yena hi ku chivirika loku endliwaka hi ku tiva leswaku u na swo karhi leswi hambanekenyana swo swi vula.

¹³ Khombo leri faneleke ku papalatiwa i ku mbambela ka munhu hi xiyexe. Tibuku ta Sosayiti ti fanele ti tirhisiwa naswona ti tshembiwa. Languta ti-Index ta Sosayiti ni tinhlamuselo ta le hansi ematsalweni. Tiyiseka leswaku leswi u swi vulaka swa twisiseka, ku nga ri ku lahlekisa.

**********

14-16. I yini lexi faneleke xi endliwa loko ku lunghiseleriwa nkulumo leswaku swilo swi hlamuseriwa hi ku olova?

¹⁴ Loko u lunghiselela mhaka ya wena nakambe i swa nkoka ku nyikela nyingiso wa vukheta eka ndlela leyi u nga ta vula leswi u faneleke ku swi vula ha yona. Leswi hi leswi xiphephana xa Ndzayo ya Nkulumo xi swi hlamuselaka tanihi “Yi le rivaleni, ya twisiseka.” Ku tsandzeka ku nyikela nyingiso lowu faneleke eka leswi ku nga ku sivela ku fikelela vayingiseri va wena, kumbe ku nga ha va sivela ku hlayisa leswi va swi twaka. Ku na swivumbeko-nkulu swinharhu swo swi kambisisa swa mhaka leyi.

¹⁵ Yi hlamuseriwa hi ku olova. Leswi a swi vuli swona leswaku swivulwa swi fanele swi anakanyeriwa ka ha ri na nkarhi. Kambe mianakanyo leyi faneleke ku nyikeriwa yi fanele yi kambisisiwa naswona ku tsundzukiwa swivumbeko swin’wana leswi kongomeke. Hi ntolovelo leswi swi ta vumba nkulumo leyi hlanganeke ni ku kombisa mianakanyo leyi olovaka, leyi vuriwaka hi ririmi leri twalaka. Mhaka leyi katsekaka emianakanyweni ya xivulavuri yi ta katseka enkulumeni.

¹⁶ Ku lunghiselela nkarhi se wu fambile swi fanele swi papalatiwa. Yinhla yin’wana ni yin’wana ya nkulumo yi fanele yi anakanyisisiwa hi tindlela hinkwato ku kondza yi olova ni ku twisiseka eka xivulavuri. Mpfuxeto wa tinhla leti eku lunghiseleleni ka nkulumo wu ta ti nghenisa swinene emianakanyweni ya yena lerova loko a ti lava ti ta ta hi xihatla naswona ti ta twisiseka swinene eka vayingiseri ni le ka xivulavuri.

17, 18. Ha yini marito lama nga tolovelekangiki ma fanele ma hlamuseriwa?

¹⁷ Marito lama nga tolovelekangiki ma hlamuseriwa. Dyondzo ya hina ya Matsalwa ni tibuku ta Sosayiti ya Watch Tower swi hi nyike vutivi bya marito lama nga mantshwa swinene eka lava nga tolovelanangiki ni ntirho wa hina. Loko a ho hlamusela mintiyiso ya Bibele eka vayingiseri van’wana, hi tirhisa marito yo fana ni lawa, swo tala swa leswi hi swi vulaka a swi ta lahleka kumbe nkulumo ya hina yi va leyi nga twakaliki hi ku helela.

¹⁸ Xiya vayingiseri va wena. Mpimo wa ku twisisa ka vona hi wihi? Va tiva ntirho wa hina ku fikela kwihi? Eka marito lawa i mangani lawa ma nga ta twisiseka hi ku olova eka vona tanihi loko ma twisisiwa hi xivulavuri? Marito yo fana na “swa le tilweni,” “masalela,” “tinyimpfu tin’wana,” hambi ku ri “Armagedoni” na “Mfumo,” ma nga ha hundzisela rungula rin’wana emianakanyweni ya muyingiseri kumbe a nga twi nchumu nikantsongo. Hambi ma ri marito yo tanihi “moya-xiviri,” “tihele” na “ku nga fi ka moya” ma fanele ma hlamuseriwa loko muyingiseri a nga tolovelananga ni ntirho wa hina. Kambe loko nkulumo yi nyikeriwa ebandlheni, marito yo fana ni lawa a swi bohi ku ma hlamusela. Kutani mbango wu fanele wu xiyiwa.

19, 20. Hi nga ku papalata njhani ku va ni mhaka yo tala swinene?

¹⁹ Ku nga vi mhaka leyo tala ngopfu. Nkulumo yi nga ha va ni rungula ro tala swinene lerova mpimo lowukulu wa mhaka wu lahlekela vayingiseri naswona ku twisisa ku tsana kumbe ku lahleka hi ku helela. Leswaku ku fikeleriwa xikongomelo xa nkulumo, a ku fanelanga ku nghenisiwa mhaka yo tala ku tlula leyi nga ta ndlandlamuxiwa hi ku twisiseka hi nkarhi lowu vekiweke. Ku nga vuriwi swo tala leswi nga ta ka swi nga twisisiwi kahle hi vayingiseri. Ku tlula kwalaho, mhaka leyi nyikeriwaka eka munhu ntsena kumbe munhu la ha ku tsakelaka yi fanele ku olovisiwa ku tlula loko mhaka leyi fanaka yi nyikeriwa ebandlheni. Na kona laha, mutsundzuxi u fanele a xiya vayingiseri lava xivulavuri xi vulavulaka na vona.

²⁰ Xichudeni xi ta swi tiva njhani leswaku i mhaka yo tala ku fikela kwihi leyi xi faneleke xi yi nghenisa enkulumeni? Ku ringanisa ku ta pfuna eku lunghiseleleni. Kambisisa leswi u nga ta swi vula. Eka tinhla leti, i tingani leti nga ta va ana se ti tiviwanyana hi vayingiseri? I tingani leti nga ta va tintshwa hi ku helela? Loko xisekelo xa vutivi lebyi se byi nga kona xi anamile, hi laha ku nga akiwaka ngopfu eka xona hi nkarhi lowu nyikeriweke. Kambe loko kahle-kahle ku nga tiviwi nchumu hi mhaka leyi nga ta hlamuseriwa, kutani vukheta lebyikulu byi fanele byi tirhisiwa leswaku i mhaka yo tanihi kwihi leyi nga ta hlamuseriwa, ni leswaku swi ta teka nkarhi wo fikela kwihi ku hlamusela tinhla leti leswaku vayingiseri va ti twisisa kahle.