Dyondzo 31

Khorwisa Vayingiseri Va Wena, Anakanyisisa Na Vona

1, 2. Nhlamuselo leyi khorwisaka i yini?

¹ Loko u vulavula u langutela leswaku vayingiseri va wena va yingisela, kambe a swi heleli kwalaho. Nakambe u ta lava leswaku va amukela tinhlamuselo leti nyikeriwaka ni ku tirhela eka tona. Leswi va ta swi endla loko va khorwiseka hi ntiyiso wa leswi u swi vulaka ni loko timbilu ta vona ti ri tinene. Ku khorwisa swi vula ku enerisa hi vumbhoni. Kambe vumbhoni byi ri byoxe a hi minkarhi hinkwayo byi enelaka. Nhlamuselo yo byi seketela hakanyingi ya laveka. Hikwalaho, ku khorwisa hi nhlamuselo swi katsa swilo swinharhu swa xisekelo: xo sungula, vumbhoni hi byoxe; xa vumbirhi, ndzandzelelano kumbe nxaxamelo lowu vumbhoni byi nyikeriwaka ha wona; xa vunharhu, mukhuva ni tindlela leti tirhisiwaka ku byi nyikela. Eka bulo leri, leri yelanaka ni “Nhlamuselo leyi khorwisaka” eka fomo ya Ndzayo ya Nkulumo, hi ta xiya leswi vuriwaka, vumbhoni lebyi nyikeriwaka, ematshan’wini ya ndlela leyi u swi nyikelaka ha yona.

² Nhlamuselo leyi khorwisaka yi titshege hi swivangelo swa xisekelo leswi twalaka, naswona yoleyo i ndlela leyi mutsundzuxi wa wena a nga ta swi languta ha yona. Vumbhoni bya wena byi fanele byi khorwisa hambi loko u hlaya mhaka leyi kandziyisiweke. Loko mfanelo leyi khorwisaka ya nkulumo ya wena yi titshege hi mukhuva lowu yi nyikeriwaka ha wona, ku nga ri hi tinhla leti u ti tirhiseke ku vumba mhaka ya wena, kutani u fanele ku kurisa mfanelo leyi hi laha ku engetelekeke leswaku u endla nhlamuselo ya wena yi tiya ni ku va ya ntiyiso hakunene.

3-6. Kombisa mhaka leyi ha yona masungulo ma faneleke ma vekiwa.

³ Masungulo ma andlariwa. U nga si nyikela tinhlamuselo ta wena, swa fanela ku veka masungulo lama faneleke. U fanele u veka yinhla ya bulo erivaleni. Naswona swa pfuna ku endla mhaka yi toloveleka hi ku kandziyisa timhaka leti faneleke leti mi pfumelelanaka eka tona.

⁴ Minkarhi yin’wana marito yo tika ma fanele ma hlamuseriwa kahle. Swilo hinkwaswo leswi nga twaliki swi fanele swi susiwa. U nga jahi loko u veka masungulo ya wena. Tiyisa masungulo ya wena, kambe u nga ma endli ma va muako hinkwawo. Loko u landzula mphikamakaneta, kambisisa tinhla to hambana-hambana leti tirhisiweke ku yi sekela leswaku u kuma tinhla leti tsaneke ni leswaku ti ku pfuna ku vona ndlela ya wena yo hlamusela ni ndlela yo kuma rimitsu ra mhaka.

⁵ Loko u lunghiselela nkulumo ya wena, u fanele u ringeta ku ehleketa leswaku vayingiseri va wena ana se va tiva hi ta mhaka ya wena ku fikela kwihi. Leswi swi ta ku pfuna swinene ku vona leswaku i xisekelo xo tanihi kwihi lexi u faneleke u xi veka u nga si nghena hi xiviri eku hlamuseleni ka mhaka ya wena.

⁶ Vuxiyaxiya ni mikhuva ya Vukriste swi lawula nkulumo yi va ni vunene ni ku anakanyela, hambi leswi ku nga riki yona yinhla leyi hi tirhelaka eka yona laha. Nkarhi hinkwawo tirhisa swinene vutivi bya wena bya misinya ya milawu ya Vukriste naswona u pfula timbilu ni mianakanyo ya vayingiseri va wena.

7-13. Hlamusela leswaku “vumbhoni lebyi twalaka byi nyikeriwa” swi vula yini.

⁷ Vumbhoni lebyi twalaka byi nyikeriwa. Mhaka a yi “kombisiwi yi ri ntiyiso” hi ku va wena tanihi xivulavuri, u yi pfumela kumbe u yi vula. Nkarhi hinkwawo u fanele u tsundzuka leswaku vayingiseri va wena va ni mfanelo leyikulu yo vutisa va ku, “Ha yini sweswo swi ri ntiyiso?” kumbe, “Ha yini u vula leswaku sweswo swi tano?” Tanihi xivulavuri, nkarhi hinkwawo u na ndzhwalo wo kota ku hlamula xivutiso lexi nge “Ha yini?”

⁸ Swivutiso leswi nge “Njhani?” “Mani?” “Kwihi?” “Rini?” “Yini?” swi humesa tinhla ni rungula ntsena loko u hlamula, kambe xivutiso lexi nge “Ha yini?” xi humesa swivangelo. Xi yima xi ri xoxe emhakeni leyi, naswona xi lava swo tala eka wena ku tlula tinhla ntsena. Xi lava vuswikoti bya wena byo ehleketa. Hikwalaho ka leswi, loko u lunghiselela nkulumo ya wena, tivutise xivutiso lexi fanaka hi ku phindha-phindha: “Ha yini?” Kutani tiyiseka leswaku u nga ti nyikela tinhlamulo.

⁹ Tanihi swivangelo swa tinhlamuselo leti u ti vulaka hakanyingi u nga tshaha un’wana loyi a vuleke swo karhi. Sweswo hi ku olova swi vula leswaku loko yena a swi vurile, swi fanele swi ri ntiyiso, hikuva u tekiwa tanihi yena loyi a swi tivaka. Sweswo swi va xivangelo xo twala xo swi tshemba. Kavula, Xihlovo lexikulu emhakeni leyi, i Yehova Xikwembu. Hikwalaho, ku tshaha ndzimana eBibeleni leswaku u seketela, i vumbhoni lebyi eneleke byo seketela yinhla. Leswi swi vuriwa vumbhoni “lebyi nga ni xitiyisekiso” hikuva byi katsa “xitiyisekiso” lexi humaka eka mbhoni leyi amukelekaka.

¹⁰ Loko u humesa vumbhoni lebyi nga ni xitiyisekiso u fanele u tiyiseka leswaku vumbhoni bya wena byi ta amukeleka eka vayingiseri va wena. Loko u tirhisa swihlovo swa vanhu, tiyiseka hi masungulo ya swona ni ndlela leyi swi nga ta langutiwa ha yona. Vanhu vo tala va ta amukela Bibele tanihi Rito ra Xikwembu, kambe van’wana va yi languta tanihi buku ya munhu lerova a yi nge vi na matimba. Etimhakeni to tano u nga ha lava vumbhoni byin’wana, kumbexana u rhanga u kombisa ku tshembeka ka Bibele.

¹¹ Rito ra xitsundzuxo. Vumbhoni hinkwabyo byi fanele byi tirhisiwa hi ku tshembeka. U nga hlamuseli ntshaho wu hambana ni mhaka leyi wu humaka eka yona. Tiyiseka leswaku leswi u swi vulaka hi swona hakunene leswi xihlovo lexi u xi tshahaka a xi vula swona. Vana la kongomaka eka tinhlamuselo ta wena. Nakambe vana ni vukheta hi tinhlayo. Loko ti nga nyikeriwi kahle, leswi swi nga tisa vuyelo lebyi nga tsakisiki. Tsundzuka munhu loyi a nga swi kotiki ku hlambela loyi a nweleke exinambyanini lexi ringaniseriwaka eka mitara ntsena hi ku enta. U rivarile hi ta ncele wa timitara tinharhu lowu nga exikarhi.

¹² Vumbhoni byo ya hi swiyimo hi lebyi ku nga riki vumbhoni bya vanhu kumbe bya Xikwembu. I vumbhoni lebyi sekeriweke eka mintiyiso ematshan’wini ya ku tshaha timbhoni. Leswaku u tiyisa mahetelelo ya wena ni ku endla leswaku vumbhoni byo ya hi swiyimo byi khorwisa, u fanele u va ni nxaxamelo lowu eneleke wa mintiyiso ni tinhlamuselo to seketela mahetelelo ya wena.

¹³ Loko vumbhoni hinkwabyo lebyi u byi nyikelaka (hambi byi nga landzelelani) byi enerile ku khorwisa vayingiseri lava u vulavulaka na vona, mutsundzuxi wa wena u ta byi teka byi ri lebyi khorwisaka. Mutsundzuxi u ta tivutisa, a swi languta hi mianakanyo ya vayingiseri, “Xana ndzi khorwisekile?” Loko a khorwisekile, kutani u ta ku bumabumela malunghana ni mhaka ya wena.

14. Nkatsakanyo lowu humelelaka i yini?

¹⁴ Nkatsakanyo lowu humelelaka. Muxaka wo karhi wa nkatsakanyo hakanyingi i wa nkoka eka nhlamuselo leyi khorwisaka. I xikhutazo xo hetelela xa nhlamuselo, wu engetela ku twisisiwa ka tinhlamuselo leti tirhisiweke. Nkatsakanyo a wu fanelanga wu va ku phindhiwa ka tinhla ntsena, hambi leswi kahle-kahle ku nga mhaka yo vula leswaku “tanihi leswi leswi swi nga tano, na leswi sweswo swi nga tano, hikwalaho hi gimeta hi ku . . . ” Xivumbeko lexi xi kunguhateriwe ku hlanganisa tinhla hinkwato kun’we, ni ku ti hlanganisa ni mahetelelo. Minkarhi yo tala i nkatsakanyo lowu humelelaka lowu vekaka tinhlamuselo erivaleni, leswaku ti khorwisa hakunene.

**********

15, 16. Ha yini hi fanele hi pfuna vayingiseri ku anakanyisisa?

¹⁵ Hambi loko tinhlamuselo leti u ti tirhisaka enkulumeni ti twala, a swi enelanga ku vula tinhla ntsena. U fanele u ti nyikela hi mukhuva lowu u pfunaka vayingiseri leswaku va anakanyisisa, va twisisa tinhlamuselo ta wena ni ku fika eka mahetelelo lama fanaka ni lawa wena u ma fikelelaka. Leswi hi leswi xiphephana xa Ndzayo ya Nkulumo xi kombetelaka eka swona tanihi “Vayingiseri va pfuniwa ku anakanyisisa.”

¹⁶ U fanele u navela mfanelo leyi hikuva Xikwembu xi anakanyisisa na hina. Nakambe, Yesu u hlamusele swifaniso swa yena eka vadyondzisiwa va yena naswona u va hlomisele ku dyondzisa ntiyiso lowu fanaka eka van’wana. Kutani ku pfuna vayingiseri va wena ku anakanyisisa, swi vula ku tirhisa vutshila lebyi lavekaka leswaku u pfuna vayingiseri va wena ku twisisa nhlamuselo ya wena, va twanana na wena naswona va hlomela ku tirhisa tinhlamuselo ta wena ku dyondzisa un’wana.

17, 18. Xisekelo lexi tolovelekeke xi hlayisiwa hi ndlela yihi?

¹⁷ Xisekelo lexi tolovelekeke xi hlayisiwa. Leswi u swi vulaka ni ndlela leyi u swi vulaka ha yona i swa nkoka eku simekeni ka xisekelo lexi tolovelekeke eku sunguleni ka nkulumo ya wena. Kambe xisekelo lexi tolovelekeke a xi fanelanga xi lahleka loko nkulumo yi ya emahlweni, hikuva u nga ha lahlekeriwa na hi vayingiseri va wena. U fanele u ya emahlweni u kandziyisa tinhla ta wena lerova ti amukeleka emianakanyweni ya vayingiseri va wena. Leswi swi lava leswaku u tsundzuka langutelo ra vona malunghana ni mhaka leyi hlamuseriwaka naswona u tirhisa vutivi lebyi ku va pfuna leswaku va vona ku twala ka tinhlamuselo ta wena.

¹⁸ Xikombiso lexi xiyekaka xo simeka xisekelo lexi tolovelekeke ni ku xi hlayisa ku fika emakumu, ku nga ku pfuna vayingiseri ku anakanyisisa, i nhlamuselo ya muapostola Pawulo, hi laha yi rhekhodiweke ha kona eka Mintirho 17:22-31. Xiya ndlela leyi a simekeke xisekelo lexi tolovelekeke ha yona eku sunguleni naswona hi vuxiyaxiya a xi hlayisa eka nkulumo ya yena hinkwayo. Loko a gimeta ana se u khorwise van’wana va vayingiseri va yena hi ntiyiso lowu, ku katsa ni muavanyisi loyi a a ri kona.—Mintirho 17:33, 34.

19-23. Ringanyeta tindlela leti tinhla ti nga hlamuseriwaka ha tona hi laha ku eneleke.

¹⁹ Ku hlamuseriwa loku eneleke ka tinhla. Leswaku vayingiseri va anakanyisisa hi mhaka, va fanele va va ni rungula leri eneleke leri nyikeriwaka lerova va nga kaneti mhaka hikwalaho ka leswi va nga yi twisisiki kahle. Swi le ka wena ku va pfuna.

²⁰ Leswaku u swi endla kahle, xiya leswaku u nga hlanganisi tinhla to tala ngopfu. Vunene bya mhaka ya wena byi ta lahleka loko yi nyikeriwa hi ku tsutsuma. Tinyike nkarhi wo hlamusela tinhla hi vukheta, kutani vayingiseri va wena a va nge ti twi ntsena, kambe va ta tlhela va ti twisisa. Loko u vula yinhla ya nkoka, tinyike nkarhi wo yi ndlandlamuxa. Hlamula swivutiso swo tanihi, Ha yini? Mani? Njhani? Yini? Rini? Kwihi? Hi ndlela leyi pfuna vayingiseri va wena va twisisa mianakanyo hi xitalo swinene. Minkarhi yin’wana u nga ha seketela kumbe ku lwisana ni yinhla yo karhi leswaku u kandziyisa xivangelo xa langutelo ra wena. Hi laha ku fanaka, endzhaku ko vula nsinya wa nawu, swa pfuna ku nyikela xifaniso ha wona leswaku vayingiseri va kota ku vona matirhelo ya wona. Kavula, vutlhari byi fanele byi tirhisiwa. Mpimo lowu yinhla yin’wana ni yin’wana yi ndlandlamuxiwaka ha wona wu ta titshega hi nkarhi lowu nga kona ni nkoka wa yinhla emhakeni leyi ku buriwaka ha yona.

²¹ Swivutiso nkarhi hinkwawo i swinene ku pfuna vayingiseri ku anakanyisisa. Swivutiso swo kandziyisa, leswi ku nga swivutiso leswi nyikiwaka vayingiseri handle ko langutela nhlamulo eka vona, leswi fambisanaka ni ku yima loku faneleke, swi ta pfuxa mianakanyo. Loko u vulavula ni munhu un’we kumbe vambirhi ntsena, tanihi le vutirhelini bya nsimu, u nga pfuxa ku tsakela ka vona hi swivutiso loko u ya emahlweni, naswona hi ndlela leyi, tiyiseka leswaku va yi kuma ni ku yi amukela mianakanyo leyi nyikeriwaka.

²² Tanihi leswi u lavaka ku kongomisa mianakanyo ya vayingiseri va wena, u fanele u aka eka swilo leswi ana se va swi tivaka, hambi ku ri eka ntokoto wa vona vini kumbe eka xiphemu xo sungula xa bulo ra wena n’wini. Kutani ke, leswaku u vona loko tinhla to karhi u ti hlamusele hi laha ku eneleke, u fanele u kambisisa leswi vayingiseri va wena ana se va swi tivaka hi mhaka yoleyo.

²³ Nkarhi hinkwawo i swa nkoka ku xiya ndlela leyi vayingiseri va wena va langutekaka ha yona ku tiyiseka leswaku va ku twisisa. Laha swi fanelaka kona, tlhelela endzhaku ivi u hlamusela tinhla u nga si hundzela eka nhlamuselo leyi landzelaka. Loko u nga va pfuni leswaku va anakanyisisa, va nga lahlekeriwa hi nxaxamelo wa wena wa mianakanyo hi ku olova.

24. Ku kombisa ndlela leyi tinhlamuselo ti tirhaka ha yona eka vayingiseri va wena swi hetisisa xikongomelo xihi lexinene?

²⁴ Ku endliwa leswaku swi tirha eka vayingiseri. Loko u nyikela nhlamuselo yihi na yihi, tiyiseka leswaku u tlhela u yi kombisa hi ku kongoma ndlela leyi yi seketelaka mhaka leyi kambisisiwaka ha yona. Nakambe, katsa nsusumeto enkulumeni, u khutaza vayingiseri va wena ku teka goza ro fambisana ni tinhla leti nyikeriweke. Loko va khorwisekile hakunene hi leswi u swi vuleke, va ta swi lunghekela ku teka goza.