Xana Wa Ri Lwela Rito Ra Xikwembu?

¹ Vakreste va ntiyiso va hisekela ku lwela Rito ra Xikwembu emisaveni leyi hakanyingi yi nga yi xiximiki Bibele. Leswi hi kholwaka leswaku “Matsalwa hinkwawo ma huhuteriwe hi Xikwembu,” hi pfumelelana na Yesu Kreste loyi a tiyisekiseke mhaka leyi loko a khongela eka Yehovha a ku: “Rito ra wena i ntiyiso.” (2 Tim. 3:16; Yoh. 17:17) Xana hi nga ri lwela njhani Rito ra Xikwembu hi tindlela hinkwato?

² Dyondza Matsalwa: A swi kanakanisi leswaku Yesu u hisekele ku dyondza Rito ra Xikwembu. Leswi swi n’wi pfune leswaku a kota ku dyondzisa hi Matsalwa entirhweni wa yena hinkwawo. (Luka 4:16-21; 24:44-46) Xana hi nga endlisa ku yini leswaku hi tsundzuka matsalwa yo karhi? Hi nga hlaya Bibele siku ni siku ni ku anakanyisisa hi ndzimana leyi hi yi twaka yi khutaza ngopfu kumbe leyi nga ta hi pfuna ensin’wini. Loko hi lunghiselela minhlangano, hi fanele hi ma hlaya hi ku kongoma eBibeleni matsalwa lama kombisiweke kumbexana hi tlhela hi lunghiselela ku hlamula ha wona. Loko hi ri eminhlanganweni, hi fanele hi hlaya eTibibeleni ta hina loko xivulavuri xi ri karhi xi hlaya matsalwa. Ku dyondza matsalwa eBibeleni swi ta hi pfuna ku lunghekela ku “ri tamela khwatsi rito ra ntiyiso.”—2 Tim. 2:15.

³ Bibele A Yi Tivulavulele: Loko hi ri ensin’wini hi fanele hi endla leswaku Bibele yi tivulavulela. Hi xikombiso, loko swiyimo swi pfumela hi fanele hi ringeta ku hlayela n’wini wa muti tsalwa. Loko a vutisa xivutiso kumbe a kaneta swo karhi, swi kahle ku n’wi hlamula hi Bibele. Loko n’wini wa muti a khomekile, hi nga ha n’wi siya a ri karhi a anakanya hi ndzima ya Bibele, hi ku, “Ndzi nga si famba, ndzi kombela ku ku hlayela tsalwa rin’we.” Nkarhi wihi ni wihi loko swi koteka, hlaya tsalwa eBibeleni hi ku kongoma, kutani u kombela loyi u bulaka na yena leswaku a hlaya na wena tsalwa leri u ri hlayaka.

⁴ Loko n’wini wa muti wun’wana a kombiwe matsalwa lama kanetaka dyondzo ya Vunharhu-un’we, u hlamarile a ku, “Ndzi nghene kereke vutomi bya mina hinkwabyo kambe a ndzi nga swi tivi nikatsongo leswaku Bibele yi vula leswi!” U vhele a pfumela ku fambiseriwa dyondzo ya Bibele. Yesu u vule leswaku tinyimpfu ta yena ti ta yingisa rito rakwe. (Yoh. 10:16, 27) Ndlela ya kahle ngopfu yo pfuna lava timbilu letinene leswaku va tiva ntiyiso, i ku va va tivonela hi mahlo ya vona leswi Matsalwa ma swi vulaka. Hikwalaho, a hi veni valweri va Rito ra Xikwembu leri nga ntiyiso!