Dyondzisa Hi Ndlela Leyi Khorwisaka
1. I yini leswi minkarhi yo tala swi katsekaka loko hi tirhisa Rito ra Xikwembu hi vutshila evutirhelini?
1 Vatirheli lava nga ni vutshila ku fana na muapostola Pawulo, va pfumela leswaku ku “ri tamela khwatsi rito ra ntiyiso” swi katsa swo tala ku tlula ku tshaha Matsalwa yo Kwetsima. (2 Tim. 2:15) Loko hi tirhisa Rito ra Xikwembu, hi nga dyondzisa njhani hi ndlela leyi “khorwisaka”?—Mint. 28:23.
2. Hi nga va pfuna njhani vanhu leswaku va ya va ri xixima swinene Rito ra Xikwembu?
2 N’wi Kombe Leswi Rito Ra Xikwembu Ri Swi Vulaka: Xo sungula, dzikisa mianakanyo ya muyingiseri wa wena eBibeleni hi ndlela leyi nga ta endla a swi xiya leswaku yi tamele vutlhari lebyi humaka eka Xikwembu. Ku tshemba Rito ra Xikwembu swi nga susumetela muyingiseri wa hina ku rhiya ndleve loko hi n’wi hlayela tsalwa. (Hev. 4:12) Hi nga ha ku: “Ndzi kume swi vuyerisa ku tirhisa leswi Xikwembu xi swi vulaka hi mhaka leyi. Xiya leswi Rito ra xona ri swi vulaka.” Loko swi koteka a hi n’wi hlayeleni Rito ra Xikwembu hi ku kongoma.
3. Endzhaku ko hlaya tsalwa, i yini leswi hi nga swi endlaka ku vona loko muyingiseri wa hina a ri twisisa kahle tsalwa ra kona?
3 Xa vumbirhi, hlamusela tsalwa leri u ri hlayeke. Vanhu vo tala swa va tikela ku twisisa tsalwa leri va ri twaka ro sungula. Minkarhi yo tala hi fanele hi hlamusela ndlela leyi tsalwa ri fambisanaka ha yona ni mhaka leyi hi bulaka ha yona. (Luka 24:26, 27) Kandziyisa tinhla-nkulu ta tsalwa rero. Ku vutisa xivutiso swi nga ku pfuna ku vona loko munhu wa kona a ri twisisa kahle tsalwa rero.—Swiv. 20:5; Mint. 8:30.
4. Hi rihi goza ro hetelela leri nga ra nkoka leri nga hi pfunaka leswaku hi dyondzisa hi ndlela leyi khorwisaka?
4 Bulani Hi Matsalwa: Xa vunharhu, tiyimisele ku fikelela miehleketo ni mbilu. Pfuna n’wini wa muti a vona ndlela leyi tsalwa ri n’wi pfunaka ha yona. Ku bula ni munhu hi Matsalwa swi nga endla leswaku a cinca miehleketo yakwe. (Mint. 17:2-4; 19:8) Hi xikombiso, endzhaku ko hlaya Pisalema 83:18 hi nga ha bula hi ndlela leyi ku tiva vito ra munhu un’wana swi nga swa nkoka ha yona leswaku a va munghana wa hina. Kumbexana u nga vutisa u ku, “Xana u vona onge ku tiva vito ra Xikwembu swi nga endla leswaku swikhongelo swa wena swi ya swi va ni ntikelo?” Loko u pfuna n’wini wa muti a vona ndlela leyi tsalwa ri n’wi khumbaka ha yona, u ta va u kombisa ndlela leyi ri nga ra nkoka ha yona eka yena. Ku tirhisa Rito ra Xikwembu leswaku hi dyondzisa hi ndlela leyi khorwisaka swi pfuna vanhu va timbilu letinene leswaku va gandzela Xikwembu xa ntiyiso lexi hanyaka, ku nga Yehovha.—Yer. 10:10.