Ku Pfuna Van’wana Loko U Ri Entirhweni Wa Nsimu

1 Eku sunguleni ka rona, bandlha ra Vukriste a a ri ri nhlengeletano ya vavuri va evhangeli. Yesu hi yexe u letele vadyondzisiwa va yena entirhweni wa ku chumayela naswona “a va rhuma ha vambirhi-mbirhi.” (Marka 6:7; Luka 8:1) Muapostola Pawulo u boxe “vatirhi-kulorhi” ebandlheni ra Vafilipiya lava ‘tikarhateke swin’we na yena eka mahungu lamanene.’ (Vafil. 4:3) Hambi leswi swi nga fanelangiki minkarhi hinkwayo ku va ni munghana evutirhelini, vo tala va hina va tlangela ku famba ni van’wana. (Ekl. 4:9) Kutani, hi nga khutazana ni ku pfunana hi ndlela yihi loko hi chumayela?

2 Xin’wana xa swikongomelo swa minhlangano ya hina ya ntirho wa nsimu i ku nyikela mpfuno eka vahuweleri lavantshwa ni lava nga ni ntokoto wuntsongo. (om matl. 77, 97) Hambi ku ri maphayona lama ha ku vekiwaka ma nga ha lava ku tirha ni vahuweleri lava nga ni ntokoto lowu engetelekeke kumbe ni nkulu kumbe nandza wa vutirheli. Mawaku nkarhi lowunene swonghasi wo “tiyisana”!—Varhoma 1:12.

3 Hikwalaho ka swivangelo swa vuhlayiseki, swi nga ha va swinene leswaku vahuweleri va tirha swin’we eka tindhawu tin’wana. Kumbe minkarhi yin’wana swi nga ha va swi fanerile ku cinca makungu ya nkarhi lowu hundzeke yo tirha ni un’wana leswaku ku nghenisiwa vahuweleri lava nga riki na ntokoto lava teke enhlanganweni wa ntirho wa nsimu. Loko hi komberiwa ku endla tano, hakunene a swi ta va ndlela ya rirhandzu leswaku hi endla ku cinca kwihi na kwihi loku lavekaka leswaku hi “pfuna lava tsaneke,” hambi loko hakanyingi hi nga ha tirha ni munghana un’wana.—Mintirho 20:35.

TIRHANI HI KU TWANANA

4 Loko hi famba ni van’wana entirhweni wa nsimu, hi lava ku tirha hi ku twanana tanihi ntlawa. (Ringanisa 1 Vakorinto 3:6, 9.) Havambirhi va nga hlanganyela eku nyikeleni ka vumbhoni, kumbexana va nyiketana mabulo emindyangwini. Mikhuva leyinene yi lava leswaku hi yingisa hi xichavo na hi vukheta loko munghana wa hina a vulavula.

5 Hambi leswi swi nga ha vaka swi fanerile minkarhi yin’wana ku hlanganyela ebulwini loko munghana wa hina a rhangela, leswi swi lava ku avanyisa lokunene. A hi lavi ku kavanyeta nxaxamelo wa ku anakanyisisa lowu tirhisiwaka hi mbuyelo lowunene ni n’wini wa muti. Kavula, loko muhuweleri la nga riki na ntokoto a sungula ku nonon’hweriwa eku tameleni ka mhaka, a swi kanakanisi leswaku a a tlangela mpfuno lowu kongomeke swinene.—Ekl. 4:12.

6 Hi nga tirhisa nkarhi hi ndlela leyinene exikarhi ka tindlu leswaku hi bula hi tindlela leti mhaka ya hina yi nga ha antswisiwaka ha tona. Kumbexana ku tirhisa xin’wana xa swingheniso leswi nga ebukwini leyi nge Reasoning kumbe xiringanyeto lexi andlariweke eka Vutirheli Bya Hina Bya Mfumo swi nga ha va leswi humelelaka swinene. Ku tirha swin’we nakambe swi hi nyika nkarhi wo tivana kahle ni van’wana, swi tiyisa swiboho swa vumakwerhu bya hina bya Vukriste.

7 Vutirheli bya hina hakunene i rifuwo ra nkoka swinene. (2 Vakor. 4:1, 7) Tanihi leswi hi nga ni nkarhi wo tirha ni van’wana entirhweni wa nsimu, hi nga aka ku tlangela loku enteke eka ntirho wa hina wo kwetsima eka van’wana. Hi nkarhi lowu fanaka, hi ta kuma xikhutazo ni ku dyondzisana. Vuyelo byi ta va ntsako lowu engetelekeke, ku humelela lokukulu eku nyikeleni ka vumbhoni ni matimba lama anerisaka ya vun’we ni vamakwerhu va hina va xisati ni va xinuna.—Ps. 133:1.