Vana Mupfuni Lonene Entirhweni Wo Chumayela Hi Yindlu Ni Yindlu — Watchtower LAYIBURARI YA LE KA WEB SITE

Vana Mupfuni Lonene Entirhweni Wo Chumayela Hi Yindlu Ni Yindlu

1. Hi pfuneka njhani hi ku va ni muhuweleri loyi hi tirhaka na yena nsimu?

¹ Siku rin’wana Yesu u rhume vadyondzisiwa va 70 leswaku va ya chumayela naswona u ‘va rhume hi vambirhi-mbirhi.’ (Luka 10:1) A swi kanakanisi leswaku lunghiselelo leri ri endle leswaku vadyondzisiwa vakwe va pfunana va tlhela va khutazana loko va ri karhi va chumayela. Loko hi famba ni muhuweleri un’wana ensin’wini, xana hi nga n’wi pfuna hi ndlela yihi?

2. Loko muhuweleri loyi hi fambaka na yena a ri eku vulavuleni, ha yini hi fanele hi n’wi yingisela naswona sweswo hi nga swi endlisa ku yini?

² Rhiya Ndleve: Yingiserisisa hi vurhon’wana loko muhuweleri loyi u fambaka na yena a ri karhi a vulavula emutini. (Yak. 1:19) Loko ku hlayiwa tsalwa, na wena pfula Bibele ya wena. Languta munhu loyi a nga eku vulavuleni, ku nga ku ri loyi u fambaka na yena kumbe n’wini wa muti. Ku rhiya ka wena ndleve swi ta endla leswaku n’wini wa muti na yena a endla leswi fanaka.

3. Hi rini laha loyi hi fambaka na yena a nga lavaka leswaku hi n’wi pfuna?

³ Tiva Nkarhi Lowu U Faneleke U Vulavula Ha Wona: Loko muhuweleri loyi hi fambaka na yena a ri eku vulavuleni, hi ta va hi n’wi xixima loko hi nga n’wi kavanyeti. (Rhom. 12:10) Loko o tshuka a rivala leswi a a lava ku swi vula kumbe n’wini wa muti a n’wi vutisa xivutiso kutani a kombela mpfuno, hi fanele hi ringeta ku engetela eka leswi a swi vuleke ematshan’weni yo cinca bulo ivi hi sungula rin’wana. (Swiv. 16:23; Ekl. 3:1, 7) Leswi hi nga ta swi vula swi fanele swi fambisana ni leswi ana se swi nga vuriwa.—1 Kor. 14:8.

4. I yini leswi nga ta hi endla hi tsaka naswona swi hi fambela kahle ensin’wini?

⁴ Loko vadyondzisiwa va 70 lava a va famba hi vambirhi-mbirhi va hetile ku chumayela, va “vuy[e] va tsakile.” (Luka 10:17) Na hina hi ta tsaka naswona swi ta hi fambela kahle evutirhelini bya hina loko hi rhiya ndleve ni ku tiva nkarhi lowu hi faneleke hi vulavula ha wona leswaku hi pfuna lava hi fambaka na vona entirhweni wo chumayela hi yindlu ni yindlu.