Khutaza Loyi U Fambaka Na Yena eNsin’wini
1. Hi nga ri tekelela njhani langutelo ra muapostola Pawulo loko hi ri karhi hi tirha ni van’wana ensin’wini?
1 Muapostola Pawulo a a teka nkarhi lowu a a wu heta ni vapfumeri-kulobye wu ri nkarhi wa ku “khutazana.” (Rhom. 1:12) Loko u tirha ni muhuweleri un’wana ensin’wini, xana u tirhisa nkarhi wolowo leswaku u n’wi khutaza ni ku n’wi pfuna? Ematshan’weni ya ku famba mi miyerile, ha yini mi nga buli hi leswi ku pfuneke leswaku u va muhuweleri loyi a humelelaka?
2. Hi nga endla yini leswaku hi pfuna loyi hi fambaka na yena ensin’wini leswaku a va ni xivindzi naswona ha yini sweswo swi ri swa nkoka?
2 N’wi Endle A Va Ni Xivindzi: Vahuweleri van’wana a a va na xivindzi naswona leswi swi vonaka exikandzeni xa vona kumbe swi twala loko va ri karhi va vulavula. Hi nga va pfuna leswaku va va ni xivindzi hi ku va bumabumela swi huma embilwini. Hi tihi tindlela tin’wana leti hi nga va pfunaka ha tona leswaku va va ni xivindzi? Mulanguteri un’wana wa xifundzha u byela loyi a fambaka na yena swilo leswi n’wi chavisaka ni ndlela leyi a khongelaka ha yona nkarhi na nkarhi a kombela mpfuno wo hlula ku chava koloko. Makwerhu un’wana u vule leswi malunghana ni leswi n’wi pfunaka leswaku a va ni xivindzi: “Ndzi sungula hi ku n’wayitela. Minkarhi yin’wana a ndzi fanele ndzi khongela ndzi kombela mpfuno leswaku ndzi kota ku vulavula.” Xana ku na leswi swi ku pfuneke leswaku u va ni xivindzi ensin’wini? Swi byele munhu loyi u fambaka na yena ensin’wini.
3. I yini leswi hi nga bulaka ha swona ni munhu loyi hi fambaka na yena leswi nga n’wi pfunaka leswaku a va la humelelaka ensin’wini?
3 Bulani Hi Swingheniso: Xana ku ni xingheniso kumbe xivutiso lexi u kumeke xi olova ku xi tirhisa leswaku u sungula mabulo, lexi nga ha vaka xi fambisana ni xiendlakalo xo karhi xa le ndhawini ya ka n’wina? Xana u tshame u kuma vuyelo lebyinene hikwalaho ko engetela marito yo karhi eka xingheniso lexi ringanyetiweke? Byela loyi u fambaka na yena. (Swiv. 27:17) Loko mi ri karhi mi ya eka riendzo ro vuyela, u nga ha n’wi byela leswi u lavaka ku swi fikelela eka riendzo rolero ni ndlela leyi u kunguhateke ku swi fikelela ha yona. Endzhaku ka dyondzo ya Bibele, u nga ha n’wi hlamusela xivangelo xo va u hlawule yinhla yo karhi, tsalwa kumbe ndlela yo dyondzisa leswaku u pfuna xichudeni.
4. Ha yini hi fanele hi tsakela ku pfuna Vakreste-kulorhi?
4 Vakreste vo sungula a va nga tsakisiwi ntsena hi ku pfuna lava nga riki vapfumeri kambe a va teka ku khutazana ni ku tiyisana swi ri swa nkoka. (Mint. 11:23; 15:32) Muapostola Pawulo u letele Timotiya loko a ha ri muntshwa kutani a n’wi khutaza leswaku a avelana ni van’wana leswi a swi dyondzeke. (2 Tim. 2:2) Loko hi nga rivali ku endlela Vakreste-kulorhi leswi nga swinene loko hi ri ensin’wini, hi endla leswaku va tsaka hi tlhela hi tsakisa ni Tata wa hina wa le tilweni.—Hev. 13:15, 16.