Ku Antswisa Vutshila Bya Hina eNsin’wini—Ku Va Mutirhi-kulobye La Pfunaka

Lexi Endlaka Swi Va Swa Nkoka: Yesu u wu xiyile nkoka wa ku famba ni munhu un’wana entirhweni wo chumayela. Hikwalaho loko a rhumela vadyondzisiwa vakwe va 70 leswaku va rhanga emahlweni va ya chumayela, u va rhume hi vambirhi-mbirhi. (Luka 10:1) Muhuweleri a nga pfuna la fambaka na yena loko a langutana ni xiyimo xo tika kumbe loko a nga tiyiseki leswaku a nga n’wi hlamula njhani n’wini wa muti. (Ekl. 4:9, 10) A nga n’wi avela ntokoto wa yena naswona hi minkarhi yo karhi a nga ringanyeta swo karhi leswi nga ha pfunaka loyi a tirhaka na yena leswaku a va muhuweleri la nga ni vuswikoti. (Swiv. 27:17) A nga tlhela a n’wi khutaza hi ku bula na yena hi swilo leswi akaka loko va ri ensin’wini.—Filp. 4:8.

Ndlela Leyi U Nga Swi Endlaka Ha Yona:

Yingisela loko loyi u fambaka na yena a ri karhi a chumayela. (Yak. 1:19) Loko a hlaya tsalwa, fambisana na yena eBibeleni ya wena. Leswi swi ta endla leswaku u kota ku n’wi pfuna loko a lava mpfuno.
Vana ni vuxiyaxiya leswaku u kota ku vona leswaku hi rini laha u faneleke u vula swo karhi eka bulo rolero. (Swiv. 25:11) Loko u famba ni muhuweleri un’wana eka dyondzo ya Bibele, swi nga va swinene leswaku u pfa u vula swo karhi hi nkarhi wa dyondzo. Hambiswiritano, loko mi chumayela hi yindlu ni yindlu, loyi u fambaka na yena ensin’wini a nga ha tsakela leswaku u n’wi tshika a vulavula loko ku ri nkarhi wa yena wo vulavula. Entiyisweni, loko a ri muhuweleri lontshwa kumbe a nga tiyiseki leswaku a nga xi hlamula njhani xivutiso xo karhi kumbe munhu la lavaka ku siva bulo, a swi kanakanisi leswaku u ta wu tlangela mpfuno wa wena. Kambe loko u famba ni muhuweleri entirhweni wo chumayela hi yindlu ni yindlu, eka riendzo ro vuyela kumbe eka dyondzo ya Bibele, u nga n’wi ngheni enon’wini, u lawula bulo kumbe u sungula ku vulavula hi mhaka yin’wana.
N’wi avele ntokoto wa wena. Loko minkarhi yin’wana u vona swi fanerile ku ringanyeta swo karhi eka muhuweleri loyi u tirhaka na yena nsimu, leswi nga ta n’wi pfuna ku va ni vuswikoti ensin’wini, swi ringanyete. (Swiv. 3:27) Hi nkarhi lowu faneleke u nga ha sungula hi ku: “U anakanya leswaku swi fambe njhani?” kumbe “Xana ndzi nga ringanyeta swo karhi?” kumbe “Mina ndzi ringeta ku endla hi ndlela leyi.” Tsundzuka leswaku hambileswi van’wana va swi tlangelaka ku nyikiwa swiringanyeto hi minkarhi yo karhi, va ta hela matimba loko va lulamisiwa eka xihoxo xin’wana ni xin’wana lexi va xi endlaka.

Ringeta Ku Endla Leswi N’hweti Leyi:

Endzhaku ko tirha nsimu ni munhu wo karhi, n’wi byele leswi a swi vuleke kumbe leswi a swi endleke leswi endleke a va mutirhi-kulobye la pfunaka.