Tinyiketele Evutirhelini Bya Nsimu Xiyenge 3: Engetela Nhluvuko Wa Van’wana

1 Vuxaka exikarhi ka makwerhu lonkulu Pawulo na muntshwa la tinyiketeleke Timotiya hakanyingi byi tshahiwe tanihi xikombiso lexinene xa ndzetelo wa vutirheli. (1 Vakor. 4:17) Timotiya u kongomisiwe hi Pawulo ku nghenisa vutivi ni ndzetelo lowu fanaka ni lowu a wu kumeke eka van’wana. (2 Tim. 2:1, 2) Hi endla kahle hi ku landzela ndlela leyi fanaka ebandlheni namuntlha.

2 Letela Van’wana: Xilaveko xa ndzetelo xi va erivaleni loko hi xiya leswaku eAfrika Dzonga namuntlha ku na vahuweleri lava engetelekeke va kwalomu ka 8000 ku tlula lava a va ri kona malembe manharhu lama hundzeke. Entiyisweni vo tala va lava va ta pfuneka hi ndzetelo lowu vahuweleri lava nga ni ntokoto va nga ta wu nyikela. Makwerhu un’wana wa xisati loyi nkarhi na nkarhi a a heta awara yin’we kumbe timbirhi ntsena hi n’hweti entirhweni wa nsimu u dyondze ku vulavula hi laha ku humelelaka emakaya loko a pfuniwile hi muhuweleri la nga ni ntokoto. Ku nga tsakeli ka yena ko sungula ko hlanganyela evutirhelini ku nyamalarile, naswona u ve muhuweleri la chivirikaka wa mahungu lamanene. Sweswi tanihi phayona lerinene, u tsundzuka endzhaku ivi a ku: “Leswi a ndzi swi lava a ku ri ku dyondzisiwa leswi ndzi faneleke ku swi vula ntsena, kutani ndzi sungule ku tiphina hi vutirheli.”

3 Loko u ri nkulu, nandza wa vutirheli, phayona kumbe muhuweleri la nga ni ntokoto, u nga pfuneta njhani eka nhluvuko wa van’wana? Goza ro sungula ku ta va ku tivisa mufambisi wa Dyondzo ya Buku ya Bandlha ya wena leswaku u lava ku pfuna muhuweleri un’wana.

4 Hleleka Kutani U Lungheka: Swa pfu- na ku va ni nkarhi lowu kongomeke wo tirha swin’we. Munghana wa wena a nga ha va a chava kumbe a nga titshembi eku sunguleni, kambe u ta tlangela leswaku un’wana u tirha na yena leswaku a pfuneta loko ku va ni xilaveko. (Ekl. 4:9) Loko swi koteka, hlawula nsimu leyi mi talaka ku kuma vanhu lava tsakelaka ku bula hi tinhloko-mhaka ta Bibele. Leswi swi ta pfuna munhu lontshwa leswaku a katseka ivi xisweswo a kuma xivindzi.

5 Ku ya emahlweni ni ndzetelo lowu humelelaka, swi ta pfuna ku bula hi ndlela yo endla riendzo ro vuyela eka ku tsakela loku kumiweke. Sweswo swi katsa ku veka xisekelo eka riendzo ro sungula hi ku siya n’wini wa muti a ri na xivutiso lexi nga ta hlamuriwa loko mi tlhela mi vuya. Tiyiseka leswaku u pfuna muhuweleri la nga ni ntokoto wutsongo a lunghiselela, kutani u famba na yena eriendzweni. Loko dyondzo yi sunguriwa naswona muhuweleri lontshwa a nga si tiyiseka kahle hi vuswikoti bya yena, muhuweleri la nga ni ntokoto a nga ha navela ku fambisa dyondzo minkarhi yi nga ri yingani ku kondza munhu lontshwa a fanelekela ku byarha vutihlamuleri.

6 Hikwalaho ka ku khitikanela lokukulu ka vanhu lavantshwa enhlengeletanweni, vutlhari byo nyikela dyondzo leyikulu evutirhelini bya nsimu bya tipaluxa. Mpfuno wa laveka eka lava kuriseke vuswikoti bya vona entirhweni wo chumayela. Loko wo kota ku pfuna un’wana, hi ku famba ka nkarhi na yena u ta ‘fanelekela kahle ku dyondzisa van’wana.’—2 Tim. 2:2.