Ndlela Yo Dyondza Eka Vahuweleri Lava Nga Ni Ntokoto Swinene

Hi va teka va ri va risima vahuweleri lava nga ni ntokoto evandlheni. Van’wana va ni malembe yo tala va ri karhi va tirhela Yehovha hi ku tshembeka. Van’wana va nga ha va va nga ri na nkarhi wo leha va ri ni vuswikoti ensin’wini. Vahuweleri lava va vone ndlela leyi Yesu a ri kongomiseke ha yona vandlha ra Vakreste emasikwini lawa yo hetelela hi ku ndlandlamuxa ntirho wo chumayela ni wo endla vadyondzisiwa. (Mat. 28:19, 20) Loko va langutane ni swiphiqo ni miringo, va kume “matimba lama tlulaka lama tolovelekeke” hi ku endla ntirho lowu. (2 Kor. 4:7) Hi nga dyondza swo tala eka vahuweleri lava va nga ni ntokoto. Loko va nyikiwa nkarhi, va swi tsakela ku dyondzisa van’wana leswi va swi dyondzeke. (Ps. 71:18) Hikwalaho, hi fanele hi tinyika nkarhi wo dyondza eka vona. Hi nga swi endlisa ku yini leswi?

Ensin’wini. Vahuweleri lava ha riki vantshwa kumbe lava nga riki na ntokoto va fanele va leteriwa leswaku va ta va ni vuswikoti byo chumayela. Va nga dyondza swo tala hi ku xiyisisa ndlela leyi vahuweleri lava wupfeke va chumayelaka ha yona. (Vona Xihondzo xo Rindza xa February 15, 2015 exihlokweni lexi nge, “Tshama U Ri Karhi U Hisekela Ntirho Wo Chumayela,” ndzimana ya vunharhu ehansi ka xihlokwana lexi nge, “Pfuna Vahuweleri Lavantshwa.”) U vuyeriwe njhani hi ku tirha ni vanhu vo tano ensin’wini?

Xana u nga rhamba muhuweleri la nga ni vuswikoti leswaku a tirha na wena ensin’wini? Loko muhuweleri wa kona a vabya naswona a dyuharile, kumbexana minkarhi yin’wana u nga fambisa yin’wana ya tidyondzo ta wena ta Bibele ekaya ka yena. Loko u heta ku fambisa dyondzo, kombela swiringanyeto ni switsundzuxo eka muhuweleri wa kona.

Tinyike Nkarhi Wo Va Na Vona: Tinyike nkarhi wo va ni vahuweleri lava nga ni ntokoto leswaku u ta va tiva. Rhamba un’wana eka vugandzeri bya n’wina bya ndyangu u tlhela u burisana na yena. Loko muhuweleri wa kona a vabya naswona a dyuharile, xana ku nga endliwa malunghiselelo yo endla vugandzeri bya ndyangu ekaya ka yena? N’wi vutise leswaku u wu kume njhani ntiyiso. Hi yihi mikateko leyi a yi kumeke? Hi kwihi ku andza loku a ku voneke endhawini yoleyo? Hi wihi ntsako lowu a wu kumeke hileswi a tirhelaka Yehovha?

Va anakanyele naswona u nga languteli ku pfuniwa hi ndlela leyi va nga ta ka va nga yi koti. Vamakwerhu lava nga ni nkarhi wo leha va ri vahuweleri va ni tinyiko to hambanahambana entirhweni wa nsimu, ku fana na hina hinkwerhu. (Rhom. 12:6-8) Van’wana va dyuharile, hikwalaho sweswo swi nga endla leswaku va nga koti ku heta nkarhi wo tala na hina. Nilokoswiritano, hi nga dyondza swo tala eka vona hikwalaho ka ntokoto lowu va nga na wona va ri karhi va tirhela Yehovha hi ku tshembeka.