Ku Antswisa Vutshila Bya Hina eNsin’wini—Ndlela Yo Letela Vahuweleri Lavantshwa

Lexi Endlaka Swi Va Swa Nkoka: Vadyondzisiwa va Yesu lavantshwa va fanele va dyondza ku yingisa “swilo hinkwaswo” leswi a swi leriseke, leswi katsaka ku dyondzisa van’wana ntiyiso. (Mat. 28:19, 20) Vahuweleri vo tala lavantshwa se va nyikela tinkulumo eka Xikolo xa Vutirheli bya le Tilweni, naswona swi nga ha endleka leswaku se va chumayele maxaka kumbe vanghana va vona hi xitshuketa. Hambiswiritano, loko va ri karhi va twisisa leswi va swi dyondzaka naswona va sungula ku tiva leswaku Yehovha u lava leswaku vanhu hinkwavo va twa mahungu lamanene, va nga ha vula leswaku va tsakela ku huma nsimu. (Rhom. 10:13, 14) Loko vadyondzisiwa lavantshwa va pfumeleriwile ku va vahuweleri lava nga khuvuriwangiki, swi ta va swinene ku va letela kahle leswaku va ta va ni xivindzi loko va teka goza leri ri nga ta va pfuna ku antswisa vuxaka bya vona ni Xikwembu.—Luka 6:40.

Ndlela Leyi U Nga Swi Endlaka Ha Yona:

Pfuna muhuweleri lontshwa ku kuma minkandziyiso leyi a nga ta yi tirhisa loko a chumayela a tlhela a dyondzisa. N’wi kombe ndlela leyi u yi pakaka ha yona bege ya wena ya nsimu, u tlhela u n’wi hlamusela xivangelo xo va u teke minkandziyiso leyi u nga na yona.
Hlawulani xingheniso lexi kumekaka eka Vutirheli Bya Hina Bya Mfumo ivi mi xi praktisa. Khutaza muhuweleri lontshwa leswaku a vula xingheniso xolexo hi marito yakwe. Pfuxetani mahlelelo ya nkulumo lama nga ebukwini ya Xikolo Xa Vutirheli, eka tluka 82, lawa mi nga ma tirhisaka ensin’wini ya ka n’wina. N’wi byele leswaku i swa nkoka ku ambala ni ku tilunghisa hi ndlela leyinene.—2 Kor. 6:3, 4.
Yana emahlweni u n’wi letela. N’wi kombe khadi ra nsimu u tlhela u n’wi dyondzisa ndlela yo tsala lava tsakelaka ensin’wini. N’wi dyondzise ndlela yo tirhisa jw.org ensin’wini swin’we ni xibukwana lexi nge Good News for People of All Nations. N’wi pfune leswaku a ya emahlweni a pfuna lava kombiseke ku tsakela.—1 Kor. 3:6.
N’wi lehisele mbilu, u tlhela u n’wi bumabumela. (Swiv. 25:11) Vana xikombiso lexinene. Ku hiseka ni ku n’wi pfuna ka wena swi ta endla leswaku ku va ni vuyelo lebyinene emalembeni lama taka.

Ringeta Ku Endla Leswi N’hweti Leyi:

Tirha ni xichudeni xa wena eka vutirheli bya yindlu na yindlu, endzhaku u ya na xona eka riendzo ro vuyela kumbe eka dyondzo ya Bibele. Loko u nga ri na xona xichudeni, kombela muhuweleri la nga riki na ntokoto leswaku a tirha na wena.