Xiyenge 10: Letela Swichudeni Ku Chumayela Hi Yindlu Ni Yindlu
Ku Fambisa Tidyondzo Ta Bibele Leti Endlaka Nhluvuko
1 Xichudeni xa Bibele xi nga sungula ku huma nsimu swin’we ni vandlha loko vakulu va tiyiseka leswaku se xa faneleka ku va muhuweleri la nga khuvuriwangiki. (Vona buku leyi nge Ku Hleleriwa Ku Endla Ku Rhandza Ka Yehovha, matl. 79-81.) Hi nga xi pfuna njhani leswaku xi fikelela pakani ya xona ya ku chumayela hi yindlu ni yindlu?
2 Ku Lunghiselela Swin’we: I swa nkoka ku lunghiselela kahle. Komba xichudeni leswaku swingheniso swi kumeka kwihi eka Vutirheli Bya Hina Bya Mfumo ni le bukwini leyi nge Ku Hlamulana, u tlhela u xi pfuna ku hlawula xingheniso xo olova lexi tirhaka ensin’wini ya n’wina. Xi khutaze to ho suka leswaku xi tirhisa Bibele loko xi ri ensin’wini.—2 Tim. 4:2.
3 Ku toloveta muhuweleri lontshwa xingheniso swi ta n’wi pfuna ngopfu. Loko a ri karhi a phindha-phindha xingheniso xa yena, n’wi kombe ndlela ya vutlhari yo hlamula eka leswi vanhu va le nsin’wini ya n’wina va angurisaka xiswona. (Kol. 4:6) N’wi tiyisekise leswaku a swi bohi leswaku Vakreste va tiva tinhlamulo ta xivutiso xin’wana ni xin’wana lexi n’wini wa muti a nga ha va vutisaka xona. Hi ntolovelo swa antswa ku byela munhu yoloye leswaku wa ha ta endla ndzavisiso kutani u ta vuya mi ta bula ha xona xivutiso xexo.—Swiv. 15:28.
4 Ku Chumayela Swin’we: Loko xichudeni xi famba hi yindlu na yindlu ro sungula, xi tshike xi yingisela loko u ri karhi u tirhisa xingheniso lexiya mi xi lunghiseleleke swin’we. Kutani u xi nyika nkarhi leswaku na xona xi vula swo karhi. Minkarhi yin’wana, swi nga va swinene leswaku muhuweleri lontshwa a sungula kumbe a vula swo karhi eka xingheniso xexo, hi ku hlaya tsalwa a tlhela a ri hlamusela. Anakanyela vumunhu ni vuswikoti bya xichudeni. (Filp. 4:5) Xi bumabumele swi nyawula, naswona u ri karhi u xi letela ku chumayela eka swiyimo swo hambana-hambana swa vutirheli bya nsimu.
5 I swa nkoka ku pfuna muhuweleri lontshwa leswaku a tiendlela xiyimiso xa ku huma nsimu nkarhi hinkwawo, naswona loko swi koteka a huma vhiki ni vhiki. (Filp. 3:16) Endla malunghiselelo yo karhi leswaku mi tirha swin’we nsimu, u tlhela u n’wi khutaza leswaku a tirha ni vahuweleri lavan’wana lava hisekaka. Xikombiso xa vona ni vunghana bya vona swi ta n’wi pfuna leswaku a va ni vutshila naswona a tsakela ku chumayela hi yindlu na yindlu.