Xiyenge 11: Ku Pfuna Swichudeni Ku Endla Maendzo Yo Vuyela

Ku Fambisa Tidyondzo Ta Bibele Leti Endlaka Nhluvuko

¹ Loko xichudeni xa Bibele xi sungula ku huma nsimu, xi ta hlangana ni vanhu lava tsakelaka mahungu lamanene. Leswi xi nga muhuweleri lontshwa, xana hi nga xi pfuna njhani leswaku xi hlakulela ku tsakela ka vanhu lava xi vulavulaka na vona ni ku endla maendzo yo vuyela hi ndlela leyi vekaka mihandzu?

² Masungulo ya riendzo ro vuyela ma endliwa eka riendzo ro sungula. Khutaza xichudeni leswaku xi tsakela vanhu lava xi vulavulaka na vona. (Filp. 2:4) Hambeta u xi letela leswaku xi endla n’wini wa muti a tiphofula, naswona xi rhiya ndleve loko a ri karhi a vulavula, nileswaku xi tsala swilo leswi a karhatekaka ha swona. Loko munhu a tsakela, xi byele leswaku xi tsala rungula leri lavekaka hi munhu yoloye. Tirhisani rungula rero loko u ri karhi u xi pfuna ku lunghiselela leswi xi nga ta bula ha swona eka riendzo ro vuyela.

³ Ku Lunghiselela Riendzo Ro Vuyela: Pfuxetani leswi mi buleke ha swona eka riendzo ro sungula, ivi u komba muhuweleri lontshwa ndlela yo hlawula yinhla yo karhi ya rungula ra Mfumo leyi nga ta tsakisa n’wini wa muti. (1 Kor. 9:19-23) Lunghiselelani swin’we xingheniso xo koma, tsalwa rin’we ra Bibele kun’we ni ndzimana yin’we enkandziyisweni lowu a wu siyeleke n’wini wa muti. Ku engetela kwalaho, lunghiselelani xivutiso lexi a nga ta xi vutisa n’wini wa muti loko a gimeta bulo leswaku a andlala masungulo ya riendzo leri landzelaka. N’wi kombe ndlela leyi ha yona a nga hambetaka a ndlandlamuxa vutivi bya n’wini wa muti hi Rito ra Xikwembu nkarhi na nkarhi loko a vuyela eka yena.

⁴ Nakambe swa pfuna ku n’wi dyondzisa xingheniso xo olova. Endzhaku ko xewetana ni n’wini wa muti, a nga ha ku: “Ndzi tsakele ndlela leyi hi buleke ha yona siku leriya, kutani ndzi vuyile leswaku hi ya emahlweni ni bulo ra hina ra Bibele [boxa rungula ra kona].” U nga ha hlamusela muhuweleri lontshwa ndlela leyi a nga angulaka ha yona loko o kuma munhu un’wana ekaya.

⁵ Hisekela Ku Endla Maendzo Yo Vuyela: Khutaza xichudeni leswaku xi va xikombiso lexinene hi ku vuyela hi ku hatlisa eka hinkwavo lava tsakeleke rungula. Leswaku hi kuma vanhu emakaya, swi nga ha lava leswaku hi vuyela eka vona ko tala. Xi dyondzise ndlela yo byela n’wini wa muti leswaku xi ta tlhela xi vuya rini, u tlhela u xi pfuna leswaku xi twisisa xivangelo xo vuyela tanihi leswi xi tshembiseke. (Mat. 5:37) Tanihi leswi xi nga muhuweleri lontshwa, xi letele leswaku xi va ni musa, xi anakanyela van’wana ni ku va xixima loko xi ri karhi xi lavisisa lava fanaka ni tinyimpfu ni ku hlakulela ku tsakela ka vona.—Tito 3:2.