Xana Wa Tivuyerisa?

¹ Vanhu vo tala namuntlha va lava ku kuma ndlela leyi va nga tlhantlhaka swiphiqo ha yona leswaku va ta tsakela vutomi. Va tshama va ri karhi va hlaya tibuku leti endleriweke ku pfuna vanhu kumbe va ya eka mintlawa ni tinhlengeletano to karhi, leswaku va kuma ndlela leyi va nga antswisaka vutomi bya vona ha yona. Kumbexana van’wana va nga kombisa vuyelo byo karhi lebyi va byi kumeke. Kambe, loko u languta ndlela leyi vutomi byi nga xiswona namuntlha, xana hi ntolovelo mindzetelo ya vanhu yi swi kotile ku komba vanhu ndlela ya ku hanya vutomi lebyi nga ni ku rhula ni lebyi enerisaka hilaha ku heleleke? Swi le rivaleni leswaku a yi swi kotanga!—1 Kor. 3:18-20.

² Hi hala tlhelo, Muvumbi wa hina u hi nyika ndzetelo wa mahala lowu pfunaka swinene eka hinkwavo lava yingisaka. Yehovha u lava leswaku vanhu hinkwavo va vuyeriwa hi dyondzo yakwe. Hi malwandla u nyike vanhu Rito rakwe leri huhuteriweke leswaku ri va kongomisa hi vululami, naswona u endle leswaku mahungu lamanene ya Mfumo wakwe ma twarisiwa emisaveni hinkwayo. (Ps. 19:7, 8; Mat. 24:14; 2 Tim. 3:16) Vutomi lebyi nga ni ntsako wa xiviri byi fambisana hi ku kongoma ni ku yingisa swileriso swa Yehovha.—Esa. 48:17, 18.

³ Nkongomiso wa Yehovha wu wu tlula ekule lowu humaka etibukwini hinkwato leti endleriweke ku pfuna vanhu kumbe minhlangano ya ku tihluvukisa leyi misava yi yi simekeke. Hi nga kuma mpfuno wa xiviri ni lowu vuyerisaka hilaha ku heleleke loko hi ma tirhisa swinene malunghiselelo ya Yehovha, lama xaxametiweke eRitweni rakwe ni ku dyondzisiwa hi nhlengeletano yakwe.—1 Pet. 3:10-12.

⁴ Tivuyerise eMinhlanganweni Ya Vandlha: Namuntlha, Yehovha u swi kombisa kahle leswaku u rhandza ku hi dyondzisa tindlela takwe naswona ha vuyeriwa hi ku yingisa ndzetelo wakwe. Minhlangano ya hina ya ntlhanu evhikini yi swi veka erivaleni leswaku Yehovha u hi khathalela hi rirhandzu. Loko hi va kona eminhlanganweni ya vandlha, ku tiva ka hina Xikwembu ka kula. Hi dyondza ku tisirhelela eka leswo biha hi ku tshinela ekusuhi na Yehovha. Hi ndlela yoleyo ha tiya emoyeni.

⁵ A hi sweswo ntsena. Eminhlanganweni ya vandlha hi kota ku ‘ndlandlamuxa vuxaka bya hina.’ (2 Kor. 6:13) Leswi swi katsa ku tiva van’wana evandlheni. Hi vuyeriwa hi ku khutazana ko fana ni loku muapostola Pawulo a tsaleke ha kona eka papila rakwe leri yaka eka Varhoma. (Rhom. 1:11, 12) Loko a tsalela Vaheveru, u va laye ngopfu lava a va titoloveta mukhuva wa ku nga lavi ku va ni xinakulobye xa Vukreste.—Hev. 10:24, 25.

⁶ Ntsako wa ku eneriseka evuton’wini wu fambisana hi ku kongoma ni ku khathala hi vuhlayiseki bya van’wana. Hi khutaziwa ku lava tindlela ta ku endla leswaku van’wana va tshama va tsakile. Hikokwalaho, minhlangano ya hina ya Vukreste yi vuyerisa hina ni lava hi hlakulelaka xinakulobye lexinene na vona. Lexi lavekaka eka hina i ku hlanganyela hi mbilu hinkwayo.

⁷ Muapostola Pawulo u vule yinhla leyi fanaka loko a tsalela Timotiya ndzayo a ku: “Tiletele hi xikongomelo xa ku tinyiketela loku nga ni vukwembu.” (1 Tim. 4:7) Hi nga ha tivutisa: ‘Xana ndza tiletela? Xana ndzi dyondza ndzi ri ni xikongomelo xa ku vuyeriwa eka leswi ndzi swi twaka eminhlanganweni ya vandlha?’ Loko hi yingisa leswi hi swi twaka eminhlanganweni ni ku lwela ku swi tirhisa, nhlamulo ya hina yi ta va ina. A hi fanelanga hi teka dyondzo leyi yi ri leyi humaka eka vamakwerhu lava hi dyondzisaka ntsena, kambe hi mahlo ya mianakanyo, hi fanele hi vona Yehovha ku ri yena Muleteri Lonkulu wa vanhu va yena.—Esa. 30:20.

⁸ Xikolo Xa Vutirheli Bya Le Tilweni Ni Nhlangano Wa Ntirho: Minhlangano leyimbirhi yi lunghiseleriwe ku hi pfuna leswaku hi humelela evutirhelini bya Vukreste. Xikolo xa Vutirheli bya le Tilweni xi endliwe hi xikongomelo xexo—i xikolo lexi nga ni swichudeni leswi leteriwaka ni ku layiwa nkarhi ni nkarhi. U ni lunghelo ra ku kombisa nhluvuko wa wena tanihi xivulavuri xa le rivaleni ni mudyondzisi wa Rito ra Xikwembu. Kambe leswaku u vuyeriwa swinene exikolweni lexi, u fanele ku tsarisa, u va kona, u hlanganyela minkarhi hinkwayo ni ku nyikela tinkulumo leti u averiweke tona hi mbilu hinkwayo. Ku amukela ndzayo leyi nyikiwaka ni ku yi tirhisa swi ta ku pfuna leswaku u endla nhluvuko.

⁹ Nhlangano wa Ntirho wu hi dyondzisa nkoka wa vutirheli bya Vukreste ni ku hi kombisa ndlela leyi hi nga hlanganyelaka ha yona entirhweni wa ku endla vadyondzisiwa. Xana wena ni ndyangu wa wena ma vuyeriwa hi xitalo hi tinkulumo leti nyikeriwaka eka minhlangano leyimbirhi? Mpatswa lowu nga Vakreste wu ri: “Eka Nhlangano wun’wana wa Ntirho hi twe leswaku hi fanele ku dyondza ndzimana ya siku tanihi ndyangu. A hi nga endli tano kambe sweswi ha swi endla.” Xana va pfuneke njhani? Va ri: “Hi kuma leswaku hi ya hi tsakela ku burisana loko hi ri eku dyeni. A ha ha holovi hi nkarhi wa swakudya.” Xana vana va vuyeriwa hi minhlangano? Ina. Manana u ri: “Swi le rivaleni leswaku vana va hina va vuyeriwa swinene hi minhlangano leyi. Vhiki rin’wana hi xiye leswaku n’wana wa hina wa malembe ya tsevu hi vukhale a a ri eku hembeni. Kambe vhiki rero eminhlanganweni, nkulumo yo laya a yi vulavula hi ku hemba. N’wana wa hina u langute tata wakwe hi ndlela leyi kombisaka ku tisola ivi a fovela exitulwini xakwe. U yi kumile yinhla kutani a ha ha vanga na xiphiqo endzhaku ka sweswo.”

¹⁰ Makwerhu wa xisati la nga phayona u vula leswaku wa tsaka leswi Nhlangano wa Ntirho wu nyikelaka swiringanyeto swa ku antswisa vutirheli bya hina. Ha yini? Wa hlamusela: “Ndzi tala ku tolovela mukhuva wo karhi. Minkarhi yin’wana ndzi ehleketa leswaku leswi ringanyetiweke eka Vutirheli Bya Hina Bya Mfumo a swi nge tirhi. Kambe, eka Nhlangano wa Ntirho, loko hi byeriwa leswaku hi ringeta ku tirhisa swiringanyeto swo karhi, ndzi swi hisekela swinene ku swi tirhisa. Swi endla leswaku vutirheli byi tsakisa!” Endzhaku ka mavhiki ma nga ri mangani ku nyikiwe xiringanyeto xa ku ringeta ku sungula dyondzo ya Bibele leyintshwa eka riendzo ro sungula, u sungule dyondzo eka riendzo ro sungula ni nhwanyana loyi a a ri karhi a khongelela ku pfuniwa.

¹¹ Loko u yingisele nkulumo ya ndzayo ya Bibele malunghana ni swiboho leswi u tiendlelaka swona, xana wa swi lemuka leswaku Yehovha u vulavula na wena hi ku kongoma? Makwerhu un’wana u titwe hi ndlela yoleyo. U te: “Sweswinyana enhlanganweni wa hina, ku nyikeriwe nkulumo leyi eka yona makwerhu a hlamuseleke vuhungasi lebyi faneleke ni lebyi nga fanelangiki Vakreste. A ndzi rhandza ku hlalela ntlango wa swibakela eka thelevhixini. Kambe endzhaku ka nhlangano wolowo, ndzi vone leswaku ntlango lowu wu wela eka vuhungasi lebyi nga va fanelangiki Vakreste. Kutani a ndza ha wu hlaleli.” Ina, hambileswi makwerhu loyi a a rhandza ntlango lowu ni madzolonga, hi ku titsongahata u amukele ku kongomisiwa hi Yehovha.—Ps. 11:5.

¹² Nhlangano Wa Le Rivaleni, Dyondzo Ya Xihondzo xo Rindza Ni Dyondzo Ya Buku Ya Vandlha: Tinkulumo ta le rivaleni leti hi ti yingiselaka vhiki ni vhiki ti hlanganisa timhaka to hambana-hambana ta le Bibeleni. I yini lexi u xi kumaka eka tinkulumo leti? Wanuna un’wana la nga Mukreste u vule leswi malunghana ni vuyelo lebyi a byi kumeke: “Nkulumo yin’wana ya le rivaleni yi kandziyise mihandzu hinkwayo ya moya. Loko xivulavuri xi vulavula hi xona n’wini, xi vule leswaku xi kota ku hlakulela mihandzu leyi hi ku hlawula mbhandzu wun’we kutani xi lwela ku wu tirhisa vhiki rero. Loko vhiki rero ri hela, xi languta ndlela leyi xi koteke ku tirhisa mbhandzu wolowo emintirhweni ya xona ya siku ni siku. Kutani evhikini leri tlhandlamaka xi tirhela eka mbhandzu wun’wana. Ndzi yi rhandzile yinhla yoleyo kutani na mina ndzi sungule ku endla tano.” Mawaku ndlela leyinene ya ku tirhisa leswi dyondziweke!

¹³ Dyondzo ya Xihondzo xo Rindza yi hi dyondzisa ku tirhisa misinya ya milawu ya Bibele eswiyin’weni swo hambana-hambana swa vutomi. Sweswo swi hi pfuna leswaku hi tshama hi rhulile emianakanyweni ni le timbilwini ku nga khathariseki mivilelo ya vutomi. Dyondzo ya Xihondzo xo Rindza yi tlhela yi hi endla hi tshama hi ri karhi hi fambisana ni ntiyiso. Hi xikombiso, xana a hi vuyeriwanga eka dyondzo ya swihloko swa Xihondzo xo Rindza xa May 1, 1999, leswi nge: “Swilo Leswi Swi Fanele Ku Endleka,” “Muhlayi A A Twisise,” ni lexi nge “Hiteka, U Gingiriteka!” Xana tidyondzo leti ti ku vuyerise njhani wena hi wexe? Xana swiendlo swa wena swi kombisa leswaku u xi tekele enhlokweni xitsundzuxo xa Yesu malunghana ni vumundzuku? Xana u tilunghiselela miringo leyi taka loko hi vona “nchumu lowu nyenyetsaka lowu onhetelaka, . . . wu yime endhawini yo kwetsima”? (Mat. 24:15-22) Xana tipakani ta wena ni mahanyelo ya wena swi kombisa leswaku nchumu wa nkoka swinene eka wena a hi ku hlengeleta swilo leswi vonakaka, kambe i ku kwetsimisa vito ra Yehovha? Eka Dyondzo ya Xihondzo xo Rindza, xana a hi dyondzi ku tivuyerisa sweswi?

¹⁴ Anakanya swilo swo tala leswi hi swi dyondzaka eka Dyondzo ya Buku ya Vandlha vhiki rin’wana ni rin’wana. Sweswi hi dyondza buku ya Bibele ya Daniyele. Eka tin’hweti ta mune hi ri karhi hi dyondza buku leyi ya Bibele, xana a hi ri vonanga ripfumelo ra hina ri kula vhiki rin’wana ni rin’wana? Ku fana na Daniyele muprofeta wa Yehovha la rhandzekaka, hi tiyisa ripfumelo ra hina leswaku hi kota ku tiyisela.

¹⁵ Yehovha U Hi Dyondzisa Leswaku Hi Tshama Hi Tsakile: Loko hi nyikela nyingiso eka swileriso swa Xikwembu hi papalata mbitsi leyikulu. Tlhandlakambirhi, hi kota ku tiva leswaku swi vula yini ku tshama hi tsakile. Hi ku landzela nkongomiso wa Yehovha, hi va lava hlanganyelaka entirhweni wakwe, ku nga ri ku va vahlaleri ntsena. Naswona lava endlaka ntirho wa Xikwembu va tshama va tsakile.—1 Kor. 3:9; Yak. 1:25.

¹⁶ Anakanyisisa hi ndlela leyi u nga ta swi tirhisa ha yona leswi u swi twaka eminhlanganweni ya vandlha. (Yoh. 13:17) Hisekela ku tirhela Xikwembu hi mbilu hinkwayo. Ntsako wa wena wu ta khapakhapa. Vutomi bya wena byi ta va lebyi fuweke ni lebyi nga ni xikongomelo hilaha ku engetelekeke. Ina, u ta tivuyerisa.