Vantshwa Va Vuyeriwa Hi Minhlangano

¹ Nhwanyana wa kondlo-a-ndzi-dyi u te: “Minkarhi yin’wana ndzi teriwa hi mianakanyo ya leswaku hina vantshwa hi khome xo tika evuton’wini. Hi hanya ni vanhu lava endlaka vumbhisa, lava tirhisaka swidzidzirisi ni swindzendzele.” Xana u titwa hi ndlela yoleyo? Loko swi ri tano, u anakanya leswaku i yini lexi nga ku pfunaka ku lwa ni minkucetelo leyi yo biha? U fanele ku va ni ripfumelo, ina ripfumelo leri tiyeke etindleleni leti lulameke ta Yehovha, hikuva handle ka ripfumelo “a swi koteki ku [n’wi] tsakisa kahle.” (Hev. 11:6) Ku va kona eminhlanganweni ya vandlha swi ta ku pfuna leswaku u tiyisa ripfumelo ra wena ra Vukreste ni ku tiyimisela ka wena ku papalata swo biha.

² Minhlangano Yi Ni Swo Tala Leswi Yi Nga Ku Pfunaka Ha Swona: I yini lexi endlaka leswaku swakudya swi nandziha loko u ri ni vanghana va wena lavakulu? Xana a hi ku hlangana ni vanghana lavanene eswakudyeni, endhawini leyi rhuleke? Ina, minhlangano ya hina na yona yi tano, kambe hi tlhelo ra moya.

³ Swilo leswi hlamuseriwaka eminhlanganweni swa aka, swi katsa timhaka leti vulavulaka hi ndlela yo hlangavetana ni swiphiqo swa vutomi bya siku ni siku ni tidyondzo leti tsakisaka ta vuprofeta bya Bibele. Ku nyikeriwa ndzayo leyi tirhaka, leyi ku dyondzisaka ndlela ya ku hanya vutomi lebyinene ni ku langutana ni mintlhontlho leyi u hlanganaka na yona. U nge va kumi vanghana vo antswa ku fana ni lava kumekaka eminhlanganweni, kasi xiyimo xa moya lexi nga kona xa tsakisa naswona i xisirhelelo. (Ps. 133:1) A swi hlamarisi leswi muntshwa un’wana a nga te: “Ndzi heta siku hinkwaro ndzi ri exikolweni kutani sweswo swi ndzi heta mongo. Kambe minhlangano yi fana ni xihlovo emananga, laha ndzi kumaka matimba ya ku kota ku langutana ni siku leri tlhandlamaka exikolweni.” Un’wana u te: “Ndzi kume leswaku ku tolovelana swinene ni vanhu lava rhandzaka Yehovha swi ndzi pfuna ku va ekusuhi na yena.”

⁴ Loko u tsarisile eXikolweni xa Vutirheli bya le Tilweni, u dyondza ku hlengeleta rungula ra Bibele, u ri vumba ri va nkulumo kutani u ri nyikela hi ndlela leyi twalaka eka vayingiseri eHolweni ya Mfumo. Anakanya vuyelo lebyi u byi kumaka hi ku leteriwa ku va ni vutshila bya ku dyondzisa mintiyiso ya Rito ra Xikwembu leyi ponisaka vutomi! Hi kwihi kun’wana laha vantshwa va nga kumaka ndzetelo wo tano wa risima?

⁵ Ndlela Yo Vuyeriwa Swinene eMinhlanganweni: Leswaku u vuyeriwa swinene eminhlanganweni, ku laveka swilo swinharhu swa nkoka. Swilo leswi i ku lunghiselela, ku hlanganyela ni ku tirhisa leswi u swi dyondzeke.

⁶ Yi Lunghiselele: Tivekele nkarhi wa ku lunghiselela minhlangano minkarhi hinkwayo. U nga pfumeleli ntirho wa xikolo, ntirho wa xinkarhana wa ku tihanyisa kumbe vuhungasi swi ku tekela nkarhi wa wena wa ku ri lunghiselela ka ha ri ni nkarhi rungula leri nga ta dyondziwa eminhlanganweni. Swa pfuna ku va ni xiyimiso lexinene. Xa nkoka ngopfu i ku fambisana ni ku hlayiwa ka Bibele, hi ku landza nongonoko wa vhiki ni vhiki wa Xikolo xa Vutirheli bya le Tilweni. Swi teka nkarhi wutsongo siku rin’wana ni rin’wana ku hlaya tindzima leti kombiweke u tlhela u anakanyisisa ha tona. Tivekele nkarhi wa ku lunghiselela Dyondzo ya Buku ya Vandlha ni Dyondzo ya Xihondzo xo Rindza. Van’wana va lunghiselela ka ha sele siku kumbe mambirhi leswaku ku khomiwa minhlangano yoleyo. Loko swi koteka, endla leswi fanaka ni hi tidyondzo leti nga ta dyondziwa eka Nhlangano wa Ntirho wa vhiki rin’wana ni rin’wana.

⁷ Hlanganyela Eka Yona: Bibele yi vula leswaku loko Yesu a ri ni malembe ya 12 hi vukhale, u kumiwe etempeleni a ri karhi a yingisela, a vutisa swivutiso ni ku hlamula. (Luka 2:46, 47) Leswi vulaka leswaku a a katseke hi ku helela ebulwini rero. Na wena u ta vuyeriwa swinene eminhlanganweni loko u endla matshalatshala ya ku hlanganyela eka yona.—Swiv. 15:23.

⁸ U fanele ku nyikela nyingiso lowukulu eka leswi dyondzisiwaka eminhlanganweni. Minkarhi yin’wana swa tika ku yingisela nkulumo ku tlula loko u yi nyikela. Ha yini? Mianakanyo ya wena yi nga pfa yi tsendzeleka loko un’wana a ri eku vulavuleni. Xana u nga swi hlurisa ku yini sweswo? Hi ku tsala tinhla. Tsala tinhla ta nkoka leti u lavaka ku ti tirhisa nkarhi wun’wana. Ku tsala tinhla ku ta ku pfuna leswaku u tshama u xalamukile eminhlanganweni. Nakambe, pfula matsalwa naswona u hlaya swin’we ni xivulavuri loko xi ri karhi xi hlaya.

⁹ Ku engetela kwalaho, tivekele pakani ya ku hlamula eka tinkulumo leti nga ta hlanganisiwa hi swivutiso ni tinhlamulo eminhlanganweni. U ta vuyeriwa swinene loko wo rhanga hi ku anakanyisisa hi leswi u lavaka ku swi vula. Swivuriso 15:28 yi ri: “Mbilu ya lowo lulama ya anakanyisisa leswaku a ta hlamula.”

¹⁰ Tirhisa Leswi U Swi Dyondzaka: Goza ro hetelela i ku tiyiseka leswaku leswi u swi dyondzaka swa ‘tirha eka wena.’ (1 Tes. 2:13) Loko u ri karhi u ti tirhisa tinhla letinene leti u ti dyondzaka eka nhlangano ha wun’we, u ta va ekusuhi na Yehovha Xikwembu. U ta va wa xiviri eka wena naswona wena u ta kuma ntsako lowukulu ni ku eneriseka loko u “tama [u] famba entiyisweni,” u wu endla wu va wa wena.—3 Yoh. 4.

¹¹ Vamakwerhu lavantshwa, loko nkarhi ni nkarhi mi lunghiselela minhlangano, mi hlanganyela eka yona kutani mi tirhisa leswi mi swi dyondzeke, minhlangano yi ta mi tsakisa swinene. Hi nkarhi lowu fanaka, yi ta mi vuyerisa swinene. Ripfumelo ra n’wina ri ta tiyisiwa naswona ku tiyimisela ka n’wina ku tshama mi tshembekile eka Tata wa n’wina wa le matilweni, Yehovha na kona ku ta tiyisiwa.—Ps. 145:18.