Ndlela Leyi Yehovha A Hi Kongomisaka Ha Yona
“U ndzi rhangela endleleni ya vululami.”—PISALEMA 27:11.
1, 2. (a) Xana Yehovha u va kongomisa njhani vanhu va yena namuntlha? (b) Xana swi katsa yini ku ri tirhisa hilaha ku teleke lunghiselelo ra minhlangano?
YEHOVHA i Xihlovo xa ku vonakala ni ntiyiso, hilaha hi dyondzeke hakona exihlokweni lexi hundzeke. Rito ra yena ri voninga ndlela ya hina loko hi ri karhi hi famba endleleni ya vululami. Yehovha u hi kongomisa hi ku hi letela tindlela ta yena. (Pisalema 119:105) Ku fana ni mupisalema wa khale, hi angula hi ntsako eka nkongomiso wa Xikwembu ivi hi khongela hi ku: “Oho Yehovha, ndzi letele malunghana ni ndlela ya wena, u ndzi rhangela endleleni ya vululami.”—Pisalema 27:11.
2 Ndlela yin’wana leyi Yehovha a yi tirhisaka ku nyikela ndzetelo i minhlangano ya Vukreste. Xana hi ri tirhisa hilaha ku teleke lunghiselelo leri ra rirhandzu hi (1) ku va kona nkarhi na nkarhi, (2) hi ku yingiserisisa nongonoko ni hi (3) ku lunghekela ku hlanganyela loko vayingiseri va komberiwa ku hlanganyela? Ku tlula kwalaho, xana hi angula hi ntsako loko hi kuma swiringanyeto leswi nga ta hi pfuna ku tshama “endleleni ya vululami”?
Xana U Hlanganyela Njhani eMinhlanganweni?
3. Xana mutirheli un’wana wa nkarhi hinkwawo u wu hlakulele njhani mukhuva lowunene wa ku va kona eminhlanganweni nkarhi na nkarhi?
3 Vahuweleri van’wana va Mfumo va sungule ku va kona eminhlanganweni nkarhi na nkarhi ku sukela evuhlangini. Mutirheli un’wana wa nkarhi hinkwawo loyi a nga Mbhoni ya Yehovha u ri: “Loko mina na vasesi wa mina ha ha kula hi va-1930, a hi nga kali hi va vutisa vatswari va hina loko ku yiwa enhlanganweni. A hi swi tiva leswaku ha ya handle ka loko hi vabya. Ndyangu wa ka hina a wu nga xwi eminhlanganweni.” Ku fana ni muprofeta wa xisati Ana, makwerhu loyi wa xisati a “nga kali” endhawini yo gandzela Yehovha eka yona.—Luka 2:36, 37.
4-6. (a) Ha yini vahuweleri van’wana va Mfumo va xwa eminhlanganweni? (b) Ha yini swi ri swa nkoka swinene ku va kona eminhlanganweni?
4 Xana u va kona eminhlanganweni ya Vukreste nkarhi na nkarhi, kumbe u ya hi xiwelo? Vakreste van’wana lava a va anakanya leswaku a va ya kahle eminhlanganweni va endle xiboho xo tikambisisa. A va tsala minhlangano hinkwayo leyi va yeke eka yona, ku ringana mavhiki yo hlayanyana. Loko va kambisisa rhekhodo eku heleni ka nkarhi lowu va tivekeleke wona, va hlamarisiwe hi ku vona nhlayo ya minhlangano leyi va yi xweke.
5 Un’wana a nga ha ku, ‘A swi hlamarisi. Vanhu va tshikileleke swinene namuntlha lerova a swi va oloveli ku va kona eminhlanganweni nkarhi na nkarhi.’ I ntiyiso leswaku hi hanya eminkarhini leyi nonon’hwaka swinene. Ku engetela kwalaho, a swi kanakanisi leswaku ntshikilelo wa kona wu ta engeteleka. (2 Timotiya 3:13) Kambe xana sweswo a swi swi endli swi va swa nkoka ngopfu ku va kona eminhlanganweni nkarhi na nkarhi? A hi nge vi na matimba ya ku lwisana ni ntshikilelo lowu hi vangeriwaka wona hi mafambiselo lawa, loko hi nga dyi swakudya leswinene swa moya nkarhi na nkarhi leswaku swi hi tiyisa. Phela, loko hi nga hlangani nkarhi na nkarhi ni van’wana hi nga ha ringeka leswaku hi fularhela “ndlela ya lavo lulama,” hilaha ku heleleke! (Swivuriso 4:18) I ntiyiso, loko hi fika ekaya endzhaku ka ku va hi tirhe hi matimba, a hi minkarhi hinkwayo hi nga ha titwaka hi lava ku ya enhlanganweni. Hambiswiritano, loko hi ya hambi hi karhele, ha vuyeriwa, naswona hi khutaza Vakreste-kulorhi eHolweni ya Mfumo.
6 Vaheveru 10:25 yi kombisa xivangelo xin’wana xa nkoka lexi hi susumetelaka ku ya eminhlanganweni nkarhi na nkarhi. Kwalaho muapostola Pawulo u khutaza Vakreste-kulobye leswaku va hlengeletana ‘hilaha ku engetelekeke ngopfu tanihi leswi va vonaka siku ri tshinela.’ Ina, a hi fanelanga hi honisa mhaka ya leswaku “siku ra Yehovha” ri tshinele. (2 Petro 3:12) Loko ho tibyela leswaku makumu ya mafambiselo lawa ma ha ri ekule swinene, hi nga ha sungula ku pfumelela leswaku mintirho ya hina yi siva mintirho ya nkoka ya moya, yo tanihi ku va kona eminhlanganweni. Kutani hilaha Yesu a tsundzuxeke hakona, ‘hi xitshuketa siku rero ri nga hi wela hi xihatla.’—Luka 21:34.
Vana Muyingiseri Lonene
7. Ha yini swi ri swa nkoka leswaku vana va nyikela nyingiso eminhlanganweni?
7 Ku ya eminhlanganweni leswaku u hetisa nawu a swi enelanga. Hi fanele hi rhiya ndleve swinene, hi nyikela nyingiso eka leswi vuriwaka. (Swivuriso 7:24) Ni vana va hina va fanele va endla tano. Loko n’wana a ya exikolweni, ku languteriwe leswaku a yingisela mudyondzisi, hambiloko dyondzo yo karhi yi nga n’wi tsakisi kumbe a nga yi twisisi. Mudyondzisi wa swi tiva leswaku loko n’wana a ringeta ku nyikela nyingiso, u ta vuyeriwa hi ndlela yo karhi eka dyondzo ya kona. Kutani, xana a swi twali leswaku vana lava nghenaka xikolo va yingisela leswi dyondziwaka eminhlanganweni ya vandlha ku ri na ku tshikiwa va etlela loko minhlangano yi sungula? I ntiyiso, swin’wana swa swilo swa risima leswi kumekaka eMatsalweni i “swilo swo karhi leswi nonon’hwaka ku swi twisisa.” (2 Petro 3:16) Kambe a hi fanelanga hi byi tekela ehansi vuswikoti bya n’wana byo dyondza. Xikwembu a xi byi tekeli ehansi. Eminkarhini ya ku tsariwa ka Bibele, xi lerise malandza ya xona lama ha riki matsongo leswaku ma ‘yingisa ni ku dyondza ni ku chava Yehovha ni ku khathalela ku hetisisa marito hinkwawo ya nawu lowu,’ lawa man’wana ya wona handle ko kanakana a swi va tikela vana leswaku va ma twisisa. (Deteronoma 31:12; ringanisa Levhitika 18:1-30.) Xana Yehovha u langutele leswi fanaka eka vana namuntlha?
8. Hi wahi magoza lawa vatswari van’wana va ma tekaka leswaku va pfuna vana va vona va rhiya ndleve eminhlanganweni?
8 Vatswari lava nga Vakreste va swi xiya leswaku swilaveko swa vana va vona swa moya swa enerisiwa katsongo hi leswi va swi dyondzaka eminhlanganweni. Hikwalaho, vatswari van’wana va hlela leswaku vana va vona va etlelanyana va nga si ya eminhlanganweni leswaku va ta fika eHolweni ya Mfumo va phyuphyile naswona va lunghekele ku dyondza. Vatswari van’wana va nga ha hlela leswaku vana va vona va nga yi hlaleli ngopfu thelevhixini, kumbe hi vutlhari va hlela leswaku va nga yi hlaleli nikatsongo hi masiku ya minhlangano. (Vaefesa 5:15, 16) Naswona vatswari vo tano va hunguta swikavanyeti, va khutaza vana va vona ku yingisela ni ku dyondza, hi ku ya hi vuswikoti bya malembe ya vona.—Swivuriso 8:32.
9. I yini lexi nga hi pfunaka ku hlakulela vuswikoti bya hina byo yingisela?
9 Yesu a a vulavula ni vanhu lavakulu loko a ku: “Nyikelani nyingiso eka ndlela leyi mi yingisaka ha yona.” (Luka 8:18) Sweswo swa olova ku swi vula masiku lawa ku ri na ku swi endla. Hakunene, ku rhiya ndleve swinene swa nononh’wa, kambe vuswikoti byo yingisa byi nga hlakuleriwa. Loko u ri karhi u yingisela nkulumo yo karhi enhlanganweni, ringeta ku kuma tinhla-nkulu. Langutela leswi xivulavuri xi nga ta swi vula. Xiya tinhla leti u nga ti tirhisaka evutirhelini bya wena kumbe leti u nga ti tirhisaka evuton’wini bya wena. Pfuxeta tinhla emianakanyweni ya wena loko ti ri karhi ti vuriwa. Tsala tinhla to koma.
10, 11. Xana vatswari van’wana va va pfune njhani vana va vona leswaku va va vayingiseri lavanene, naswona hi wahi maendlelo lawa u ma kumeke ma pfuna swinene?
10 Mikhuva leyinene yo yingisela yi dyondziwa kahle evuhlangini. Hambiloko vana va nga si dyondza ku hlaya ni ku tsala, vatswari van’wana va khutaza vana va vona lava nghenaka xikolo xa tindzumulo leswaku va tsala “tinhla” hi nkarhi wa minhlangano. Va tsala ephepheni loko ku vuriwa marito lama tolovelekeke yo tanihi “Yehovha,” “Yesu,” kumbe “Mfumo.” Hi ndlela leyi, vana va nga dyondza ku nyikela nyingiso eka leswi vuriwaka eplatifomo.
11 Hambi ku ri vana lava kulekenyana na vona minkarhi yin’wana va lava ku khutaziwa leswaku va nyikela nyingiso. Wanuna un’wana la nga nhloko ya ndyangu, hi ku xiya leswaku mianakanyo ya xifanyetana xa yena xa malembe ya 11 hi vukhale a yi ri eku yingayingeni hi nkarhi wa ntsombano wa Vukreste, u xi nyikete Bibele ivi a xi kombela ku pfula matsalwa loko ma ri karhi ma vuriwa hi swivulavuri. Tata wa kona loyi a ri eku tsaleni ka tinotsi, u langute n’wana wa yena a ri karhi a pfula Bibele. Endzhaku ka sweswo, mufana loyi u rhiye ndleve swinene eka nongonoko wa ntsombano.
Endla Leswaku Rito Ra Wena Ri Twiwa
12, 13. Ha yini swi ri swa nkoka ku hlanganyela eku yimbeleleni ni vandlha?
12 Hosi Davhida u yimbelerile a ku: “Ndzi ta rhendzeleka ealitarini ya wena, Wena Yehovha, ndzi endla leswaku ku nkhensa ku twala swinene.” (Pisalema 26:6, 7) Minhlangano ya Timbhoni ta Yehovha yi hi nyika minkarhi leyinene ngopfu ya leswaku hi phofula ripfumelo ra hina hi marito. Ndlela yin’wana leyi hi nga endlaka leswi ha yona i ku hlanganyela eku yimbeleleni ni vandlha. Leyi i mhaka ya nkoka ya vugandzeri bya hina, kambe yi nga honisiwa hi ku olova.
13 Vana van’wana lava nga si swi kotaka ku hlaya va nhlokohata marito ya tinsimu ta Mfumo leti nga ta yimbeleriwa eminhlanganweni ya vhiki na vhiki. Va tsaka swinene loko va kota ku yimbelela swin’we ni vanhu lavakulu. Hambiswiritano, loko vana va kulanyana, va nga ha sungula ku nga ha swi tsakeli ngopfu ku yimbelela tinsimu ta Mfumo. Vanhu van’wana lavakulu na vona va chava ku yimbelela eminhlanganweni. Kambe, ku yimbelela i xiphemu xa vugandzeri bya hina, hilaha vutirheli bya nsimu na byona byi nga xiphemu xa vugandzeri bya hina. (Vaefesa 5:19) Hi endla hilaha hi nga kotaka hakona leswaku hi dzunisa Yehovha evutirhelini bya nsimu. Xana a hi nge tlheli hi n’wi dzunisa hi ku tlakusa marito ya hina—ku nga khathariseki leswaku hi ni marito yo tlhavula kumbe a hi na wona—hi yimbelela tinsimu to n’wi dzunisa hi mbilu hinkwayo?—Vaheveru 13:15.
14. Ha yini timhaka leti hi dyondzaka ha tona eminhlanganweni ya vandlha ti lava ku lunghiseleriwa kahle ka ha ri na nkarhi?
14 Hi dzunisa Xikwembu nakambe hi ku nyikela tinhlamulo leti akaka hi nkarhi wa minhlangano ya hina leyi lavaka leswaku vayingiseri va nyikela tinhlamulo. Leswi swi lava ku lunghiselela. Swi teka nkarhi wo leha leswaku u anakanyisisa hi swilo leswi enteke swa Rito ra Xikwembu. Muapostola Pawulo, xichudeni lexi hisekelaka Matsalwa, u swi xiyile leswi. U tsale a ku: “Mawaku ku enta ka rifuwo ni vutlhari ni vutivi bya Xikwembu!” (Varhoma 11:33) Tinhloko ta mindyangu, i swa nkoka leswaku mi pfuna xirho xin’wana ni xin’wana xa ndyangu wa ka n’wina leswaku xi lavisisa vutlhari bya Xikwembu, lebyi paluxiweke eMatsalweni. Tivekele nkarhi wo karhi eka dyondzo ya ndyangu ya Bibele leswaku u hlamusela tinhla ta nkoka u tlhela u pfuna ndyangu wa wena leswaku wu lunghiselela minhlangano.
15. Hi swihi swiringanyeto leswi nga pfunaka munhu leswaku a hlamula eminhlanganweni?
15 Loko u lava ku hlamula ko tala eminhlanganweni, ha yini u nga lunghiseleli ka ha ri na nkarhi leswi u navelaka ku swi vula? A ku laveki nhlamulo yo leha. Ndzimana ya Bibele leyi faneleke, leyi hlayiwaka hi ku khorwiseka kumbe marito ma nga ri mangani lama hlawuriweke kahle lama humaka embilwini ma ta tlangeriwa. Vahuweleri van’wana va kombela mufambisi wa dyondzo leswaku loko a fika eka ndzimana yo karhi ku va vona va hlamulaka ku sungula, leswaku va nga hundziwi hi nkarhi wa ku phofula ripfumelo ra vona.
La Nga Riki Na Ntokoto Wa Tlhariha
16, 17. Hi yihi ndzayo leyi nkulu un’wana a yi nyikeke nandza wa vutirheli, naswona ha yini yi tirhile?
16 Eminhlanganweni ya Timbhoni ta Yehovha, hakanyingi hi tsundzuxiwa ku hlaya Rito ra Xikwembu siku na siku. Ku endla tano swa phyuphyisa. Swi tlhela swi hi pfuna ku endla swiboho swa vutlhari, ku lulamisa ku tsana ko karhi mayelana ni vumunhu bya hina, ku lwisana ni miringo naswona hi kota ku tlhelela exiyin’weni lexi faneleke hi tlhelo ra moya loko ku ri leswaku se a hi sungule ku hambuka.—Pisalema 19:7.
17 Vakulu va vandlha lava nga ni ntokoto va tshama va lunghekele ku nyikela ndzayo ya Matsalwa leyi fambisanaka ni swilaveko swa hina. Lexi hi faneleke hi xi endla i ku ‘kombela’ ndzayo ya vona leyi sekeriweke eBibeleni. (Swivuriso 20:5) Siku rin’wana nandza wa vutirheli la ha riki muntshwa la hisekaka u kombele nkulu leswaku a n’wi nyika swiringanyeto swa ndlela leyi a nga pfunaka ngopfu ha yona evandlheni. Nkulu loyi, loyi a a n’wi tiva kahle muntshwa loyi, u pfule Bibele ya yena eka 1 Timotiya 3:3, leyi vulaka leswaku vavanuna lava hlawuriweke va fanele va “anakanyela.” Hi musa u kombise jaha leri tindlela leti ri nga kombisaka ha tona ku anakanyela loko ri tirhisana ni van’wana. Xana makwerhu loyi u hlundzukisiwe hi ndzayo leyi kongomeke leyi a yi kumeke? Nikatsongo! U ri: “Nkulu loyi u tirhise Bibele, kutani ndzi swi xiyile leswaku ndzayo leyi a yi huma eka Yehovha.” Nandza loyi wa vutirheli u tirhise ndzayo leyi naswona u endle nhluvuko lowunene.
18. (a) I yini lexi pfuneke muntshwa un’wana la nga Mukreste leswaku a lwisana ni miringo loko a ri exikolweni? (b) I tindzimana tihi ta Bibele leti u ti tsundzukaka loko u langutane ni miringo?
18 Rito ra Xikwembu ri nga tlhela ri pfuna vantshwa leswaku va “balekela ku navela loku fambisanaka ni vuntshwa.” (2 Timotiya 2:22) Mbhoni ya Yehovha leya ha riki muntshwa leyi ya ha ku thwasaka exikolweni xa le henhla, yi swi kotile ku lwisana ni miringo loko ya ha ri exikolweni hi ku anakanyisisa ni hi ku tirhisa tindzimana to karhi ta Bibele. Hakanyingi a a anakanya hi ndzayo leyi tsariweke eka Swivuriso 13:20: “Loyi a fambaka ni vanhu vo tlhariha u ta tlhariha.” Hikwalaho, u hlakulele vunghana hi vukheta ni lava a va yi xixima swinene misinya ya milawu ya Matsalwa. U te: “Ndzi fana ni munhu un’wana ni un’wana. Loko ndzi va munghana wa vanhu lavo biha, ndzi ta lava ku tsakisa vanghana va mina naswona sweswo swi nga ndzi nghenisa ekhombyeni.” Ndzayo ya Pawulo leyi tsariweke eka 2 Timotiya 1:8 na yona yi n’wi pfunile. Muapostola loyi u tsarile: “U nga khomiwi hi tingana hi vumbhoni lebyi khumbaka Hosi ya hina, . . . kambe teka xiphemu xa wena u tiyisela nhlomulo hikwalaho ka mahungu lamanene.” Hi ku pfumelelana ni ndzayo yoleyo, hi xivindzi u hlamusele swichudeni-kulobye hi tidyondzo ta yena leti sekeriweke eBibeleni nkarhi wun’wana ni wun’wana lowu faneleke. Nkarhi wun’wana ni wun’wana loko a averiwe ku hlamusela mhaka yo karhi etlilasini, u hlawule mhaka leyi a yi n’wi pfumelela ku nyikela vumbhoni hi vukheta malunghana ni Mfumo wa Xikwembu.
19. Ha yini jaha rin’wana ri tsandzekile ku lwisana ni mintshikilelo ya misava leyi, kambe i yini lexi ri nyikeke matimba hi tlhelo ra moya?
19 Loko ho tshuka hi hambukile eka “ndlela ya lavo lulama,” Rito ra Xikwembu ri nga hi pfuna leswaku hi lulamisa magoza ya hina. (Swivuriso 4:18) Jaha rin’wana leri tshamaka laha Afrika ri tokote xiyimo lexi. Loko ri endzeriwe hi Mbhoni ya Yehovha ri amukele dyondzo ya Bibele. A ri swi tsakela leswi a ri swi dyondza kambe hi ku hatlisa ri ve ni vanghana vo biha exikolweni. Hi ku famba ka nkarhi, ri sungule ku va ni mahanyelo yo biha. Ri ri: “Ripfalo ra mina a ri tshamela ku ndzi kingindza, kutani ndzi tshike ku ya eminhlanganweni.” Endzhaku ka nkarhi, ri tlhele ri sungula ku ya eminhlanganweni. Jaha leri ri tiphofule hi ndlela leyi: “Ndzi xiye leswaku xivangelo-nkulu xa hinkwaswo leswi a ku ri leswaku a ndzi sika hi tlhelo ra moya. A ndzi nga ri na dyondzo ya munhu hi xiyexe. Hi yona mhaka leyi a ndzi nga swi koti ku lwisana ni miringo. Kutani ndzi sungule ku hlaya Xihondzo xo Rindza ni Xalamuka! Hakatsongo-tsongo, ndzi sungule ku hlakarhela hi tlhelo ra moya ivi ndzi hanya vutomi lebyi baseke. Lebyi a byi ri vumbhoni lebyinene eka lava va xiyeke ku hundzuka loku ndzi ku endleke. Ndzi khuvuriwile, naswona sweswi ndzi tsakile.” I yini lexi nyikeke jaha leri matimba yo hlula ku tsana ka nyama ya rona? Ri tlhele ri kuma matimba ya rona hi tlhelo ra moya hi ku va ni dyondzo ya munhu hi xiyexe ya Bibele ya nkarhi na nkarhi.
20. Xana jaha ri nga lwisana njhani ni minhlaselo ya Sathana?
20 N’wina vantshwa lava nga Vakreste, mi le hansi ka nhlaselo namuntlha! Leswaku mi ta kota ku lwisana ni minhlaselo ya Sathana, mi fanele mi dya swakudya swa moya nkarhi na nkarhi. Mupisalema, loyi entiyisweni a a ri jaha, u swi twisisile leswi. U nkhense Yehovha leswi a n’wi nyikeke Rito ra yena, leswaku ‘jaha ri ta tengisisa ndlela ya rona.’—Pisalema 119:9.
Kun’wana Ni Kun’wana Laha Xikwembu Xi Hi Kongomisaka Kona, Hi Ta Xi Landzela
21, 22. Ha yini hi nga fanelanga hi gimeta hi leswaku ndlela ya ntiyiso ya tika swinene?
21 Yehovha u humese tiko ra Israyele aEgipta a ri yisa eTikweni leri Tshembisiweke. Ndlela leyi a yi hlawuleke yi nga languteka yi nga fambeki hi ku ya hi langutelo ra munhu. Ematshan’weni yo va fambisa hi ndlela leyi fambekaka, leyi tsemetelaka leyi hundzaka hi le tlhelo ra Lwandle ra Mediteraniya, Yehovha u fambise vanhu va yena hi ndlela leyi nga fambekiki ya le mananga. Hambiswiritano, lowu kahle-kahle a ku ri musa lowu a wu kombisiwa hi Xikwembu. Hambileswi ndlela yo famba hi le lwandle a yi komile, a yi ta va yi hundzise Vaisrayele hi le tikweni ra Vafilista lava nga ni tihanyi. Hi ku va fambisa hi ndlela yin’wana, Yehovha u sirhelele vanhu va yena leswaku va nga hatli va hlangana ni Vafilista.
22 Hilaha ku fanaka, ndlela leyi Yehovha a hi fambisaka ha yona namuntlha yi nga ha tikomba yi nga fambeki minkarhi yin’wana. Vhiki rin’wana ni rin’wana hi ni xiyimiso lexi heleleke xa mintirho ya Vukreste, ku katsa ni minhlangano ya vandlha, dyondzo ya munhu hi xiyexe ni ntirho wa nsimu. Tindlela tin’wana ti nga ha vonaka ti olovanyana. Kambe loko hi landzela nkongomiso wa Xikwembu ntsena, hi ta fika endhawini leyi hi tirhaka hi matimba swinene leswaku hi yi fikelela. Hikwalaho, a hi hambeteni hi yingisa swiletelo swa nkoka leswi humaka eka Yehovha ivi hi tshama “endleleni ya vululami” hilaha ku nga heriki!—Pisalema 27:11.
Xana U Nga Hlamusela?
• Ha yini hi fanele hi tikarhatela ku va va kona eminhlanganweni ya Vukreste nkarhi na nkarhi?
• I yini leswi vatswari va nga swi endlaka leswaku va pfuna vana va vona leswaku va yingisela eminhlanganweni?
• Xana ku katseka yini eka ku va muyingiseri lonene?
• I yini lexi nga hi pfunaka leswaku hi hlamula eminhlanganweni?
[Xifaniso lexi nga eka tluka 16, 17]
Ku va kona eminhlanganweni ya Vukreste swi hi pfuna ku tshama hi ri karhi hi tsundzuka siku ra Yehovha
[Swifaniso leswi nga eka tluka 18]
Ku ni tindlela to hambana-hambana to dzunisa Yehovha eminhlanganweni ya Vukreste