Ndlela Yo Kuma Ntsako Lowu Engetelekeke Hi Ku Va Kona eMinhlanganweni
1 Minhlangano i ya risima eka vuhlayiseki bya hina bya moya. Ntsako lowu hi wu kumaka eka yona, hi ku kongoma wu fambisana ni leswi hi swi endlaka loko hi nga si ya eminhlanganweni, loko se yi sungurile ni loko se yi herile. Xana hi nga vuyeriwa njhani, naswona hi nga va pfuna njhani van’wana leswaku va hambeta va hlayisa ntsako hi ku va kona eminhlanganweni?
2 U Nga Si Ya eMinhlanganweni: Ku lunghiselela swi hoxa xandla swinene eka ntsako lowu hi wu kumaka eminhlanganweni. Loko hi lunghiselele kahle, swi ta hi olovela ku nyikela nyingiso ni ku hlanganyela. Ku engetela kwalaho, nkulumo yin’wana ni yin’wana ya nhlangano leyi hi nyikiwaka yona, hi fanele hi yi lunghiselela kahle hi ri ni xikongomelo xa ku hundzisela rungula hi ndlela leyi faneleke hi ku landzela swiletelo ni ku pfuxa ku tsakela ka vayingiseri. Hi fanele hi yi pfuxeta kahle. Loko hi endla leswaku minhlangano yi hanya naswona yi aka ni ku vuyerisa hinkwavo lava nga kona, nhluvuko wa hina wu va erivaleni naswona hi kuma ntsako lowukulu.—1 Tim. 4:15, 16.
3 Hi Nkarhi Wa Minhlangano: Ku hlamula eminhlanganweni ku endla leswaku hi yi tsakela swinene. Tinkulumo leti lavaka ku hlanganyela ka vayingiseri ti fanele ti tekiwa tanihi hi xiavelo xa un’wana ni un’wana la nga evandlheni. Tinhlamulo to koma, leti pakanisaka hakanyingi ta pfuna swinene. Loko hi ku komisa u hlamusela mintokoto leyi akaka, swi nga khutaza ni ku tiyisa van’wana swinene, naswona hi fanele hi xalamukela ku rungula mintokoto yo tano loko nkulumo yi lava sweswo. (Swiv. 15:23; Mint. 15:3) Loko hi nyikela nkulumo eminhlanganweni, hi fanele hi yi nyikela hi ku hiseka ni hi ndlela leyi khorwisaka, leyi tsakisaka, ya xiviri naswona leyi twisisekaka.
4 Loko Minhlangano Yi Herile: Ku dya mabulo lamanene ni van’wana, ku pfuxelana ka xinghana, ni ku rungulelana tinhla ti nga ri tingani leti nyikeriweke eminhlanganweni swi ta hi vuyerisa hinkwerhu. Ku kombisa ntsako wa hina loko hi vona vantshwa, lava dyuhaleke ni lava ha ku tsakelaka va hlanganyela eminhlanganweni, swi tiyisa rirhandzu ra vumakwerhu. Ematshan’weni ya ku vulavula ku biha hi vanhu lava xwaka eminhlanganweni, hi fanele hi va byela hi ntsako wa hina lowu hi wu kumaka eminhlanganweni, xisweswo hi ta va hi va khutaza ku va kona eminhlanganweni.—Hev. 10:24, 25.
5 Hi nga tlangi hi lunghiselelo leri ra nkoka ra ku khutazana. (Rhom. 1:11, 12) Loko hinkwerhu hi tikarhatela ku endla matshalatshala lama faneleke, hi nga swi kota ku hlayisa ntsako wa hina hi ku va kona eminhlanganweni ya Vukreste.