U Nga Ku Yini Eka Muhindu?
1 Kumbexana wa swi tiva leswaku ku ni Mahindu yo tala lama tshamaka ematikweni yo hambana-hambana, ku katsa ni le tikweni leri. Leswi swi vula leswaku swi nga ha endleka u hlangana ni Muhindu evutirhelini bya wena bya nsimu. Loko wo tshuka u hlangane na yena, xana u ta burisana na yena hi ndlela yihi?
2 Tsundzuka Tinhla Leti: Varhumiwa lava swi koteke ku pfuna Mahindu, va vula leswaku a swi bohi ku kambisisa dyondzo ya Vuhindu leswaku u nyikela vumbhoni hi ndlela leyinene. Ku twarisa ntiyiso hi ndlela yo olova, ya vutlharhi, hakanyingi swi pfuxa ku tsakela. Kombela ku vulavula ni nhloko ya ndyangu. Loko nhloko ya ndyangu yi kombisa ku tsakela, swi nga koteka leswaku u burisana ni swirho swin’wana swa ndyangu. Tanihi leswi Mahindu yo tala ma tekaka Bibele yi ri buku ya le Vupela-dyambu, u nga ha pfuxa ku tsakela hi ku hlamusela leswaku a yi ku seketeli ku tekeriwa ka vanhu tiko ri fumiwa hi vanhu va tiko rimbe kumbe ku tlakusa rixaka rin’wana eka rin’wana.
3 Tirhisa Switirho Leswi Faneleke: Ku hleriwe tibroxara timbirhi leti endleriweke Mahindu hi ku kongoma. Broxara leyi nge Why Should We Worship God in Love and Truth? yi kandziyisiwe hi Xigujarati ni Xipunjabi. Broxara leyi nge, Our Problems—Who Will Help Us Solve Them? yi kandziyisiwile hi tindzimi tin’wana ta 11 ta le Indiya. Hatimbirhi ta kumeka hi Xinghezi. Broxara leyi nge “Vonani, Ndzi Endla Swilo Hinkwaswo Swi Va Leswintshwa”! ni leyi nge Xana Xikwembu Xa Hi Khathalela Hakunene? ta pfuna eku nyikeleni ka vumbhoni eka Mahindu. Broxara leyi nge Leswi Xi Swi Languteleke ni buku leyi nge Vutivi ti nga tirhisiwa eku fambiseni ka tidyondzo ta Bibele leti humelelaka.
4 Bulani Hi Leswi Mi Pfumelelanaka Eka Swona: Swa olova ku sungula bulo ni Mahindu. Ma pfumela leswaku hi hanya enkarhini lowu vuhomboloki byi nyanyeke ku biha ni leswaku Xikwembu xi ta herisa swiphiqo swa misava hi ku tirhisa ndzoviso lowukulu lowu nga ta landzeriwa hi nguva ya vutshembeki. Swi le rivaleni leswaku tidyondzo leti, hi ku olova ti nga ha twananisiwa ni tidyondzo ta Bibele leti vulavulaka hi masiku yo hetelela, nhlomulo lowukulu ni misava leyintshwa leyi taka. Tanihi leswi Mahindu yo tala ma anakanyaka leswaku evuton’wini ku tele swiphiqo leswi nga ta ka swi nga herisiwi, ma tsakela ngopfu timhaka leti khumbaka vutomi bya ndyangu, vugevenga ni vuhlayiseki kun’we ni leswi humelelaka loko munhu a fa. Hi leswi swingheniso swimbirhi leswi u nga ringetaka ku swi tirhisaka loko u vulavula ni vanhu va vukhongeri ni mindhavuko yo hambana-hambana.
5 Lexi xi nga ha tsakisa wanuna la nga ni ndyangu:
◼ “Ndzi endzela vanhu lava karhatekaka hikwalaho ka xiyimo xa vutomi bya ndyangu lexi nga kona ematikweni yo tala namuntlha. Xana u vona onge i yini lexi nga ta pfuna ku hlayisa mindyangu yi ri ni vun’we? [Yimela nhlamulo.] Vanhu van’wana va swi tiva leswi matsalwa ya Xihindu ma swi vulaka mayelana ni ndyangu, kambe a va si tinyika nkarhi wa ku yelanisa leswi matsalwa lawa ma swi vulaka ni leswi Bibele yi swi vulaka malunghana ni mhaka leyi. Ndzi tsakela ku bula na wena hi mhaka leyi nga eka Vakolosa 3:12-14.” Endzhaku ka loko u hlaye tsalwa leri, kombisa n’wini wa muti ndzima 15 leyi nga ebukwini leyi nge Vutivi ivi u tlhela u ku: “Ndzi nga swi tsakela ku tirhisa nkarhi wutsongo ndzi hlaya na wena ndzima leyi.”
6 Muntshwa a nga ha tsakisiwa hi lexi:
◼ “A swi kanakanisi leswaku u ni ripfumelo eka Xikwembu. U anakanya leswaku hi xihi xikongomelo xa Xikwembu hi hina?” Yimela nhlamulo. Hlaya Genesa 1:28, ivi u ku: “Etindhawini to tala, misava yi ni vanhu vo tala ku tlurisa naswona vanhu lava va ni swiphiqo leswikulu ngopfu. Xana u anakanya leswaku Muvumbi u tiyimiserile ku hi pfuna leswaku hi herisa swiphiqo swa hina?” Endzhaku ka loko a ku hlamurile, n’wi kombise buku leyi faneleke.
7 Swingheniso leswi nga laha henhla swi nga ha pfumelelanisiwa ni swiyimo swa vanhu lava nga ensin’wini leyi nga ni vanhu va mindhavuko yo hambana-hambana. Tsundzuka, xikongomelo xa hina i ku sungula tidyondzo ta Bibele hi ku tirhisa buku leyi nge Vutivi.
8 Kuma Vuyelo Lebyinene: Jaha rin’wana ra Muhindu leri nga ni malembe ya 22 hi vukhale ri tshinelele makwerhu un’wana wa xisati loyi a a ri karhi a chumayela emakete ivi ri kombela ku fambiseriwa dyondzo ya Bibele. Jaha leri ri vule leswaku emalembeni ya nhungu lama hundzeke, ri tshame ri yingisela bulo ra Bibele exikarhi ka makwerhu loyi ni mana wa rona. Hambileswi ri tsakisiweke hi tinhlamulo letinene ta Bibele mayelana ni swiphiqo swa vanhu, mana wa rona a a nga tsakeli naswona a ri ehleketa leswaku rona ra ha ri ritsongo swinene leswaku ri nga landzela timhaka ta ntiyiso. Sweswi tanihi leswi se ri kuleke, ri lava ku dyondza leswi engetelekeke. Jaha leri a ri kalanga ri dya nkarhi. Hi masiku ya 23 ntsena, ri hete dyondzo ya rona ya buku leyi nge Vutivi, naswona ri kombele ku khuvuriwa endzhaku ka mune wa tin’hweti ku sukela ri hlangane ni makwerhu loyi wa xisati emakete!
9 Ku rhandza ka Xikwembu hi leswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Tim. 2:4) Vanhu lava va katsa vavanuna ni vavasati lava nga va vukhongeri lebyi nga riki bya Vukreste, ku fana ni bya Vuhindu. Loko ku ri ni Mahindu ensin’wini ya ka n’wina, ha yini u nga ma endzeli ivi u yi ba ya ha ri ni mahika hi ku tirhisa swiringanyeto leswi nga eka xihloko lexi?