Xi Hlayise

Xana Wa Ti Tirhisa Tibroxara Leti?

Bibele—Yi Tamele Rungula Rihi?

Yi endleriwe ku koka rinoko ra vanhu lava nga tiviki swo tala hi Bibele, ngopfu-ngopfu lava nga riki va vukhongeri bya Vukreste

Ndlela yo yi fambisa: “Hi ta tsakela ku twa mavonelo ya wena eka leswi tsariweke eMatsalweni (kumbe eka buku leyi yo kwetsima). [Hlaya Pisalema 37:11, leyi ku kombeteriwaka eka yona eka xiyenge 11.] Xana u anakanya leswaku misava yi ta va njhani loko vuprofeta lebyi byi hetiseka? [Yimela nhlamulo.] Lexi i xikombiso xa ntshembo ni nchavelelo lowu vanhu va mindhavuko ni ripfumelo ro hambana-hambana va nga wu kumaka eBibeleni.” Hlaya ndzimana leyi nga le henhla eka tluka 3, kutani u fambisa broxara.

U nga ha ringeta leswi: Loko u fambisa dyondzo ya Bibele hi buku leyi nge Leswi Bibele Yi Swi Dyondzisaka ni munhu la nga riki eka vukhongeri bya Vukreste, teka timinete ti nga ri tingani eku sunguleni ni le makumu ka dyondzo ha yin’we leswaku u kambisisa xiyenge xin’we xa broxara leyi leswaku u n’wi katsakanyela Bibele.

Gondzo Leri Yaka eVuton’wini Lebyi Nga Heriki—Xana Se U Ri Kumile?

Yi endleriwe ku koka rinoko ra vanhu ku vona leswaku a hi vugandzeri hinkwabyo lebyi amukelekaka eka Xikwembu

Ndlela yo yi fambisa: Ku ni vukhongeri byo tala byo hambana-hambana. Xana Xikwembu xi amukela tindlela hinkwato leti vanhu va vulaka leswaku va xi gandzela ha tona? Hlaya Matewu 7:13, 14. Yesu, Muprofeta wa Xikwembu, u kombise leswaku ku ni magondzo mambirhi ntsena, lerin’wana ri yisa evuton’wini lebyi nga heriki kasi lerin’wana ri yisa endzovisweni. Xikongomelo xa broxara leyi i ku ku pfuna leswaku u kuma gondzo leri yisaka evuton’wini lebyi nga heriki.

U nga ha ringeta leswi: Byela n’wini wa muti leswaku u ta tlhela u vuya leswaku mi ta hlaya broxara leyi, a tihlayela matsalwa eBibeleni yakwe. Loko swi fanerile, n’wi kombe buku leyi nge Leswi Bibele Yi Swi Dyondzisaka.

U Nga Va Munghana Wa Xikwembu!

Yi endleriwe ku koka rinoko ra vanhu lava nga dyondzekangiki kumbe lava nga swi kotiki ku hlaya kahle

Ndlela yo yi fambisa: “Xana u ehleketa leswaku swa koteka leswaku hi va vanghana va Xikwembu? [Yimela nhlamulo. Kutani u hlaya Yakobo 2:23.] Broxara leyi yi endleriwe ku hi pfuna leswaku hi va vanghana va Xikwembu ku fana na Abrahama.”

U nga ha ringeta leswi: Eka riendzo ro sungula kumbe eka riendzo ro vuyela, kombisa n’wini wa muti ndlela leyi dyondzo ya Bibele yi fambisiwaka ha yona hi ku va u bula na yena hi dyondzo 1 hinkwayo kumbe xiphemu xa yona.

Mimoya Ya Vafi—Xana Yi Nga Ku Pfuna Kumbe Yi Nga Ku Vavisa? Xana Yi Kona Hakunene?

Yi endleriwe ku khorwisa vanhu leswaku a va fanelanga va chava vafi. Vafi a va na matimba

Ndlela yo yi fambisa: Vanhu vo tala va chava vafi, va tshemba leswaku vafi va nga kucetela vanhu lava hanyaka. I yini leswi Bibele yi swi dyondzisaka? Hlaya Eklesiasta 9:5, 6, 10. Hi ku ya hi tsalwa leri, xana vafi va nga rhandza kumbe ku venga vanhu lava hanyaka? Broxara leyi yi nyikela tinhlamulo leti nga erivaleni ni leti enerisaka ta swivutiso leswi vanhu vo tala va nga na swona malunghana ni xiyimo xa vafi.

U nga ha ringeta leswi: Loko n’wini wa muti a amukela broxara leyi, n’wi byele leswaku u ta tlhela u vuya mi ta bula hi nhloko-mhaka leyi ni ku tlhela u hlamula swivutiso leswi a nga ha vaka a ri na swona. U nga ha yimayimi namba u n’wi komba buku leyi nge Leswi Bibele Yi Swi Dyondzisaka.

The Guidance of God​—Our Way to Paradise

Yi endleriwe ku koka rinoko ra Mamoslem lama tshamaka endhawini leyi ma nga ha titwaka ma ntshunxekile ku dyondza Bibele.

Ndlela yo yi fambisa: “Ndza swi twisisa leswaku Mamoslem ma pfumela eka Xikwembu xin’we xa ntiyiso ni le ka vaprofeta hinkwavo. Xana sweswo i ntiyiso? [Yimela nhlamulo.] Ndzi tsakela ku vulavula na wena hi vuprofeta bya khale lebyi profeteke hi ku hundzuriwa ka misava yi va paradeyisi. Xana ndzi nga ku hlayela leswi muprofeta loyi a swi tsaleke? [Hlaya Esaya 11:6-9.] Vanhu vo tala va tivutisa leswaku Xikwembu xi ta ku tisa njhani ku cinca ko tano emisaveni. Broxara leyi yi kombisa leswi vaprofeta va swi vulaka hi mhaka leyi.”

U nga ha ringeta leswi: Loko n’wini wa muti a amukela broxara, u nga ha ku: “Bibele yi hlamusela leswaku eku sunguleni, munhu a a tshama eparadeyisini. Loko hi tlhela hi bula enkarhini lowu taka, ndzi ta tsakela ku hlamula xivutiso lexi nge, ‘Xana munhu u hambukise ku yini eka nkongomiso wa Xikwembu kutani a lahlekeriwa hi paradeyisi?’” Loko u vuya, bulani hi xiyenge xo sungula lexi sungulaka eka tluka 6.

Real Faith​—Your Key to a Happy Life

Yi endleriwe ku koka rinoko ra Mamoslem lama tshamaka endhawini leyi ma nga ha titwaka ma ntshunxekile ku dyondza Bibele

Ndlela yo yi fambisa: N’wi kombe xifaniso lexi nga eka matluka 16-17 kutani u ku: “Xifaniso lexi xi hambane swinene ni lexi hi xi vonaka emisaveni namuntlha. Xana u ehleketa leswaku swi ta koteka leswaku misava yi va hi ndlela leyi siku rin’wana? [Yimela nhlamulo.] Xiya leswi Bibele yi swi tshembisaka. [Hlaya rin’wana ra matsalwa lama tshahiweke eBibeleni ya wena.] Broxara leyi yi hi pfuna ku hlakulela ripfumelo ra xiviri ra leswaku switshembiso sweswo swi ta hetiseka.”

U nga ha ringeta leswi: Loko u gimeta eka riendzo ro sungula, kombela n’wini wa muti leswaku a hlawula xin’wana xa swivutiso leswi nga eka xifunengeto xa le ndzhaku. Kutani u endla malunghiselelo yo bula hi nhlamulo leyi nga eka broxara loko u vuya.

The Pathway to Peace and Happiness

Yi endleriwe ku koka rinoko ra Mabudha

Ndlela yo yi fambisa eka munhu la kuleke la nga Mubudha: “Kumbexana u karhateka hi ndlela leyi na mina ndzi karhatekaka ha yona hi tidyondzo leti thyakeke ta masiku lawa ni ndlela leyi ti onhaka vana va hina ha yona. Ha yini u anakanya leswaku vantshwa vo tala va tikhoma hi ndlela yo biha swonghasi? [Yimela nhlamulo.] Xana a wu swi tiva leswaku leswi swi vuriwile ka ha ri emahlweni ebukwini leyi sunguriweke ku tsariwa ku nga si simekiwa Vukreste ni vukhongeri bya Mahindu ni bya Vumoslem? [Hlaya 2 Timotiya 3:1-3.] Xiya leswaku swiyimo leswi swi ya emahlweni hambileswi vanhu va dyondzekeke. [Hlaya ndzimana 7.] Rungula leri nga eka broxara leyi ri ndzi pfune ku twisisa ntiyiso lowu vanhu vo tala va nga si tshamaka va wu dyondza. Xana u nga swi tsakela ku yi hlaya?”

U nga ha ringeta leswi: Eka riendzo ro vuyela, endzhaku ka loko u hlakulele leswaku n’wini wa muti a tsakela Bibele, n’wi kombe swivutiso leswi nga eka xifunengeto kutani u n’wi komba xiphephana lexi kombisaka buku leyi nge Leswi Bibele Yi Swi Dyondzisaka. N’wi byele leswaku u te ni kopi ya yona loko a lava ku yi vona. N’wi kombe leswi nga endzeni ka buku kutani mi kambisisa ndzimana yin’we kumbe timbirhi ta ndzima leyi a yi hlawuleke.

Why Should We Worship God in Love and Truth?

Yi endleriwe ku koka rinoko ra Mahindu

Ndlela yo yi fambisa: “Xikhongelo lexi xi tivekaka swinene xa Maindiya xi katsa xikombelo xo kuma ntiyiso ni ku vonakala.” Xana u anakanya leswaku i swa nkoka ku gandzela Xikwembu hi rirhandzu ni ntiyiso? [Yimela nhlamulo.] Xiya leswi Yesu a swi vuleke malunghana ni mhaka leyi.” Hlaya Yohane 4:24. Kutani u hlaya ndzimana 4 eka tluka 3 ivi u n’wi nyika broxara.

U nga ha ringeta leswi: Loko n’wini wa muti a amukela broxara, u nga ha ku: “Tintlharhi tin’wana ta Mahindu ti vula leswaku ntiyiso wu fihliwe etimbilwini ta hina. Tin’wana ti vula leswaku ntiyiso wu kumeka ematsalweni yo kwetsima. Enkarhini lowu taka, ndzi ta tsakela leswaku hi bula hi xivutiso lexi vutisiweke emakumu ka ndzimana 3 eka tluka 4 lexi nge: ‘Xana hi kwihi laha hi faneleke hi lavisisa kona leswaku hi kuma ntiyiso wa Xikwembu?’”

Lasting Peace and Happiness​—How to Find Them

Yi endleriwe ku koka rinoko ra Machayina

Ndlela yo yi fambisa: “Namuntlha vutomi byi ni swiphiqo swo tala leswi nga hi tsonaka ntsako. Xana i yini leswi ku pfunaka leswaku u tsaka ku nga khathariseki swiphiqo? [Yimela nhlamulo.] Vanhu vo tala va kume ntsako hikwalaho ko landzela ndzayo leyi nga eBibeleni. [Hlaya Pisalema 119:1, 2.] Van’wana va vula leswaku Bibele yi tsaleriwe Valungu. Kambe xiya leswi. [Kambisisani ndzimana 16 eka tluka 17.] Broxara leyi yi vulavula hi ndlela leyi hi nga kumaka ntsako ni ku rhula ka xiviri loku nga heriki ha yona.”

U nga ha ringeta leswi: Loko n’wini wa muti a amukela broxara, hlaya na yena swivulwa swinharhu swo sungula leswi nga eka ndzimana 18 eka tluka 17 kutani u ku: “Loko ndzi vuya, ndzi nga tsakela ku ku komba leswi hi nga swi langutelaka hi mahlo-ngati hi ku ya hi Bibele.” Loko u vuya, kambisisani yin’wana ya tinhla leti nga eka ndzimana 6 eka tluka 30.