Broxara Leyintshwa Leyi Nga Ta Fambisiwa!
1. Xana hi ta fambisa yini hi November naswona hi xihi xikongomelo xa nkandziyiso lowu?
1 ENtsombanweni wa Muganga lowu nge “Tshamani Mi Rindzile!” wa 2009 ku humesiwe broxara leyintshwa leyi nge Bibele—Yi Tamele Rungula Rihi? Mavandlha emisaveni hinkwayo ma ta yi fambisa ro sungula hi November. Xana nkandziyiso lowu wu ta va vuyerisa njhani vanhu ensin’wini ya hina? Vanhu vo tala, ngopfu-ngopfu lava nga riki va vukhongeri bya Vukreste, a swi talanga leswi va swi tivaka hi Bibele. Hikwalaho, tluka 3 ra broxara leyi ri hlamusela leswaku yi endleriwe ku hi pfuna leswaku hi “dyondza tidyondzo ta xisekelo ta Bibele.”
2. Xana hi nga yi fambisa njhani broxara leyi?
2 Ndlela Yo Yi Fambisa: Hi nga ha vula hi ku: “Hi tsakela ku twa vonelo ra wena eka mhaka leyi. [Hlaya 2 Timotiya 3:16.] Vo tala lava hi buleke na vona va pfumelelana na wona marito lawa kasi van’wana va vula leswaku Bibele ko va buku leyinene ntsena. Xana wena u anakanya yini hi Bibele? [Yimela nhlamulo.] Ku nga khathariseki leswi vukhongeri bya hina byi swi dyondzisaka, ku ni swivangelo leswi twalaka swo va hi tikambisisela Bibele hi hexe. [Hlaya xingheniso lexi nga le henhla eka tluka 3.] Loko u ri karhi u hlaya nkatsakanyo wa rungula leri kumekaka eBibeleni eka broxara leyi, u ta vona swin’wana leswi nga ta ku tsakisa: Bibele yi ni nhloko-mhaka yin’we ni rungula rin’we.”
3. Hi xihi xingheniso xin’wana lexi hi nga ha xi tirhisaka ensin’wini leyi vanhu vo tala va nga riki va vukhongeri bya Vukreste?
3 Loko u chumayela laha vanhu vo tala va nga riki va vukhongeri bya Vukreste, u nga ha ku: “Hi tsakela ku twa mavonelo ya wena eka leswi tsariweke eMatsalweni (kumbe eka buku leyi yo kwetsima). [Hlaya Pisalema 37:11.] Xana u anakanya leswaku misava yi ta va njhani loko vuprofeta lebyi byi hetiseka? [Yimela nhlamulo.] Lexi i xikombiso xa ntshembo ni nchavelelo lowu vanhu va mindhavuko ni ripfumelo ro hambana-hambana va nga wu kumaka eBibeleni.” Hlaya ndzimana leyi nga le henhla eka tluka 3 kutani u fambisa broxara.
4. Xana hi nga yi tirhisa njhani broxara leyi leswaku hi sungula tidyondzo ta Bibele?
4 Ku Sungula Dyondzo Ya Bibele: Loko hi tlhelela hi nga ha tsundzuxa n’wini wa muti hi leswi hi buleke ha swona enkarhini lowu hundzeke naswona hi fanele hi bula hi ndzimana yin’we kumbe timbirhi malunghana ni mhaka leyi a hi bula ha yona, hi tirhisa swivutiso leswi nga emakumu ka xiyenge lexi hi bulaka ha xona. Kumbe loko hi lava ku tirhisa buku leyi nge Leswi Bibele Yi Swi Dyondzisaka hi nkarhi wolowo, hi nga ha hlaya na yena eka xifunengeto xa broxara ivi hi n’wi nyika buku hi tlhela hi n’wi kombela leswaku a hlawula nhloko-mhaka leyi a yi tsakelaka naswona hi hlaya na yena ndzimana yin’we kumbe timbirhi ta ndzima ya kona. Onge hinkwerhu hi nga hlanganyela hi xitalo eku fambiseni ka broxara leyi hi November!