Xikwembu Xi Lava Leswaku U Va Munghana Wa Xona

Xikwembu xi lava leswaku u va munghana wa xona. Xana u tshame u anakanya hi leswaku u nga va munghana wa Munhu lonkulu swinene evuakweni hinkwabyo? Abrahama, loyi a hanyeke khale swinene, a a vitaniwa munghana wa Xikwembu. (Yakobo 2:​23) Van’wana lava ku vulavuriwaka hi vona eBibeleni na vona a va ri vanghana va Xikwembu naswona va katekisiwe swinene. Namuntlha, vanhu lava humaka etindhawini to hambana-hambana emisaveni hinkwayo i vanghana va Xikwembu. Na wena u nga va munghana wa Xikwembu.

Ku va munghana wa Xikwembu i swinene ku tlula ku va munghana wa munhu wihi na wihi wa nyama. Xikwembu a xi va khomisi tingana vanghana va xona lava tshembekaka. (Pisalema 18:​25) Swa antswa ku va munghana wa Xikwembu ku ri na ku va ni rifuwo. Loko munhu la fuweke a fa, mali ya yena yi tekiwa hi vanhu van’wana. Kambe, lava va vaka vanghana va Xikwembu va ni xuma lexi ku nga riki na munhu la nga xi tekaka.​—⁠Matewu 6:⁠19.

Vanhu van’wana va nga ha ringeta ku ku tshikisa loko u dyondza hi Xikwembu. Sweswo swi nga ha endliwa ni hi van’wana va vanghana va wena ni vandyangu wa ka n’wina. (Matewu 10:​36, 37) Loko van’wana va ku hleka kumbe va ku xungeta, tivutise, ‘Xana ndzi lava ku tsakisa mani​—⁠vanhu kumbe Xikwembu?’ Anakanya hi leswi: Loko munhu un’wana o ku byela leswaku u nga ha dyi, xana u nga n’wi yingisa? Nikatsongo! Leswaku u hanya u lava swakudya. Kambe Xikwembu xi nga endla leswaku u hanya hilaha ku nga heriki! Kutani u nga pfumeleli munhu a ku tshikisa loko u dyondza ndlela leyi u nga vaka munghana wa Xikwembu ha yona.​—⁠Yohane 17:⁠3.