Xana Bibele Yi Ri Yini Hi Vanghana?
Nhlamulo ya Bibele
Loko hi ri ni vanghana lavanene swi nga endla leswaku hi tsaka naswona swilo swi nga hi fambela kahle evuton’wini. Nakambe va hi kucetela leswaku hi endla leswinene ni ku tlhela va hi pfuna hi va vanhu va kahle.—Swivuriso 27:17.
Hambiswiritano, Bibele yi kandziyisa ndlela leyi swi nga swa nkoka hayona ku hlawula vanghana hi vutlhari. Yi tlhela yi hi lemukisa hi switandzhaku leswi vaka kona loko munhu a hlawula vanghana vo biha. (Swivuriso 13:20; 1 Vakorinto 15:33) Vanghana vo tano va nga endlisa munhu swiboho swa vuphukuphuku kumbe va onha mikhuva yakwe leyinene.
Leswi hi nga ta bula haswona eka nhlokomhaka leyi
I yini leswi endlaka munhu a va munghana lonene?
Bibele yi dyondzisa leswaku ku va vanhu va va vanghana lavakulu ku katseka swo tala ku tlula ku va va rhandza swilo leswi fanaka kumbe vuhungasi lebyi fanaka. Hi xikombiso, Pisalema 119:63 yi ri: “Ndzi munghana wa vanhu hinkwavo lava ku chavaka ni wa lava yingisaka swileriso swa wena.” Xiya leswaku mutsari wa Pisalema leyi a a hlawula vanghana lava a va chava ku twisa Xikwembu ku vava naswona a va swi navela hi mbilu hinkwayo ku hanya hi milawu ya xona.
Bibele yi tlhela yi vulavula hi vumunhu lebyi munghana lonene a faneleke a va na byona. Hi xikombiso:
“Munghana wa ntiyiso u kombisa rirhandzu mikarhi hinkwayo, i makwenu wa ntiyiso loko u ri emaxangwini.”—Swivuriso 17:17.
“Ku ni vanghana lava lunghekeleke ku tshovelelana, kambe ku ni munghana loyi a tshembekaka ku tlula makwenu.”—Swivuriso 18:24.
Tindzimana leti ti dyondzisa leswaku munghana lonene wa tshembeka, u ni rirhandzu, u ni musa naswona wa hanana. Munghana wa ntiyiso wa ku seketela mikarhi hinkwayo hambi swi famba kahle kumbe a swi fambi kahle. Nakambe munghana wa ntiyiso a nga miyeli loko u teka xiboho lexi hoxeke kumbe loko u lava ku hambuka.—Swivuriso 27:6, 9.
EBibeleni i vamani vanhu lava nga swikombiso leswinene loko swi ta eka vanghana?
Bibele yi ni swikombiso swa vanhu lava veke vanghana lavanene hambileswi a va nga ringani hi malembe, va kurisiweke ku hambana, a va huma eka mindhavuko leyi nga faniki naswona swiyimo swa vona a swi nga fani. A hi bule hi swikombiso swinharhu swa vanhu lava veke vanghana vo tano.
Rhuti na Nawomi. Rhuti a a ri n’wingi wa Nawomi naswona Nawomi a a ri nkulu swinene eka Rhuti hi malembe. Nakambe a va ri va mindhavuko leyi nga faniki. Hambileswi a ku ri ni swilo leswi a va nga fani haswona, va ve vanghana lavakulu naswona a va rhandzana.—Rhuti 1:16.
Davhida na Yonathani. Hambileswi Yonathani a a hundza Davhida hi malembe ya 30, Bibele yi vula leswaku Davhida na Yonathani a va ri “vanghana lavakulu.”—1 Samuwele 18:1.
Yesu ni vaapostola vakwe. Vaapostola a va ri ehansi ka Yesu hikuva a a ri mudyondzisi tlhelo n’wini wa vona. (Yohane 13:13) Kambe u ve munghana wa vona naswona u endle tano hikuva a va yingisa tidyondzo takwe. U te: “Ndzi mi vitana vanghana va mina, hikuva ndzi mi byele swilo hinkwaswo leswi Tatana a ndzi byeleke swona.”—Yohane 15:14, 15.
Xana swa koteka leswaku munhu a va munghana wa Xikwembu?
Ina, swa koteka leswaku vanhu va va vanghana va Xikwembu. Bibele yi ri: “[Xikwembu] i munghana lonkulu wa lavo lulama.” (Swivuriso 3:32) Hi marito man’wana, Xikwembu xi va munghana wa lavo tshembeka, lava xiximaka ni lava tikarhatelaka ku hanya hi milawu ya xona ya leswinene ni leswo biha. Hi xikombiso, eMatsalweni Abrahama wanuna wo tshembeka u vuriwa munghana wa Xikwembu.—2 Tikronika 20:7; Esaya 41:8; Yakobo 2:23.