Swivuriso 17:17—“Munghana U Kombisa Rirhandzu Mikarhi Hinkwayo”

Leswi Swivuriso 17:17 Yi Vulaka Swona

Vanghana va ntiyiso va tshembeka naswona hi nga titshega hi vona. Ku fana ni vamakwavo, va tshembeka naswona va khathalelana ngopfungopfu hi mikarhi yo tika.

“Munghana wa ntiyiso u kombisa rirhandzu mikarhi hinkwayo.” Xivulwa lexi xi nga tlhela xi vula leswaku “vanghana va kombisana rirhandzu mikarhi hinkwayo.” Rito ra Xiheveru leri nge, “rirhandzu” leri tirhisiweke eka xivulwa lexi, ri katsa swo tala ku nga ri ndlela leyi munhu a titwaka hayona ntsena hi munhu wo karhi. I rirhandzu leri nga riki ra vukanganyisi leri kombisiwaka hi swiendlo. (1 Vakorinto 13:4-7) Rirhandzu rero a ri heli hambiloko mikarhi yin’wana va nga twisisani naswona va langutana ni maxangu ya vutomi. Nakambe va rivalelana hi ku ntshunxeka. (Swivuriso 10:12) Munghana wa ntiyiso a nga n’wi vondzoki munghana wakwe loko swilo swi n’wi fambela kahle. Ku ri na sweswo, u tsaka ni munghana wakwe.—Varhoma 12:15.

“Munghana wa ntiyiso . . . i makwenu wa ntiyiso loko u ri emaxangwini.” Tsalwa leri ri kombisa ntiyiso wa leswaku vamakwavo va nga va ni vuxaka lebyikulu. Kutani loko hi endla hinkwaswo leswi nga ematimbeni ya hina leswaku hi pfuna munghana loyi a nga eka xiyimo lexi tshikilelaka, hi ta va hi fana ni makwavo hi nkarhi wolowo. Ku engetela kwalaho, vunghana byebyo a byi tsekatsekisiwi hi miringo. Kambe bya tiya hileswi ku nga ni rirhandzu ni ku xiximana.

Mongo wa Swivuriso 17:17

Buku ya Swivuriso yi tsariwe hi ndlela ya vutlhari naswona swivulwa swa yona swi komile kambe swi tlhontlha miehleketo ya muhlayi. Hosi Solomoni u tsale tindzima to tala ta buku leyi ya Bibele. Ndlela leyi a tsaleke hayona yi fana ni vutlhokovetseri bya Xiheveru, ku ri ni ku tirhisa marito lama hetelelaka hi mpfumawulo lowu fanaka u tirhisa swivulwa leswi fanaka kumbe leswi hambaneke. Swivuriso 17:17 i xikombiso xa vutlhokovetseri lebyi fanaka naswona xiphemu xa vumbirhi xi engetela vuxokoxoko lebyi nga eka xiphemu xo sungula. Swivuriso 18:24 i xikombiso xa swivulwa swa mhaka leyi hambaneke. “Ku ni vanghana lava lunghekeleke ku tshovelelana, kambe ku ni munghana loyi a tshembekaka ku tlula makwenu.”

Loko Solomoni a tsala Swivuriso 17:17, swi nga endleka a ehleketa hi vunghana lebyikulu lebyi tata wakwe Davhida a ri na byona na Yonathani n’wana wa Hosi Sawulo. (1 Samuwele 13:16; 18:1; 19:1-3; 20:30-34, 41, 42; 23:16-18) Hambileswi Davhida na Yonathani a va nga ri maxaka, a va ri vanghana lavakulu ku tlula ni vamakwavo. Yonathani u kale a veka vutomi bya yena ekhombyeni hikwalaho ka munghana wa yena loyi a ri ntsongo eka yena.a

Ndlela Leyi Van’wana Va Hundzuluxeleke Swivuriso 17:17 Hayona

“Munghana u kombisa rirhandzu mikarhi hinkwayo naswona u va makwenu hi mikarhi yo tika.”—The Bible in Basic English.

“Munghana u va munghana nkarhi hinkwawo naswona i makwenu loyi a velekeriweke ku langutana ni maxangu.”—The Moffatt Translation of the Bible.

“Munghana u kombisa xinghana mikarhi hinkwayo, i makwenu loyi a velekiweke hi nkarhi wa maxangu.”—The Complete Jewish Study Bible.

Hlalela vhidiyo leyi yo koma leswaku u vona leswi buku ya Swivuriso yi swi tameleke.