Bokisi Ra Swivutiso

◼ Xana u tshama u xi lunghekerile xiyimo xa xihatla?

Eminkarhini ya manguva lawa, “nkari ni khombo,” hakanyingi swa kotlana ivi swi vanga mhangu leyi lavaka vutshunguri bya xihatla, ku katsa ni ku sindzisiwa ku amukela mpompelo wa ngati. (Ekl. 9:11) Leswaku hi tshama hi lunghekele xiyimo xo tano lexi nga ha humelelaka, Yehovha u lunghiselele mpfuno hi tindlela to tala hi ku tirhisa nhlengeletano yakwe, hambiswiritano u langutele leswaku na hina hi byarha vutihlamuleri bya hina. Hi leswi switsundzuxo leswi nga ku pfunaka.

• Minkarhi hinkwayo tshama u ri ni khadi ra sweswinyana ra Advance Medical Directive/Release.

• Tiyiseka leswaku vana va tshama va ri ni Khadi ra sweswinyana ra Identity.

• Pfuxeta xiengetelo xa Vutirheli Bya Hina Bya Mfumo bya March 1993, kambisisa ndlela leyi u nga burisanaka ha yona ni madokodela ni vaavanyisi malunghana ni ndlela leyi u lavaka va tshungula n’wana wa wena ha yona.

• Hlaya swihloko leswi vulavulaka hi swiaki swa ngati kun’we ni swikhomela-ndhawu swa ngati. (Swin’wana swa swona hi leswi: Xihondzo xo Rindza xa October 1, 1994, tluka 31; June 1, 1990, matluka 30-1; March 1, 1989, matluka 30-1; Xalamuka! (ya Xinghezi) ya December 8, 1994, matluka 23-7; August 8, 1993, matluka 22-5; November 22, 1991, tluka 10; ni swiengetelo swa Vutirheli Bya Hina Bya Mfumo bya March 1993 na June 1992. Veka minkandziyiso leyi laha u nga ta yi kuma kona hi ku hatlisa.)

• Endla xiboho ka ha ri emahlweni xa leswaku u ta pfumela kumbe a wu nge pfumeli leswaku ku tirhisiwa michini yo rhendzelekisa ngati ehandle ka miri wa wena kumbe leswaku u ta yi amukela kumbe a wu nge yi amukeli mirhi leyi pfanganisiweke ni ngati.

• Loko swi koteka, byela vakulu ka ha ri emahlweni leswaku u ta ya exibedlhele, leswaku va ta ku seketela ni ku tivisa Komiti yo Vulavurisana ni Swibedlhele (HLC [Hospital Liaison Committee]) loko swi laveka. Emhakeni ya n’wana lontsongo, kombela vakulu leswaku va tivisa HLC ka ha ri ni nkarhi.

Swi Veke eRivaleni Leswaku A Wu Swi Lavi Ku Mpomperiwa Ngati: Swiviko swin’wana swi kombisa leswaku vamakwerhu van’wana va hlwela ku byela vadokodela leswaku a va swi lavi ku mpomperiwa ngati. Leswi a swi va tsakisi vatshunguri naswona swi nga ha ku nghenisa ekhombyeni ra ku mpomperiwa ngati. Loko vadokodela va tiva leswi u swi kholwelaka naswona ku navela ka wena ku tiyisiwa hi matsalwa lama sayiniweke lama hlamuselaka leswi u swi lavaka, swa va pfuna leswaku va ya emahlweni ni vutshunguri handle ko dya nkarhi naswona hakanyingi va kuma tindlela tin’wana ta ku tshungula handle ko tirhisa ngati.

Tanihi leswi mhangu leyi lavaka vutshunguri bya xihatla yi nga humelelaka nkarhi wun’wana ni wun’wana, naswona leswi hakanyingi swi humelelaka hi nkarhi lowu u nga wu rindzelangiki, teka magoza sweswi leswaku u tisirhelela kun’we ni vana va wena leswaku mi nga mpomperiwi ngati.—Swiv. 16:20; 22:3.