Ku Nyikela Vumbhoni Eka Vanhu Va Tindzimi Hinkwato Ni Vukhongeri Hinkwabyo
1 Vakreste va lembe-xidzana ro sungula va nyikele vumbhoni hi ku hiseka eka vanhu lava a va vulavula tindzimi tin’wana ni lava a va ri va vukhongeri byo hambana-hambana. Hikwalaho ka sweswo, “hi lembe ra 100 kumbexana xifundzha-nkulu xin’wana ni xin’wana lexi nga ekusuhi na Mediteraniya a xi ri ni ntlawa wa Vakreste.”—History of the Middle Ages.
2 Etindhawini to tala laha hi chumayelaka kona hi kuma vanhu vo hambana-hambana lava vulavulaka tindzimi to tala to hambana-hambana. Vo tala va rhurhe etindhawini ta le makaya ni le malokixini ya vantima va ya tshama emadorobeni lamakulu ni lamatsongo. Vanhu lava humaka eAfrika hinkwaro va rhurhele etindhawini ta le madorobeni leswaku va ya lava mintirho. Hikwalaho ka sweswo, emadorobeni yo tala lamakulu ku ni vanhu lava nga va vukhongeri byo hambana-hambana lebyi nga riki bya Vukreste, ku katsa ni Mabudha, Mahindu, Mamoslem ni Vayuda. Hikwalaho ka leswi ku nga ni ku hambana hi tlhelo ra vukhongeri ni tindzimi, swa nonon’hwa swinene ku tiva ndlela yo burisana ni vanhu vo tano hinkwavo ni ku nyikela vumbhoni eka vona. Entiyisweni, hi nga va ni nsimu ya varhumiwa endhawini ya ka hina. Xana hi nga xi yingisa njhani xileriso xa Yesu xo “chumayela evanhwini ni ku nyikela vumbhoni bya rixaladza” eka vanhu va tindzimi ni vukhongeri hinkwabyo?—Mint. 10:42.
Ku Nyikela Vumbhoni Eka Vanhu Lava Vulavulaka Ririmi Rin’wana
3 Ku andza lokukulu ka vahuweleri lavantshwa ku vangiwa hi vanhu lava vulavulaka tindzimi ta vantima lava sweswi va tshamaka etindhawini leti khale a ti ri ta Manghezi ni Mabunu. Ku ni mavandlha yo tala lama vulavulaka tindzimi ta vantima etindhawini leti. Hambiswiritano, ka ha ri na swo tala leswi nga ha endliwaka.
4 Ku Hlula Xihinga Xa Ririmi: A swi kanakanisi leswaku vanhu vo tala va dyondza swo tala hi ku hatlisa ni ku twisisa kahle loko va dyondzisiwa hi ririmi ra ka vona. “Hikwalaho ka mahungu lamanene” ni leswaku va “ma avela van’wana,” vamakwerhu vo tala va xinuna ni va xisati va dyondze ririmi rin’wana. (1 Kor. 9:23) Hambileswi wansati la vulavulaka Xichayina a endleriweke ntila wa timagazini lowu humaka eka makwerhu wa xisati la vulavulaka Xinghezi ku ringana malembe yo tala, wansati loyi u yi arile dyondzo ya Bibele kukondza loko makwerhu un’wana wa xisati, loyi a dyondza Xichayina, a n’wi nyike buku hi ririmi rolero. Hi ntsako u amukele dyondzo kun’we ni buku. Lexi endleke ku cinca loku a ku ri matshalatshala ya makwerhu wa xisati wa vumbirhi yo vula marito ma nga ri mangani hi ririmi ra wansati loyi.—Ringanisa Mintirho 22:2.
5 Hikwalaho ka xivangelo lexinene Xihondzo xo Rindza xa November 1, 1992, xi ni nhlamuselo leyi nge: “Ku dyondza ririmi rimbe, a swi nge kurisi mianakanyo ya vana ntsena, kambe swi ta tlhela swi va endla va va lava pfunaka swinene enhlengeletanweni ya Yehovha.” Swirho swin’wana swa ndyangu wa Bethele swi nghenele khoso yo dyondza ririmi lerintshwa. Hi ndlela leyi, vamakwerhu va xinuna va pfunetile swinene emavandlheni lawa va faneleke va rhangela eka wona. Loko u tiva ririmi rin’wana kumbe u tiyimisele ku ri dyondza, na wena u nga kota ku pfuneta vandlha kumbe ntlawa lowu vulavulaka ririmi rin’wana.—Mt. 9:37, 38.
6 Makwerhu un’wana wa le Florida, U.S.A., la dyondzeke Xivietnam a nga si kuma ntiyiso sweswi u kuma ntsako lowukulu wa ku byela vanhu lava vulavulaka Xivietnam mahungu lamanene. Leswaku a ta kota ku tirhisa vutivi byakwe bya ririmi rolero hi ndlela leyi humelelaka eku nyikeleni ka vumbhoni, u rhurhe ni ndyangu wakwe va ya endhawini leyi a ku ri ni xilaveko lexikulu ensin’wini ya Xivietnam. Hi mpfhuka a rhurha, u kuma vuyelo lebyinene eku dyondzeni ka Bibele ni vanhu vo tala lava humaka eVietnam.
7 Makwerhu wa xisati la nga phayona eCalifornia le U.S.A. u kume vanhu vo hlayanyana lava feke tindleve ensin’wini yakwe. U khongele Yehovha leswaku a n’wi pfuna ku kuma munhu la nga n’wi dyondzisaka ririmi ra mavoko leswaku a ta va dyondzisa ntiyiso. Siku rin’wana loko a ri eku xaveni evhengeleni ra ndhawu yoleyo, u tshinelele hi wanhwana la feke tindleve la tsaleke marito ma nga ri mangani a kombela ku pfuniwa ku kuma nchumu lowu a lavaka ku wu xava. Endzhaku ka ku n’wi pfuna, phayona ri tsale marito ma nga ri mangani ri phofula ku navela ka rona ku dyondza ririmi ra mavoko leswaku ri ta pfuna vanhu lava feke tindleve endhawini yoleyo. Kutani wansati la feke tindleve u tsale xivutiso xa yena, “Ha yini u lava ku pfuna vanhu lava feke tindleve?” Makwerhu wa xisati u hlamule hi ku tsala a ku: “Ndzi un’wana wa Timbhoni ta Yehovha, naswona ndzi lava ku pfuna vanhu lava feke tindleve leswaku va dyondza Bibele. Loko wo ndzi dyondzisa ririmi ra mavoko mina ndzi ta ku dyondzisa Bibele.” Makwerhu wa xisati u ri: “A ndzi tsake ngopfu loko a ku eka mina, ‘Swi lulamile.’” Makwerhu loyi wa xisati a a endzela wansati loyi madyambu man’wana ni man’wana ku ringana mavhiki ya tsevu. U dyondze ririmi ra mavoko, naswona wansati loyi la feke tindleve u dyondze ntiyiso kutani a khuvuriwa! Sweswo swi humelele malembe yo tlula 30 lama hundzeke, naswona makwerhu wa xisati la nga phayona wa ha nyikela vumbhoni eka vanhu lava feke tindleve naswona sweswi u hlanganyela ni vandlha ra vanhu lava tirhisaka ririmi ra mavoko.
8 Loko u kota ku vulavula ririmi rin’wana hi ku rhelela naswona u swi navela naswona u ta swi kota ku rhurhela laha xilaveko xi nga xikulu kona ensin’wini yoleyo, swi nga va njhani loko wo burisana ni vakulu va vandlha hi mhaka leyi. Loko va vona u faneleka ku rhurha, vutisa mulanguteri wa xifundzha loko ku ri ni ndhawu leyi u nga tirhaka eka yona ekusuhi. Loko swi nga ri tano, u nga tsalela Sosayiti, loko vakulu va ta rhumela xikombelo xa wena kun’we ni papila leri hlamuselaka mavonelo ya vona malunghana ni ku faneleka ka wena ni vutshila bya wena hi ririmi leri.—Vona Xihondzo xo Rindza xa August 15, 1988, matluka 21-3.
9 Ku Tirhisa Switirho Leswi Nga Kona: Tibuku ta hina ta kumeka ni hi tindzimi to tala ta laha nsin’wini ya hina. Swi nga va kahle loko u tshama u ri ni swiphephana ni broxara leyi nge Leswi Xi Swi Languteleke hi tindzimi leti vulavuriwaka ensin’wini ya ka n’wina. Loko ririmi leri munhu loyi u vulavulaka na yena ku nga ri Xitsonga, n’wi vutise ririmi leri a kotaka ku ri hlaya. Leswi swi ta ku pfuna ku vona leswaku i tibuku tihi leti u nga ti fambisaka. Hi xikombiso, munhu loyi a vulavulaka Xiswazi a nga swi kota ku hlaya Xizulu.
10 Hambiloko u nga vulavuli rona ririmi ra munhu loyi u hlanganaka na yena entirhweni wa ku nyikela vumbhoni, u nga swi kota ku n’wi byela mahungu lamanene. Njhani? Hi ku tirhisa xibukwana lexi nge Good News for All Nations. Xi ni rungula leri tsariweke hi ku komisa hi tindzimi ta 59. Hilaha swiletelo leswi nga eka tluka 2 ra xibukwana lexi swi hlamuselaka hakona, endzhaku ka loko u tive ririmi ra n’wini wa muti, n’wi nyike xibukwana lexi leswaku a ta hlaya eka tluka leri faneleke. Endzhaku ka loko a hlayile, n’wi kombise buku hi ririmi ra yena. Loko u nga ri na yona, n’wi kombise buku ya Xitsonga. N’wi byele leswaku u ta vuya ni buku leyi hi ririmi ra yena. Kombela vito ra yena, ivi u ri tsala kun’we ni adirese ya yena. Kumbexana u nga rhumela rungula leri evandlheni ra le kusuhi kumbe eka ntlawa lowu vulavulaka ririmi rero. Leswaku u kuma swiletelo swin’wana malunghana ni ku rhumela rungula ro tano eka vamakwerhu lava fanelekaka, vona tluka 11 ra Vutirheli Bya Hina Bya Mfumo bya October 1993. Loko ku nga ri na munhu la vulavulaka ririmi rero la nga ta endla riendzo ro vuyela, u nga ha tiyimela hi wexe, kumbexana u dyondza na munhu loyi hi ku tirhisa buku ya Xitsonga.—1 Kor. 9:19-23.
Ku Nyikela Vumbhoni Eka Vanhu Va Vukhongeri Lebyi Nga Riki Bya Vukreste
11 Ku tiva timhaka ta vukhongeri bya munhu swi hi pfuna ku nyikela vumbhoni lebyi humelelaka malunghana ni Mfumo wa Xikwembu. Buku leyi nge Ku Lavisisa Ka Vanhu Xikwembu yi hi pfuna ku tiva vukhongeri lebyi tivekaka swinene emisaveni leswaku hi ta twisisa leswi vanhu va swi pfumelaka ni ku va pfuna ku va ni vutivi bya ntiyiso.
12 Bokisi leri nga eka tluka ro hetelela ra xiengetelo lexi ri kombisa nxaxamelo wa tibuku ta sweswinyana leti nhlengeletano ya Yehovha yi ti humeseke leswaku ti tirhisiwa eku nyikeleni vumbhoni eka vanhu lava nga riki Vakreste. Hi ku hlaya tibuku leti, hi dyondza ku byela vanhu lava mahungu lamanene. Hi nga yi rivali buku leyi pfunaka swinene leyi nge Ku Hlamulana. Matluka 21-4 ya buku yoleyo ma ni swiringanyeto leswi pfunaka malunghana ni ndlela yo angula Mabudha, Mahindu, Mamoslem ni Vayuda.
13 Vana Ni Vukheta Eka Leswi U Swi Vulaka: A hi fanelanga hi cinca mavonelo ya vanhu va vukhongeri byo karhi hi ku vula leswaku tidyondzo ta vona entiyisweni ta fana ni ta lava vukhongeri byin’wana. Ematshan’weni ya sweswo, tikarhatele ku twisisa ndlela leyi munhu loyi u vulavulaka na yena a anakanyaka ha yona. (Mint. 10:24-35) Tanihi Mumoslem, Salimoon u kule a ri karhi a pfumela leswaku Koran i rito ra Xikwembu. Kambe a nga kalanga a yi tshemba dyondzo ya Mamoslem ya leswaku Xikwembu xa tintswalo xi nga xanisa vanhu etiheleni leti hisaka. Siku rin’wana, Timbhoni ta Yehovha ti n’wi rhambele enhlanganweni. U vone ntiyiso hi nkarhi wolowo, i nkulu evandlheni ra Vukreste naswona sweswi u tirha hi ntsako.
14 Loko hi nyikela vumbhoni eka vanhu lava tidyondzo ta vona ti nga riki tona ta Vukreste, hi fanele hi tivonela leswaku xingheniso xa hina a xi hi dyeli nkarhi wa ku burisana na vona hi mahungu lamanene. (Mint. 24:16) Swirho swa vukhongeri byo karhi a swi lavi ku twa nchumu loko munhu a ringeta ku cinca tidyondzo ta swona. Hikwalaho xiya-xiya tindlela to kuma tinhla leti pfumelelanaka na vona leswaku u ta va kombisa ntiyiso lowu heleleke wa Rito ra Xikwembu. Vanhu lava fanaka ni tinyimpfu va ta angula marito ya ntiyiso lama vuriwaka hi ndlela ya tintswalo ni hi ndlela leyi twisisekaka.
15 Ku hlawula ka hina marito na kona i ka nkoka, handle ka swona hi nga endla leswaku vanhu va papalata rungula ra hina swi nga fanelanga. Hi xikombiso, loko u byela munhu loyi u vulavulaka na yena leswaku u Mukreste, a nga ha ku fanisa ni vanhu va tikereke ta Vujagana, leswi nga ha vangaka xihinga. Nakambe swi nga ha pfuna ku vulavula hi Bibele tanihi ‘Matsalwa’ kumbe “matsalwa yo kwetsima.”—Mt. 21:42; 2 Tim. 3:15.
16 Loko u kuma munhu la nga wa vukhongeri lebyi nga riki bya Vukreste naswona u nga swi lunghekelanga ku nyikela vumbhoni hi nkarhi wolowo, tirhisa nkarhi wolowo ku tivana na yena ku antswa, u n’wi siyela xiphephana ni ku byelana mavito. Kutani tlhelela endzhaku ka siku rin’we kumbe mambirhi, endzhaku ka loko u lunghekele ku nyikela vumbhoni.—1 Tim. 4:16; 2 Tim. 3:17.
17 Ku Nyikela Vumbhoni Eka Mabudha: (Vona ndzima 6 ya buku leyi nge Ku Lavisisa Ka Vanhu Xikwembu.) Tidyondzo ta Mabudha a ti fani. Ematshan’weni ya ku pfumela eka vukona bya Muvumbi wa xiviri, Mabudha ma pfumela eka wanuna wa Muindiya Buddha Gautama wa lembe-xidzana ra vutsevu B.C.E., tanihi loyi a faneriwaka hi ku gandzeriwa. Loko a vone munhu la vabyaka ro sungula, munhu la dyuhaleke ni mufi, Gautama u sungule ku karhateka malunghana ni leswi vutomi byi vulaka swona. U tivutisile, ‘Xana vanhu va velekeriwe ku xaniseka, ku dyuhala ni ku fa ntsena?’ Kavula, hi nga swi hlamula swivutiso swo tano swa Mabudha lama nga ni timbilu letinene lama lavaka ku tiva tinhlamulo.
18 Loko u vulavula ni Mabudha, tirhisa rungula ni mintiyiso leyi twisisekaka leyi kumekaka eka buku leyikulu eka hinkwato, ku nga Bibele. Ku fana ni vanhu van’wana vo tala, Mabudha ma tsakela ngopfu ku rhula, mahanyelo lamanene ni vutomi bya ndyangu, naswona ma swi tsakela ku bula hi timhaka leti. Leswi swi nga ku fikisa laha u kandziyisaka Mfumo tanihi ntlhantlho wu ri woxe wa swiphiqo swa vanhu.
19 Emadorobeni yo tala lamakulu ni lamatsongo etikweni leri, ku ni Machayina lama pfumelaka eka Vubudha ni le ka tifilosofi tin’wana ta le Vuxeni. Loko makwerhu wa xisati wa le Montana, U.S.A., a vone wanuna wa Muchayina exitolo xo xavisa swakudya, u n’wi nyikete xiphephana hi ririmi rakwe ni ku n’wi byela hi ta dyondzo ya Bibele. U te: “Xana u vula Bibele leyo Kwetsima ke? A ndzi ri karhi ndzi yi lavisisa evuton’wini bya mina hinkwabyo!” U sungule ku dyondza evhikini rolero ni ku va kona eminhlanganweni hinkwayo.
20 Emalembeni ya khume lama hundzeke, makwerhu wa xisati la nga phayona eNevada, U.S.A., a a ri karhi a dyondzisa ntiyiso eka swichudeni swa Machayina. Loko a ri karhi a tirha emuakweni wun’wana lowu nga ni tifuleti ta nhungu lowu ku tshamaka swichudeni leswi, u khongele eka Yehovha leswaku a n’wi pfuna ku sungula dyondzo eka fuleti yin’wana ni yin’wana. Ku nga si hela mavhiki mambirhi a a dyondza ni xichudeni xin’we eka fuleti yin’wana ni yin’wana. Xingheniso lexi n’wi tirheleke kahle a ku ri ku vula leswaku u kume leswaku swichudeni swi karhata hi nchumu lowu fanaka—hinkwaswo swi lava ku rhula ni ntsako. Hikwalaho u vutise swichudeni leswi loko na swona swi karhateka hi mhaka leyi. Hinkwaswo swi vule nchumu lowu fanaka. U swi kombise broxara leyi nge Lasting Peace and Happiness—How to Find Them, leyi endleriweke Machayina. Endzhaku ka loko swi dyondze ka ntlhanu, xichudeni xin’wana xi n’wi byele leswaku a xi ri karhi xi lavisisa ntiyiso ku ringana nkarhi wo leha naswona sweswi xi wu kumile.
21 Ku Nyikela Vumbhoni Eka Mahindu: (Vona ndzima 5 ya buku leyi nge Ku Lavisisa Ka Vanhu Xikwembu.) Vuhindu a byi na dyondzo leyi heleleke. Filosofi ya byona yi rharhangane ngopfu. Mahindu ma ni dyondzo ya vunharhu-un’we ya xikwembu xa wona lexikulu Brahman (Brahma la nga Muvumbi, Vishnu la nga Muhlayisi, na Siva la nga Mulovisi). Ku pfumela eka dyondzo ya moya-xiviri lowu nga fiki i swa nkoka eka dyondzo ya vona ya ntswariwo-nyingi, leswi nyikaka Mahindu langutelo ra ku kunguhateriwa vutomi. (Vona buku leyi nge Ku Hlamulana, matluka 207-11, ni Xihondzo xo Rindza xa May 15, 1997, matluka 3-8.) Vuhindu byi dyondzisa dyondzo ya ndzivalelano, ni leswaku vukhongeri hinkwabyo byi dyondzisa ntiyiso lowu fanaka.
22 Xingheniso lexi hi nga xi tirhisaka loko hi nyikela vumbhoni eka Mahindu i ku hlamusela ntshembo wa hina lowu sekeriweke eBibeleni wa ku hanya hi masiku hi ri vanhu lava hetisekeke emisaveni kun’we ni tinhlamulo leti enerisaka leti Bibele yi ti nyikelaka ta swivutiso swa nkoka leswi vanhu hinkwavo va tivutisaka swona.
23 Ku Nyikela Vumbhoni Eka Vayuda: (Vona ndzima 9 ya buku leyi nge Ku Lavisisa Ka Vanhu Xikwembu.) Ku hambana ni vukhongeri byin’wana lebyi nga riki bya Vukreste, Vuyuda byi sekeriwe eka matimu, hayi eka mintsheketo. EMatsalweni hinkwawo lama huhuteriweke ya Xiheveru, ku ni xisekelo xa nkoka malunghana ni ku lavisisa ka vanhu Xikwembu xa ntiyiso. Nakambe, ku hambana ni Rito ra Xikwembu, dyondzo ya xisekelo eka Vuyuda bya manguva lawa i dyondzo ya ku nga fi ka moya-xiviri. Hi nga twisisana na vona ntsena loko hi vula leswaku hi gandzela Xikwembu xa Abrahama ni ku pfumela leswaku hinkwerhu hi langutana ni ku nonon’hweriwa loku fanaka emisaveni ya namuntlha.
24 Loko u kuma Muyuda la nga pfumeriki eka Xikwembu, ku n’wi vutisa loko nkarhi hinkwawo a titwa hi ndlela yoleyo swi nga ku pfuna leswaku u twisisa leswi nga n’wi tsakisaka. Hi xikombiso, a nga ha va a nga kumanga nhlamuselo leyi enerisaka ya leswaku ha yini Xikwembu xi pfumelela ku xaniseka. Vayuda lava nga ni timbilu letinene va nga ha khutaziwa ku tlhela va kambisisa nhlamuselo ya Yesu tanihi Mesiya, ku nga ri hi ndlela leyi Vujagana byi n’wi hlamuselaka ha yona, kambe hi ndlela leyi vatsari va Matsalwa ya Xigriki va Vayuda va n’wi hlamuselaka hakona.
25 Ku Nyikela Vumbhoni Eka Mamoslem: (Vona ndzima 12 ya buku leyi nge Ku Lavisisa Ka Vanhu Xikwembu.) Mamoslem ma pfumela eka Vuislem (kumbe, Vumuhammad), leswi katsaka ku pfumela eka Allah tanihi xikwembu xa vona lexikulu ni le ka Muhammad (570-632 C.E.) tanihi muprofeta wa yena lonkulu wo hetelela. Tanihi leswi va nga pfumeriki leswaku Xikwembu xi ni n’wana, Mamoslem ma languta Yesu Kreste tanihi muprofeta lontsongo wa Xikwembu, a ku na swin’wana swo tlula sweswo. Koran, leyi nga ni malembe lama nga hansi ka 1400 hi vukhale, yi tshaha Matsalwa ya Xiheveru ni ya Xigriki. Ku ni ku yelana lokukulu exikarhi ka Vuislam ni Vukhatoliki. Vukhongeri lebyi byi dyondzisa ku nga fi ka moya-xiviri, xiyimo xa ku xanisiwa ka nkarhinyana ni vukona bya ndzilo wa tihele.
26 Hi nga twisisana ntsena emhakeni ya leswaku ku ni Xikwembu xin’we xa ntiyiso ni leswaku Bibele yi huhuteriwe hi xona. Muhlayi wa vukheta wa Koran u vona tinhlamuselo ta Torah, Tipisalema ni Tievhangeli ti ri Rito ra Xikwembu ni leswaku ti fanele ti langutiwa tano ni ku xiximiwa. Hikwalaho, u nga dyondza tibuku leti ni munhu wa kona.
27 Xingheniso lexi xi nga pfuna loko u vulavula ni munhu loyi a vulaka leswaku yena i Mumoslem: “A ndzi si vulavula ni vanhu vo tala lava nga Mamoslem, kambe ndzi hlaye swin’wana ebukwini leyi malunghana ni tidyondzo ta vukhongeri bya wena. [Pfula tluka 24 ebukwini leyi nge Ku Hlamulana.] Yi vula leswaku mi pfumela leswaku Yesu a a ri muprofeta kambe ni leswaku Muhammad a a ri muprofeta lonkulu naswona wo hetelela. Xana ma pfumela ni leswaku Muxe a a ri muprofeta wa ntiyiso? [Yimela nhlamulo.] Xana ndzi nga ku kombisa leswi Muxe a swi dyondzeke eka Xikwembu malunghana ni vito ra xona ra xiviri?” Kutani hlaya Eksoda 6:2, 3. Eka riendzo ro vuyela, mi nga ha bula hi xihlokwana lexi nge “One God, One Religion,” eka tluka 13 ra xibukwana lexi nge The Time for True Submission to God.
28 Namuntlha, vo tala va endla hi ku pfumelelana ni marito ya Esaya 55:6, lama nge: “Lav̌ani Yehova loko a ha kumeka; huwelelani ka yena, loko a ha ri kusuhi!” Leswi swi tirha eka vanhu hinkwavo va timbilu letinene, ku nga khathariseki leswaku va vulavula ririmi rihi kumbe leswaku i va vukhongeri byihi. Hi nga tiyiseka leswaku Yehovha u ta katekisa matshalatshala ya hina loko hi tikarhatela ku ya “endla vanhu va matiko hinkwawo va va vadyondzisiwa.”—Mt. 28:19.
[Box on page 28]
Tibuku Leti Endleriweke Vanhu Lava Nga Riki Vakreste
Mabudha
In Search of a Father (Xibukwana)
“Vonani, Ndzi Endla Swilo Hinkwaswo Swi Va Leswintshwa” (Broxara)
Machayina
Lasting Peace and Happiness—How to Find Them (Broxara)
Mahindu
From Kurukshetra to Armageddon—And Your Survival (Xibukwana)
Our Problems—Who Will Help Us Solve Them? (Broxara)
The Path of Divine Truth Leading to Liberation (Xibukwana)
Victory Over Death—Is It Possible for You? (Xibukwana)
Why Should We Worship God in Love and Truth? (Broxara)
Mamoslem
How to Find the Road to Paradise (Xiphephana)
The Time for True Submission to God (Xibukwana)
Vayuda
A Peaceful New World—Will It Come? (Xiphephana No. 17)
Xana Timbhoni Ta Yehovha Ti Pfumela Yini? (Xiphephana No. 18)
Will There Ever Be a World Without War? (Broxara)