U Nga Ku Yini Eka Mumoslem?
1 Xana u tshame u nyikela vumbhoni eka Mumoslem? Loko swi ri tano, swi nga ha endleka se u swi tiva leswaku Mamoslem ma pfumela ngopfu eka Xikwembu. Hambiswiritano, a va tivi swo tala hi Paradeyisi leyi nga ta va kona emisaveni hilaha vaprofeta va Yehovha va vuleke hakona ka ha ri emahlweni, naswona hi rhandza ku bula na vona hi ntshembo lowu. (1 Tim. 2:3, 4) Rungula leri landzelaka ri ta ku pfuna leswaku u nyikela vumbhoni hi ndlela leyinene.
2 Mamoslem ma pfumela eka Allah kumbe Xikwembu naswona ma kholwa leswaku Muḥammad i muprofeta wa Xikwembu. Buku ya wona yo kwetsima i Korani, vukhongeri bya vona byi vitaniwa Islam, leswi vulaka “ku titsongahata.” Korani yi vula leswaku ku hemba ni ku gandzela swikwembu swa hava swi bihile, yi vula leswaku Xikwembu i xin’we naswona a hi xiphemu xa Vunharhu-un’we. Nakambe yi dyondzisa ku nga fi ka moya-xiviri, ndzilo wa tihele ni paradeyisi ya le tilweni. Mamoslem ma teka Bibele tanihi Rito ra Xikwembu kambe ma vula leswaku yi cinciwile, kambe Korani ya ha tengile ku sukela eka ririmi ra yona ro sungula.
3 Kombisa Xinghana, Vutlharhi Ni Ku Anakanyela: Loko u burisana ni Mumoslem, kombisa xinghana ni vutlharhi. (Swiv. 25:15) Tsundzuka leswaku tidyondzo ta Mamoslem ti dzime timitsu swinene naswona vunyingi bya tona ti dyondziwe hi ku nhlokohatiwa. Ku anakanyisisa hi tidyondzo ta vukhongeri ni ku khorwiseka hi leswi ku rhandza ka Xikwembu ku nga swona, a swi byi khumbi vumoya bya wona. (Rhom. 12:2) Ku lehisa mbilu ni ku anakanyela i swa risima swinene leswaku hi kota ku pfuna Mamoslem.—1 Kor. 9:19-23.
4 Papalata swiga leswi nga ta endla leswaku Mumoslem a anakanya leswaku u Mujagana. Swi veke erivaleni leswaku a wu fambisani ni vukhongeri bya Khatoliki kumbe bya Protestente, swi kombise khwatsi leswaku u hambanile ni vukhongeri byin’wana. Hlamusela leswaku Bibele i Rito ra Xikwembu. Tanihi leswi Mamoslem ma xi nyenyaka xiga lexi nge “N’wana wa Xikwembu,” hakanyingi swa pfuna ku papalata ku tirhisa xiga lexi, kumbexana mi nga ha burisana hi mhaka leyi loko munhu wa kona a endle nhluvuko wa moya. Hambiswiritano, u nga vulavula hi Yesu tanihi muprofeta kumbe murhumiwa. Papalata ku kanetana. Loko u vona onge n’wini wa muti u sungula ku visungana, hambana na yena.
5 Swa antswa ku vulavula ni munhu un’we ku nga ri ku vulavula ni ntlawa wa vanhu. Hakanyingi, i swinene ku va vavasati va nyikela vumbhoni eka vavasati-kulobye ni vavanuna eka vavanuna-kulobye. Entiyisweni, a hi xikolokolo ku endla tano kambe swa fanela leswaku hi tirhisa vutlharhi emhakeni leyi. Nakambe, Mamoslem yo tala ma nyenya maambalelo ni ku tilunghisa ka vavasati loku ma anakanyaka leswaku a ku fanelanga. Vamakwerhu va xisati va fanele va xalamukela xiyimo lexi.—1 Kor. 10:31-33.
6 Swilo Leswi U Nga Vulavulaka Ha Swona: U nga tipfinyingi loko u vulavula hi vukulukumba bya Xikwembu ni rirhandzu ra xona. U nga kanakani ku vula leswaku u mupfumeri wa xiviri, u nga ha vula leswaku Xikwembu i xin’we (ku nga ri Vunharhu-un’we) naswona swi veke erivaleni leswaku swi bihile ku gandzela swifaniso. Vulavula hi vubihi lebyi nga kona emisaveni namuntlha—tinyimpi, madzolonga, ku vengana ka tinxaka ni vukanganyisi lebyi nga erivaleni exikarhi ka vanhu va vukhongeri.
7 Broxara leyi nge The Guidance of God—Our Way to Paradise yi ni rungula leri engetelekeke mayelana ni rungula leri u nga ri tirhisaka leswaku u sungula bulo ni Mamoslem. Yi endleriwe ku xokola ku tsakela ka Mamoslem lama tshamaka endhawini leyi ma titwaka ma ntshunxekile ku dyondza Bibele.
8 Hi ku tirhisa xingheniso lexi, u nga ha vula leswi:
◼ “Ndzi swi tsakela ngopfu ku vulavurisana ni Mamoslem. A ndzi ri karhi ndzi hlaya hi ta vukhongeri bya n’wina naswona ndza tshemba leswaku a ndzi endli xihoxo hi ku vula leswaku Mamoslem ma pfumela eka Xikwembu xin’we xa ntiyiso ni le ka vaprofeta hinkwavo. [Yimela nhlamulo.] Ndzi tsakela ku vulavula na wena hi vuprofeta bya khale lebyi vuleke ka ha ri emahlweni mayelana ni ku hundzuriwa ka misava yi va paradeyisi. Xana wa swi tsakela leswaku ndzi ku hlayela leswi muprofeta loyi a swi tsaleke? [Hlaya Esaya 11:6-9.] Vuprofeta lebyi byi ndzi tsundzuxa marito lama nga eka Korani lama tshahiweke eka broxara leyi.” Pfula tluka 9 ra broxara leyi nge Guidance of God ivi u hlaya marito lama dzwihaleke lama kombetelaka eka vanhu vo lulama lava nga ta dya ndzhaka ya misava. Loko munhu wa kona a kombisa ku tsakela, yisa bulo emahlweni hi ku tirhisa ndzimana 7 ku ya ka 9 eka tluka leri landzelaka. N’wi siye ni broxara hi munyikelo wa R1,20 naswona lunghiselela ku tlhela u vuya.—Leswaku u kuma xingheniso xin’wana, vona Vutirheli Bya Hina Bya Mfumo bya February 1998, tluka 6, ndzimana 27.
9 Loko u kombela ku dyondza ni munhu broxara leyi nge Guidance of God, i swinene ku vula leswaku i bulo ku nga ri dyondzo ya Bibele. Loko mi heta ku dyondza broxara leyi, xichudeni xi fanele xi va xi lunghekele ku dyondza broxara leyi nge Leswi Xi Swi Languteleke kumbe buku leyi nge Vutivi. Minkandziyiso yin’wana leyi endleriweke Mamoslem i xiphephana lexi nge How to Find the Road to Paradise ni xibukwana lexi nge The Time for True Submission to God.
10 Leswi hi nga ni vutivi lebyi mayelana ni tidyondzo ta Vuislam ni leswi ma swi nyenyaka, hi nga ha tirhisa vutlharhi mayelana ni tibuku leti hi ti hlawulaka leswaku hi ta ti fambisela Mamoslem ni ndlela ya hina ya ku nyikela vumbhoni eka wona. Onge Yehovha a nga hambeta a katekisa matshalatshala ya hina ya ku pfuna vanhu va tinxaka hinkwato va vitana vito rakwe ivi va ponisiwa.—Mint. 2:21.