Khutaza Van’wana Ku Hlaya Xihondzo Xo Rindza

1 Hi April na May, hi fanele ku khutaza varhandzi va ntiyiso ku hlaya Xihondzo xo Rindza nkarhi na nkarhi. Ntokoto wa hina vini wu hi khorwisile leswaku eka timagazini hinkwato leti humesiwaka namuntlha, hi xona ntsena xi phamelaka swakudya swa moya swa nkoka leswi laviwaka hi lava va kololaka ni ku rila hikwalaho ka swiyimo leswo biha emisaveni.—Ezekiel 9:4.

2 Xihondzo xo Rindza xi hi pfunile ku twisisa vuprofeta bya Bibele lebyi kombisaka leswaku hi hanya enkarhini wa makumu ni leswaku Mfumo wa Xikwembu hi ku hatlisa wu ta tisa ku rhula emisaveni. Nkhathalelo wa hina wa xiviri wa vutomi bya van’wana wu hi susumetela ku avelana na vona ntshembo lowu wunene. Naswona ha khutaziwa hi ku vona leswaku vo tala va timbilu letinene va hlengeleteriwa ku pona.—Yohane 10:16.

3 “Xana Wu Hlwela Hi Ndlela Leyi U Nga Yi Anakanyiki?” i nhloko-mhaka leyi tlhontlhaka mianakanyo ya xin’wana xa swihloko leswi nga enkandziyisweni wa Xihondzo xo Rindza wa April 1, 1991. Nkandziyiso wa April 15 wu kombisa xihloko lexi nge “Ku Rhula Loku Nga Heriki Kahle-kahle Ku Ta Fika Rini?” Swihloko leswi swi nga hlanganisiwa kahle ni Mhaka Yo Vulavurisana ya sweswinyana, “Ku Rhula Ka Misava, Xana Ku Tshinele?” Ku kota ku vona loko n’wini wa muti a tsakela mahungu lamanene hakunene, n’wi kokele eka bulo ra Bibele leri hisaka ni ra xinghana. Leswi swi lava ku lunghiselela ni ku lungheka ka ha ri emahlweni leswaku u kombisa ndlela leyi ha yona swihloko leswi nga eka timagazini ta sweswinyana swi nga pfunaka n’wini wa muti ku kurisa ku twisisa ka yena mhaka leyi ku vulavuriwaka ha yona.

4 Hi lava ku khutaza vanhu vo tala hi laha swi kotekaka ha kona ku endla xikhokhelo xa Xihondzo xo Rindza. Hambi leswi handle ko kanakana hi nga ta kuma swo tala swa swikhokhelo swa hina hi yindlu na yindlu, a hi fanelanga ku rivala lava hi xaviselanaka na vona, vaakelani ni maxaka ya hina. Loko munhu a ala nyiko ya xikhokhelo, ringanyeta leswaku a teka timagazini timbirhi. U nga ha swi kota ku tsala vito ra yena entileni wa wena wa timagazini ivi u endla maendzo ya nkarhi na nkarhi ya munhu hi xiyexe. Ku tihlanganisa ka wena ka nkarhi na nkarhi ni munhu loyi swi ta ku pfuna ku hlakulela swilaveko ni ku kota ku vona loko swi fanerile ku n’wi fambisela xikhokhelo. Tsundzuka leswaku ntirho wa hina i ku chumayela mahungu lamanene ni ku endla vadyondzisiwa.—Matewu 24:14; 28:19, 20.

5 April na May ti ta hi nyika minkarhi yo tala yo hangalasa mahungu lamanene ya Mfumo wa Yehova hi yindlu na yindlu kun’we na hi mabulo ya xitshuketa ni vanhu lava hi hlanganaka na vona. Hi nga tshemba leswaku Yehova u ta ya emahlweni a katekisa matshalatshala ya hina yo kuma ni ku nyikela mphamelo wa swakudya swa moya leswi lavekaka swa lava titsongahataka ensin’wini ya hina.