Ku Nyikela Xikhokhelo Xa Xihondzo xo Rindza Hi May
1 Xikongomelo xa Xihondzo xo Rindza xi vekiwe hi ku kongoma eka nkandziyiso wun’wana ni wun’wana ehenhla ka tluka 2. Hi nga endla yini hi ku pfumelelana ni xikongomelo xexo lexi vuriwaka leswaku hi pfuna vanhu vo tala hi laha swi kotekaka ha kona? Hi May, hi ta endla matshalatshala yo hlawuleka yo khutaza vanhu vo tala hi laha swi kotekaka ha kona leswaku va endla xikhokhelo xa Xihondzo xo Rindza.
2 Eka loyi a tivulaka Mukriste hi nga ha ku:
◼ “Hi vutisa vaakelani va hina xivutiso naswona hi nga tlangela nhlamulo ya wena eka xona. Tanihi leswi Yesu a hi dyondziseke ku khongelela Mfumo wa Xikwembu leswaku wu ta, ni leswaku ku rhandza ka xona ku endliwa emisaveni tanihi le tilweni, xana u ehleketa leswaku ku rhandza ka Xikwembu ku ta endliwa la misaveni hakunene?” Yimela nhlamulo, ivi u pfula eka Esaya 55:10, 11 kutani u kombela n’wini wa muti ku xiya ndlela leyi switshembiso hinkwaswo swa Xikwembu swi nga ta hetiseka ha yona.—rs, tl. 12, xingheniso xa vumbirhi ehansi ka “Kingdom.”
3 Loko n’wini wa muti a kombisa ku tsakela, u nga ha ya emahlweni hi ku vula u ku:
◼ “Xin’wana xa swikongomelo swa Xihondzo xo Rindza i ku yisa nyingiso eku hetisekeni ka vuprofeta bya Bibele. Xiya xihloko lexi.” Kutani yisa nyingiso eka xihloko xo sungula xa nkandziyiso wa Xihondzo xo Rindza xa May 1, “1914—Lembe Leri Hlamariseke Misava” ivi u ku: “U nga ha va u vutisa leswaku, ‘Ha yini ndzi fanele ndzi lava ku tiva hi ta 1914?’ Xiya leswi ndzimana 2 yi swi vulaka mayelana na 1914 ni Xihondzo xo Rindza.” Endzhaku, hlaya ndzimana yoleyo.
4 Loko u lava ku va ni bulo ro leha, mhaka leyi fanaka yi nga engeteriwa hi ku katsa ndzimana leyi nga eka Nhlavutelo 21: 3-5, hi laha swi kombisiweke ha kona ebukwini leyi nge Reasoning.
Emhakeni leyi, endzhaku ko hlaya Esaya 55:10, 11, u nga ha ku:
◼ “Vuprofeta byo hlamarisa malunghana ni ku rhandza ka Xikwembu hi misava byi ta hetiseka ku nga ri khale. Byi ta khumba vutomi bya mina na wena. Yingisela leswi tsariweke eka Nhlavutelo 21:3-5.” Kutani u nga hlaya tindzimana teto ivi u hlamusela mikateko leyi nga tata ehansi ka vulawuri bya Mfumo wa Xikwembu. Boxa ndlela leyi Xihondzo xo Rindza xi huwelelaka hulumendhe ya Mfumo wa Xikwembu ha yona.
U nga ha ku:
◼ “Nkandziyiso wa May 1 wu kombisa xihloko lexi nge ‘I Mani La Nga Ta Pona “Nkarhi Wa Maxangu”?’ Xi ta ku pfuna ku vona ndlela leyi u nga hanyaka ha yona emisaveni leyintshwa ya ku lulama ehansi ka Mfumo wa Xikwembu lowu hi hlayaka ha wona eka Nhlavutelo 21.”
5 Tirhisa Xihondzo xo Rindza Tanihi Xitepisi Xo Ya Eka Dyondzo Ya Bibele: Pakani ya hina i ku pfuna van’wana ku dyondza ntiyiso leswaku na vona va va vatirhi-kulobye va Yehova ni ku hlanganyela eku huweleleni ka Mfumo wa Yehova. Kutani ke, loko hi kuma vanhu lava tsakelaka, hi fanele hi va tsala ivi hi tlhelela hi ku hatlisa.
6 Hambi leswi handle ko kanakana hi nga ta kuma swo tala swa swikhokhelo swa hina loko hi famba hi yindlu na yindlu, a hi fanelanga hi rivala lava hi xaviselanaka na vona, vaakelani ni maxaka ya hina. Loko hi ri entirhweni wa le xitarateni, un’wana a nga ha ku: “Ndzi hlaya timagazini ta n’wina nkarhi hinkwawo.” Hlamusela ndlela leyi a nga kumaka Xihondzo xo Rindza ha yona hi ku endla xikhokhelo. Xana vana va hina va na xona xikhokhelo? Xana hi tshame hi anakanya hi ku rhumela nyiko ya xikhokhelo eka wun’wana loyi hi n’wi rhandzaka hakunene? Ku vuriwa yini hi lava nkarhi na nkarhi hi endlaka maendzo yo vuyela eka vona kumbe hambi ku ri swichudeni swa hina swa Bibele? Loko munhu a nga swi koti ku endla xikhokhelo xa lembe, n’wi endlele xikhokhelo xa tin’hweti ta tsevu. Loko munhu a ala nyiko ya xikhokhelo, ringanyeta leswaku a teka timagazini timbirhi.
7 Tanihi leswi hi avelanaka ntiyiso ni van’wana hi mpfuno wa Xihondzo xo Rindza, onge hi nga lava nkongomiso wa Yehova entirhweni wa hina nkarhi hinkwawo, leswaku hi ta kuma vanhu lava fanaka ni tinyimpfu.—Yoh. 21:15-17.