Fambisa Swikhokhelo Nkarhi Wun’wana Ni Wun’wana
1 Hi ni xivangelo lexinene xo tlangela Xihondzo xo Rindza na Xalamuka! Hi tihi timagazini tin’wana leti tsakisaka ku fana na leti emisaveni hinkwayo? N’hweti leyi ku ta fambisiwa timagazini entirhweni wa hina wo chumayela, mayana rungula ra matimba swonghasi leri minkandziyiso ya October yi nga na rona! Hi ntolovelo, hi fambisa swikhokhelo swa hina swo tala entirhweni wa yindlu na yindlu; hambi swi ri tano, hi ta lava ku lunghekela ku swi fambisa nkarhi wun’wana ni wun’wana lowu faneleke.
2 Loko u fambisa “Xihondzo xo Rindza” xa October 1 u nga ha pfuxa ku tsakela hi xihloko lexi nge “Misava Yo Pfumala Nyimpi—Rini?” u ku:
◼ “Vanhu vo tala va hlamala leswi misava yo pfumala nyimpi yi vonakaka yi nga fikeleriwi ku nga khathariseki matshalatshala lama vanhu va ma endlaka. Xana u anakanya yini hi tinhlamuselo leti nga eka tluka 5 ra Xihondzo xo Rindza xa October 1? [Hlaya xivulwa xo sungula eka yin’wana ni yin’wana ya tindzimana timbirhi leti nga eku sunguleni, ehansi ka xihlokwana lexi nge “Vukhongeri—Xihinga Lexikulu,” kutani u yimela nhlamulo.] Kavula, leswi a swi vuli swona leswaku ku to tshama ku ri na tinyimpi. Xiya xitshembiso xa Xikwembu lexi nga laha eka Esaya 9:6, 7.” U nga ha hlaya ndzimana leyi eBibeleni ya wena kumbe hi laha yi tshahiweke ha kona exihlokweni xa Xihondzo xo Rindza. Hlamusela hi ku komisa leswaku Xihondzo xo Rindza xi yimelela Mfumo wa Yehovha tanihi wona ntsena ntshembo wa misava leyi nga ni ku rhula, kutani u fambisa xikhokhelo. Loko xikhokhelo xi nga amukeriwi, fambisa magazini na munghana wa wona wa Xalamuka! kutani u khutaza munhu wa kona leswaku a ti hlaya.
3 Loko u fambisa “Xalamuka!” ya November 8 u nga ha ku:
◼ “Xana u anakanya yini hi xivutiso lexi nga exifunengetweni xa magazini lowu: ‘Ha Yini Vutomi Byi Kome Swonghasi?’ [Yimela nhlamulo.] Nxaxamelo lowu wa swihloko wu yisa nyingiso eka leswi vativi va sayense va manguva lawa ni van’wana va swi vulaka mayelana ni ku dyuhala, naswona swi komba leswi Muvumbi wa hina a swi tshembiseke malunghana ni ku langutela vutomi lebyi nga heriki. Ndzi tsakela ku ku siyela kopi leyi ni munghana wa yona hi munyikelo wa R1,60.”
4 Loko u kuma vanhu va vukhongeri, ha yini u nga vulavuli hi xihloko lexi nga eka “Xihondzo xo Rindza” xa October 15? Xingheniso lexi xi nga vanga n’wangulo lowunene:
◼ “Ndzi ta tsakela ku twa langutelo ra wena exivutisweni lexi nge: Xana swa koteka ku rhandza Xikwembu ni ku xi chava hi nkarhi wun’we?” Yimela nhlamulo, kutani u hlaya ndzimana ya xihloko lexi nge “Ha Yini U Fanele U Chava Xikwembu Xa Ntiyiso Sweswi?” (Ekl. 12:13) Tirhisa xin’wana xa swikombiso leswi nga eka tluka 199 ra buku leyi nge Reasoning, ivi u fambisa xikhokhelo, kumbe timagazini timbirhi hi munyikelo wa R1,60.
5 Loko u tirha hi yindlu na yindlu, u nga honisi mavhengele lamatsongo. Lava va endzelaka mavhengele minkarhi hinkwayo va hlamusela ntirho lowu wu ri lowu tsakisaka ni lowu humelelaka. U nga ringeta xingheniso lexo olova xo fana na lexi, loko u fambisa “Xalamuka!” ya October 8:
◼ “Ha swi tiva leswaku vanhu va mabindzu va swi tsakela ku tshama va ri karhi va tivisiwa timhaka leti khumbaka vanhu va ndhawu ya ka vona. Ndza tshemba leswaku swihloko leswi swi ta ku tsakisa.” Kutani hi ku komisa u hlamusela yinhla leyi humaka exihlokweni lexi nge “Ku Va Mutswari La Nga Un’we La Humelelaka.” Hlamusela malunghiselelo ya xikhokhelo.
6 Hlayisa xiphephana xa yindlu na yindlu lexi tsariweke kahle, naswona u tlhelela hinkwako laha u fambiseke kona. Eriendzweni ra wena ro vuyela, fambisa xikhokhelo xa magazini wun’we kumbe hatimbirhi. A hi lunghekeleni ni ku xalamukela ku fambisa timagazini ta hina, ngopfu-ngopfu swikhokhelo swa tona nkarhi wun’wana ni wun’wana lowu faneleke.