Xalamukela Timagazini Hi October
1 Hi October hi ni nkarhi wo fambisa Xihondzo xo Rindza ni Xalamuka! hi ndlela ya xikhokhelo eka vanhu vo tala hi laha swi nga kotekaka ha kona. Ku xalamukela timagazini swi katsa ku tinyika nkarhi hi ti hlaya hi vukheta ni ku xiya ndlela leyi swihloko swa tona swi nga tsakisaka ha yona vanhu lava nga ensin’wini ya hina.
2 Xo sungula, tolovelana ni swihloko leswi kombisiweke eswifunengetweni swa tona. Kombisa swihloko leswi u vonaka onge swi nga tsakisa vanhu lava nga ensin’wini ya ka n’wina. Xana vanhu vo tala i va vukhongeri byo karhi? Xana hi swihi leswi va khumbekaka ha swona ngopfu? Loko u ri na leswi emianakanyweni, u ta kota ku lunghiselela rungula leri humelelaka. Xiya lama kombisiweke laha hansi.
3 Loko u fambisa “Xihondzo xo Rindza” xa October 1, u nga ha kombisa xihloko lexi nge “Bibele—Ntirho Wa Yona I Yini?” U nga ha ku:
◼ “Bibele u nga yi kuma emitini yo tala laha ndhawini ya ka hina. Vo tala lava nga na yona va yi vona yi khome swin’wana swa nkoka swinene.” Kutani u nga ha vutisa xivutiso lexi kongomeke xo tanihi lexi nge: “Xana u ehleketa leswaku i yini lexi endlaka Bibele yi va yo hlawuleka?” kumbe lexi nge, “Xana u anakanya leswaku i yini lexi nga pfunaka vanhu vo tala leswaku va vuyeriwa hi Bibele?” Endzhaku ka nhlamulo ya n’wini wa muti, u nga ha vula marito lama faneleke, yo tanihi lama nge: “Ku ni vumbhoni lebyi hlamarisaka lebyi kombisaka leswaku Bibele yi huhuteriwe hi Xikwembu naswona yi hi kongomisa hi ndlela yo tshembeka. Yi tamele vutivi lebyi nga hi yisaka evuton’wini lebyi nga heriki. [Hlaya Yohane 17:3.] Xihloko lexi xi nga eka Xihondzo xo Rindza xi hlamusela ndlela leyi wena hi wexe u nga tirhisaka Bibele ha yona leswaku u kuma tinhlamulo ta swivutiso swa wena hi vumundzuku. Ndzi tsakela ku endla malunghiselelo ya leswaku u endla xikhokhelo xa magazini lowu lowunene hi munyikelo wa R30,00 ntsena hi lembe.” Loko n’wini wa muti a ala nyiko ya xikhokhelo, n’wi khutazi ku teka timagazini timbirhi. Nakambe hi ndlela leyi u nga ha sungula ntila wa timagazini wa nkarhi na nkarhi.
4 Loko u tirhisa “Xihondzo xo Rindza” xa October 15, u nga ha tsakela manghenelo yo olova yo fana ni lawa:
◼ “Vanhu vo tala va loveriwe hi varhandziwa va vona. Xihloko lexi xi tlakusa xivutiso lexi nge: ‘Hi Xihi Xiyimo Xa Vafi?’ Xana u ehleketa leswaku ku humelela yini loko munhu a fa? [Yimela nhlamulo.] Loko u lava ku tiva ndlela leyi Bibele yi hlamulaka xivutiso xexo ha yona, ndzi ta tsakela ku ku siyela kopi leyi ya magazini. N’hweti leyi hi fambisela vanhu magazini lowu lowunene hi ndlela ya xikhokhelo hi R30,00 hi lembe.” Vana ni xiphephana lexi nge Hi Wihi Ntshembo Wa Varhandziwa Lava Feke? u tshama u lunghekele ku xi fambisa loko n’wini wa muti a tsakela mhaka leyi komisiweke swinene.
5 “Xalamuka!” ya November 8 yi kambisisa vumbhoni byin’wana lebyi kombisaka ku tsandzeka ka vukhongeri bya mavunwa. Loko u tirhisa swihloko leswi hlamuselaka leswaku vukhongeri byi yima ni tlhelo ro karhi, u nga tlakusa xivutiso lexi nge:
◼ “Loko Yesu a a ri kona laha namuntlha, u ehleketa leswaku a ta titwisa ku yini hi madzolonga lama hi rhendzeleke xana? [Yimela nhlamulo.] Yesu u hi dyondzise ku rhandza vanhu hinkwavo, hambi ku ri valala va hina. Kambe, vukhongeri byo tala lebyi tivulaka Vakreste byi seketela madzolonga ya tipolitiki. U ehleketa leswaku sweswo swi va khumba njhani vanhu lava lavaka ku hanya hi leswi Yesu a swi dyondziseke? [Yimela nhlamulo.] Nkandziyiso lowu wa Xalamuka! wu vulavula hi xivutiso xexo naswona wu hlamusela ndlela leyi Mfumo wa Xikwembu wu nga ta nyikela nhlamulo ha yona.”
6 Endla matshalatshala yo fambisa xikhokhelo emutini wun’wana ni wun’wana, hambi loko u nga swi koti ku vulavula hi Bibele. Laha vanhu va nga swi kotiki ku endla xikhokhelo, va tshembise ku va yisela timagazini nkarhi na nkarhi loko ti kumeka. Hi October hinkwerhu a hi hlanganyeleni hi ku hiseka eku hangalaseni ka timagazini leti letinene ta ntiyiso.