Fambisa Buku Leyi Nge Vantshwa
1 Malembe ya sweswinyana ma tikombe ma ri nkarhi wo nonon’hwa eka vantshwa hinkwavo. Ku ni vatswari ni vantshwa vo tala lava va karhatekaka hi swiphiqo leswi pfilunganyaka vantshwa. Leswaku hi va pfuna, hi March hi ta va hi fambisa buku leyi nge Vantshwa ensin’wini. Swi nga ha endleka ana se u lunghiselele mhaka leyi u lavaka ku vulavula hi yona. Kumbexana u nga ha rhandza ku tirhisa xin’wana xa swingheniso leswi landzelaka:
2 Endzhaku ko xeweta kahle, u nga ha vula swo fana ni leswi:
◼ “Ku kula eminkarhini leyi, leyi nga ni swiphiqo a swi olovi. Vantshwa va langutana ni swiyimo swo tala leswintshwa leswi lavaka leswaku va endla swiboho swa nkoka. ‘Xana ndzi fanele ku nwa byala? Xana ndzi fanele ku tirhisa swidzidzirisi? Xana hi kwihi ku tikhoma lokunene ni munhu wa rimbewu leri hambaneke?’ Loko vantshwa va vutisa mayelana ni timhaka leti ta xisekelo, hakanyingi va kuma tinhlamulo leti hambaneke. Xana u ehleketa leswaku vo tala va vona va ya kwihi leswaku va kuma xitsundzuxo? [Yimela tinhlamuselo.] Buku leyi, leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, yi nyikela mahungu lama pfunaka. [N’wi kombise xikombo xa leswi nga endzeni, lexi kombaka tinhloko-mhaka to hambana-hambana leti nga kona.] Vantshwa va lava tinhlamulo leti kongomeke naswona ta xiviri. Tinhlamulo leti nga le bukwini leyi ti titshege hi leswi Bibele yi swi vulaka. Buku leyi, leyi pfunaka leyi nga ni swifaniso swo saseka yi nga va ya wena hi munyikelo wa R4,50.”
3 Hi lexi xingheniso xin’wana lexi u nga ha xi tirhisaka:
◼ “Namuntlha vantshwa va le hansi ka mintshikilelo yo tala. Va lava ku pfuniwa leswaku va ta langutana na yona hi laha ku humelelaka. Loko hi endla leswi hi nga swi kotaka leswaku hi va pfuna, xana a hi lavi nchumu wo karhi lowu nga hi nyikaka nkongomiso lowu tirhaka? [Yimela nhlamulo.] Ntshikilelo wo tala lowu phikelelaka wu huma eka vantshwa van’wana, ku nga tintangha ta vona. Xiya swifaniso leswi nga eka matluka 76 na 77 ebukwini leyi. [N’wi kombise marito lama tsariweke eka swifaniso leswi ni tindzimana leti tsariweke hi xiitaliki eka tluka 77.] Matluka lama landzelaka endzimaneni leyi ma nyikela tinhlamulo ta xiviri, leti tirhaka. [N’wi nyike buku.] Yi ta va ya wena hi munyikelo wa R4,50.” Loko a nga yi teki nyiko ya buku, u nga ha hlawula ku n’wi komba tinhla leti faneleke eka leti kumekaka exiphephanini lexi nge Xana Misava Leyi Yi Ta Pona?
4 Tiyiseka leswaku u rhamba un’wana ni un’wana la tsakeleke ku va kona eXitsundzuxweni hi March 26. Nakambe va rhambe enkulumeni yo hlawuleka leyi nge “Vukhongeri Bya Ntiyiso Byi Enerisa Swilaveko Swa Vanhu” leyi nga ta nyikeriwa emisaveni hinkwayo hi April 10.
5 Handle ko kanakana leyi i “mikari yo nonoṅhwa,” ngopfu-ngopfu eka vantshwa. (2 Tim. 3:1) Buku leyi nge Vantshwa, hakunene yi nga pfuna muntshwa ku langutana ni mintlhontlho ya namuntlha hi laha ku humelelaka. Tindzima ta 39 ti hlamuseriwe hi ndlela leyi fuweke, naswona swihloko swa kona i swa xiviri, naswona swa tirha. Kutani kun’wana ni kun’wana laha nkarhi wu ku pfulekelaka, vana la xalamukeleke ku tirhisa buku leyi leyinene.