Ku Andza Loku Yaka eMahlweni Ku Engetela Xilaveko Xa Tiholo Ta Mfumo
1 Khale koloko muprofeta wa Yehovha u vhumbe leswaku “leŝi ranḍekaka ŝa matiko hikwawo ŝi ta ta kwala.” (Hag. 2:7) Entiyisweni ha byi vona vumbhoni bya ndlela leyi dyondzo ya Xikwembu yi pfunaka mintshungu ha yona leswaku yi dyondza ntiyiso ni ku va vagandzeri va Yehovha. Mawaku ndlela leyi swi tsakisaka ha yona ku xiya leswaku vanhu vo ringana 3 877 va khuvuriwile hi lembe ra ntirho ra 1993 eAfrika Dzonga ntsena! Leswaku hi kota ku hambeta hi pfuna hinkwavo lavantshwa, hi fanele hi ‘veka timbilu ta hina etindleleni ta hina’ leswaku hi tiyiseka leswaku hi seketela ntirho wa Xikwembu hi ku helela hi laha swi kotekaka ha kona. (Ringanisa Hagayi 1:5.) Ina, xiphemu xa hina xa nkoka xo seketela ntirho wa Xikwembu i xa ku hambeta hi pfuna hi ku lunghiselela mintshungu ya vadzunisi lavantshwa va Yehovha etindlu leti faneleke ta vugandzeri.
2 Hi 1993, Tiholo ta Mfumo letintshwa ta 36 ti nyiketeriwile naswona to tala swinene ta ha akiwa eAfrika Dzonga ni le matikweni ya le kusuhi. Hakunene ntirho wa Yehovha wu tlakusiwa “henhla ka ŝiṭunga.” (Esa. 2:2) Nkwama wa Sosayiti Wa Tiholo Ta Mfumo sweswi wu ni malembe manharhu wu tirha naswona wu endle leswaku mavandlha ya 20 ya swi kota ku kuma Tiholo ta Mfumo letintshwa. Lexi tsakisaka ngopfu, ku ve n’wangulo wa vamakwerhu wo seketela nkwama lowu rhendzelekaka hi timali. Timali leti lombiweke mavandlha ti tlheriseriwa enkwameni lowu ti ri ni ntswalo ku endlela leswaku timali hinkwato leti hlengeletiweke ti hambeta ti tirhisiwa lembe rin’wana ni rin’wana eku akeni ka Tiholo ta Mfumo letintshwa. Hikwalaho, mavandlha lama pfuniweke hi mali leyi lombiweke ya Holo ya Mfumo ya kombisa ku nkhensa ka wona hi ku yi hakela hi ku tshembeka nkarhi na nkarhi eku sunguleni ka n’hweti yin’wana ni yin’wana. Nhluvuko wun’wana lowu khutazaka swinene hi leswaku eka Tiholo ta Mfumo leti nyiketeriweke hi 1993, nhungu wa tona ti hakeleriwe hi mavandlha wolawo hi ku helela. I swa nkoka ku xiya leswaku man’wana ya mavandlha lawa a ma nyukangi hi swilo leswi vonekaka, kambe a ma tiyimisele ku vona vugandzeri bya ntiyiso byi tlakusiwa endhawini ya ka vona.
3 Ku Pfuniwa Hi Tikomiti To Aka Ta Xifundzha: Tikomiti to Aka ta Xifundzha ta 20 leti kumekaka exiphen’wini xa hina xa nsimu ti pfuna vakulu lava katsekaka entirhweni wo aka Tiholo ta Mfumo letintshwa ni mintirho yo pfuxeta. Ti pfuna ku kambisisa xilaveko xa Holo ya Mfumo leyintshwa kumbe ntirho wo pfuxeta naswona ti nyikela mpfuno wun’wana lowu lavekaka ku sukela loko ndhawu yi nga si xaviwa ku fikela loko Holo ya Mfumo yi hetiwa. Vandlha rin’wana ni rin’wana ri averiwa eka yin’wana ya tikomiti leti.
4 Magidi ya vatirhi va ku tirhandzela ma tinyiketerile ku va ni xiphemu entirhweni lowu wo kwetsima. Vatirhi lava vo tirhandzela, ku katsa vatshila ni van’wamabindzu vo tala va nyikela hi nkarhi ni matshalatshala ya vona mahala etimhakeni to fana ni ta ku xava nhundzu, ku tata maphepha ya nawu, ku pfapfarhuta muako ni ku tsala nxaxamelo wa swilo leswi faneleke ku xaviwa. Va tlhela va pfuna ku xava swilo leswi tiyeke hi nxavo wa le hansi, va heta ntirho wo lulamisa xitandi ni ku langutela muako hi woxe. Ku hanana ka vona hi nhundzu ya vona etimhakeni ta Mfumo swi bumabumeriwa ngopfu naswona swi tisa mikateko leyi fuweke leyi humaka eka Yehovha.—Swiv. 11:25.
5 Vakulu va fanele va tihlanganisa ni Komiti yo Aka ya Xifundzha endhawini ya ka vona loko va ehleketa ku pfuxeta Holo ya Mfumo leyi nga kona kumbe ku aka leyintshwa. Ha yini? Tikomiti ta xifundzha ti ni switsundzuxo leswi nga pfunaka mavandlha enkambisisweni wa wona wo sungula. Ku hlawula xitandi swi katsa swilo swo tala leswi hlanganisaka ku xava ndhawu. Swilo swin’wana swi nga ha tlakusa nxavo lowu tolovelekeke wa xitandi, swo tanihi ntirho lowukulu wo basisa xitandi xexo, ku susa swilo leswi nga ni chefu kumbe swikavanyeti swa le nawini. Loko vandlha ri lava mpfuno wa timali eka Sosayiti, mulanguteri wa xifundzha kumbe komiti ya rhavi yi ni tikopi ta fomo leyi nge Kingdom Hall Loan Survey naswona yi nga pfuna vakulu va vandlha ku yi tata. Nakambe, valanguteri va swifundzha va nga kombisa ka ha ri emahlweni ni ku xalamukisa vakulu va le tindhawini ta le madorobeni lama ha hluvukaka loko ko tshika ku ve ni xilaveko xa ndhawu ya Holo ya Mfumo.
6 Sosayiti yi nyike Tikomiti to Aka ta Swifundzha mimpfampfarhuto leyi ringanyetiweke ya xisekelo ya Tiholo ta Mfumo. Loko va nga si hlawula mpfampfarhuto, vakulu va vandlha va fanele va tihlanganisa ni komiti ya xifundzha ivi va kanela hi muako hinkwawo, va tirhisa mimpfampfarhuto leyi nyikeriweke hi Sosayiti tanihi nkongomiso. Leswi a swi nge hunguti minxavo leyi engetelekeke ntsena, kambe swi ta tlhela swi pfuna vandlha ku hlawula muako wo olova kambe wa kahle, naswona lowu nga ta fanela hi maakelo ya xihatla, laha se ya simekiweke.
7 Ku fanele ku hlayisiwa tirhekhodo leti nga ni vuxokoxoko ni ta mali hinkwayo. Vamakwerhu lava nga ni vutivi va tinyiketele ku tirha ni tikomiti ta swifundzha leswaku va pfuna mavandlha eku lunghiseleleni ka ndlela leyi lavekaka yo hlaya timali ni ku yi hlayisa emuakweni hinkwawo. Vamakwerhu van’wana lava tirhisanaka ni Tikomiti to Aka ta Xifundzha va pfuna mavandlha ku tata tifomo to kambisisa mali yo lomba ni swikombelo. Leswi swi pfuna ngopfu, tanihi leswi vakulu va vandlha hi ntolovelo va nga tirhiki hi tirhekhodo ta timali ta Holo ya Mfumo nkarhi na nkarhi ku fana ni vamakwerhu lava lava nga ni ntokoto naswona lava leteriweke kahle. Eku heleni ka muako wun’wana ni wun’wana, komiti ya xifundzha yi fanele yi kuma kopi leyi heleleke ya tirhekhodo ta timali ta muako wolowo. Komiti yo Aka ya Xifundzha na yona yi ta tiyiseka leswaku Sosayiti yi kuma kopi ya swixavaxavana swo hambana-hambana swa ntirho wun’wana ni wun’wana. Kambe loko swi ta emhakeni ya ku hlayisa loku tolovelekeke, ku lunghisa ni mali leyi fambisanaka ni Holo ya Mfumo leyi ana se yi akiweke, vandlha rin’wana ni rin’wana ri ta khathalela sweswo hi roxe. Loko yi hlayisiwa hi laha ku hambetaka n’hweti na n’hweti, swi sivela xilaveko xa mali yo tala yo yi pfuxeta endzhaku ka malembe ma nga ri mangani. Huvo ya vakulu yi fanele yi yi vekela etlhelo mali ya leswi nkarhi na nkarhi. Malunghiselelo yo tano ma vevukisa mpingu wa Komiti yo Aka ya Xifundzha, leswi endlaka leswaku va swi kota ku khathalela ku pfuxetiwa lokukulu ni miako leyintshwa.
8 Vahlaleri Va Tsaka: Ku tirha ka moya wo kwetsima wa Yehovha loku vonakaka eka vamakwerhu lava tirhaka emintirhweni ya ku aka Holo ya Mfumo ku tirha tanihi vumbhoni eka van’wana. Munhu un’wana wa misava u tsakisiwe hi ku akiwa ka xihatla ka Holo ya Mfumo eVosloorus, lerova a bela xitichi ya xiya-ni-moya xa kwalaho leswaku a bumabumela leswi endliweke hi Timbhoni ta Yehovha, ku nga khathariseki madzolonga lama a ma ri kona endhawini yoleyo. Eka xiendlakalo xin’wana, huvo ya vakulu va le n’walungwini wa Transvaal yi tsarile: “Ku akiwa ka holo leyi ku hlamarise vahlaleri. Mabazi, mathekisi ni timovha a swi yima ku tiyiseka leswaku leswi vakhandziyi va swi vonaka a ku ri swa xiviri. N’wamabindzu un’wana u te: ‘Vavanuna, sweswi mi kombisa rirhandzu ni vun’we lebyi ndzi hlayeke ha byona eBibeleni. Hakunene hi n’wina ntsena ntlawa lowu kombisaka Vukreste bya ntiyiso.’ . . . Hosi ya muti wolowo yi te: ‘Ndzi tsakisiwa hi moya lowu ntirho lowu wu endliweke hi wona. . . . Entiyisweni, loko van’watipolitiki a va tirha ku fana na n’wina, ku dlayana loku hi ku vonaka namuntlha a ku ta va ku nga ri kona. Kutani, ndzi rhandza ku tiyisekisa leswaku vukhongeri bya n’wina byi pfumeleriwa ku va kona ni ku khoma minhlangano hi nkarhi wun’wana ni wun’wana lowu mi fanelaka. Ku hava swipimelo nikatsongo.’”
9 “‘A swi khorwisi!’ a ku ri marito ya munhu un’wana la voneke vatirhi vo tirhandzela lava tlulaka 300 va tinxaka to hambana va hlanganyela entirhweni wo aka lowu xiyekaka eMhluzi,” ku vike phepha-hungu ra kwalaho. Komiti ya Ntirho ya Vandlha ya xifundzha xin’wana yi tsale leswi landzelaka: “Vanhu va kwalaho a va hlamale ngopfu loko va vona Holo ya Mfumo yi akiwile hi masiku mambirhi, va tile ku ta yi khumba hi voxe ku vona loko ku ri switina swa xiviri leswi a hi swi tirhisa. . . . Vanhu van’wana va tile va ta kombela dyondzo ya Bibele hikwalaho ka leswi a va swi vona.”
10 Loko madzana ya vatirhi vo tirhandzela ma fika endhawini yo aka ya le n’walungu wa Pitori ku ta pfuna eku akiweni ka Holo ya Mfumo, mavandlha ya vantima ya kwalaho ya va amukerile emakaya ya vona. Vaakelani a va hlamale ngopfu loko va vona mixaxa yi simekiwa emahosi, ni tikharavhani ti nghena emakaya ya vona. Va tlhele va hlamala ngopfu loko va vona leswaku vaendzi vo tala a ku ri valungu!
11 Ku Laveka Vatirhi Vo Tirhandzela Lava Engetelekeke: Komiti ya xifundzha yi lava ku tirhisa vanhu lava va nga ni vuswikoti emavandlheni lava nga ta tirha eku pfuxetiweni kumbe eku akiweni ka Tiholo ta Mfumo letintshwa. Va tlhela va tirha ni vamakwerhu va kwalaho, ngopfu-ngopfu vakulu ni malandza ya vutirheli, leswaku va va dyondzisa ku endla ntirho lowu. Hi ku va va kume vutshila lebyi lavekaka lebyi nga ta va mpfuno eku akiweni ka Holo ya Mfumo, vamakwerhu lava va moya lava vupfeke endzhaku va nga ha pfuna emiakweni yin’wana ya Tiholo ta Mfumo leti faneleke ti akiwa eka xifundzha xexo. Xisweswo, lava va hlanganyelaka ni mavandlha lama khumbekaka entirhweni wa ku aka Holo ya Mfumo va fanele va kombisa moya wa ku tinyiketela ni ntirhisano, va nga rindzeli leswaku komiti ya xifundzha ni lava va tirhaka na yona va ta khathalela mintirho hinkwayo ya Holo ya vona ya Mfumo. (Neh. 4:6b) Endzhaku ko leteriwa, vamakwerhu va fanele va susumetiwa hi moya wa rirhandzu ku pfuna eku akeni ka Tiholo ta Mfumo eka mavandlha man’wana lawa na wona ma nga ni xilaveko xa xihatla xa miako leyintshwa kumbe leyi antswisiweke.—Neh. 5:19; Flp. 2:3, 4.
12 Vahuweleri lava khuvuriweke lava nga ni vutshila lebyi fanelaka naswona lava nga ni xiyimo lexinene ni vandlha va khutaziwa ku tinyiketela ku pfuna entirhweni lowu lowukulu. Hinkwavo lava nga ni vutshila byo aka ni lava nga riki na byona va laveka. Vatinyiketeri va nga ha kuma tifomo leti lavekaka eka mulanguteri la ungamelaka kumbe eka matsalana evandlheni ra ka vona ivi va kombisa vutshila bya vona bya ntirho wa mavoko kumbe yin’wana yo tanihi ku lunghiselela swakudya, vuhlayiseki, ku tamela nhundzu, vukonta ni ku tsalatsala maphepha ya nawu. (Loko vandlha ri lava tifomo leti engetelekeke ta vutinyiketeri sweswi ti nga ha komberiwa swin’we ni tiodara ta tibuku loko ti rhumeriwa eka Sosayiti.) Ku angula hi ndlela leyi i vumbhoni bya rirhandzu ra hina eka vaakelani lava nga ekusuhi—vamakwerhu va Vukreste.—Mt. 7:12; 22:39; Yoh. 13:35.
13 Mpfuno Wa Ku Tinyiketela Wa Tlangeriwa: I vatsongo lava xiyaka vukula bya ntirho wa ku heta muako, ku kondza loko va hlanganyerile entirhweni wolowo wa Holo ya Mfumo. Endzhaku ka loko ntirho wun’wana wo aka Holo ya Mfumo wu herile, vakulu va tsarile: “Nkongomiso wa ku leha mbilu wa vamakwerhu va Komiti yo Aka ya Xifundzha a ku ri mpfuno lowukulu eka hina. . . . Hi nkarhi hinkwawo wa ntirho, a ku ri ni swiendlakalo swa ntsandza-vahlayi, loko vamakwerhu va famba ku suka etindhawini ta le kule, va heta tiawara to tala, va nyikela hi swingolongondzwana ni switirho swa vona leswaku swi tirhisiwa, naswona va tlhela va nyikela hi swilo, hinkwaswo leswi a ku ri ku hi pfuna eku akeni ka Holo ya hina ya Mfumo leyintshwa. Ku hanana ka vamakwerhu lava i xikombiso lexikulu xa leswaku ‘va ni rirhandzu eka nhlengeletano ya vamakwerhu,’ naswona xiya xikhutazo xonghasi eka hina hinkwerhu!—1 Pet. 2:17.”
14 Moya wa ku tinyiketela ni ku hiseka ka vamakwerhu wu le rivaleni hi laha vandlha rin’wana ri tsaleke ha kona ri ku: “Ha mi nkhensa hi vamakwerhu va xinuna ni va xisati lava tirheke hi matimba lerova swi hlamarisa un’wana ni un’wana la hlaleleke.” Hakunene i ya ntiyiso marito ya Pisalema 133:1, 3 lama nge: “Langutani! a hi ku ṭakisa ka ŝona, ni ku nanḍiha, loko mašaka ma hanya ŝin’we, ma twanana.” Vatirhi van’wana vo aka Holo ya Mfumo va teka siku ro wisa entirhweni ku endlela ku pfuna emuakweni wa Holo ya Mfumo wa vandlha ra le kusuhi. Hi laha ku fanaka, swirho swa vandlha leri pfuniwaka swi komba ku tlangela ka rirhandzu hi ku seketela ntirho hi ku helela. Nkulu la tirhaka ni komiti ya xifundzha u tsarile a kombisa lunghelo leri a ku ri rona ku tirhela vamakwavo. U vule leswaku “mavandlha ma khutazeka swinene hi vamakwavo lava fambaka madzana ya tikhilomitara ku ta va pfuna ku hetisisisa ku tinyiketela ka vona eka Yehovha. . . . Hakunene, hi vumba vumakwerhu bya rirhandzu!” Makwerhu wa xisati u hlamusele matitwelo yakwe hi ndlela leyi: “A ndzi nge tshiki ku kombisa ku nkhensa ka mina hi ntsako lowu ndzi veke na wona endhawini yo aka Holo ya Mfumo eSpruitview. Sweswi leyi i holo ya vunharhu leyi ndzi hlanganyeleke eku yi akeni.
15 Vandlha rin’wana ri vule leswi epapileni leri ri ri kongomiseke eka Komiti yo Aka ya Xifundzha ya rona endzhaku ko heta ntirho wa rona: “Hi tsalela ku mi nkhensa swinene! Mi hundziwe hi minhlangano ya vandlha ra n’wina, ku etlela, ntsako wa ku va ni mindyangu ya n’wina, ku titsakisa, vutirheli bya n’wina bya nsimu ni swin’wana swo tala ngopfu, leswaku mi ta mi ta hi akela holo. Handle ko tipfinyinga a hi faneriwi hi leswi mi hi endleleke swona. Ha tinyungubyisa ni ku va ni xindzhuti hi ku hlangana ni vavanuna lavanene ni lava tinyiketeleke vo fana na n’wina vamakwerhu. Hi rhandza ku tlhela hi nkhensa mindyangu ya n’wina leyi handle ka swipimelo yi tirheke na n’wina yi tsakile, emoyeni lowukulu, emun’wini ni le xirhamini. Nakambe, ha mi nkhensa swinene. ‘Onge Yehovha a nga mi tsundzuka hi leswinene.’—Nehemiya 13:31.”
16 Vuhlayiseki Bya Holo Ya Mfumo: “Ku ve ni ku engeteleka ka vugevenga loku yaka emahlweni eTiholweni ta Mfumo. Eka swiendlakalo swo tala ku yiviwe swingolongondzwana swa mpfumawulo. Swiringanyeto leswi landzelaka swi nga pfuna eku hunguteni ka xiphiqo lexi: (1) Nghenisani swingolongondzwana leswi durhaka swa mpfumawulo eka xisefo xa nsimbi (xa xavisiwa) naswona mi tiyiseka leswaku ku tirhisiwa mpfungurha lowunene ku sirhelela leswi nga endzeni; (2) vekani xisefo endhawini leyi tumbeleke naswona mi xi kurufela ehansi kumbe ekhumbini; (3) tsalani vito ra vandlha ra n’wina eka swingolongondzwana swa n’wina hinkwaswo, leswi nga ta endla leswaku maphorisa ma swi kota ku yi vona ni ku tlherisela swilo leswi yiviweke.
17 Nyangwa ya tinsimbi ni tiheke to leha swi tirha tanihi xisirhelelo eka makhamba. Eka swiyimo swin’wana, muako wu fanele wu biyeriwa hi darada. Makhumbi a ma bumabumeriwi tanihi leswi ma sirhaka makhamba leswaku ma nga vonaki eka vaakelani. Loko xiphiqo lexi xi ya emahlweni, ku nga ha nghenisiwa rivoni leri tivoningelaka hi roxe ematlhelweni hinkwawo ya muako, naswona ku nga ha laveka leswaku ku nghenisiwa alamu. Vakulu va khutaziwa ku teka goza leri faneleke emhakeni leyi tanihi leswi ku khumbekaka timali leti nyikeriweke.
18 Eswiphen’wini swo tala swa tiko, mavandlha ma engetele yindlu eHolweni ya Mfumo hi xikongomelo xa vuhlayiseki, eswiyin’weni swo tano hi khutaza vandlha leswaku ri nghenisa riqingho ni leswaku ri tsarisiwa hi vito ra yena. Xisweswo murindzi u ta swi kota ku kombela mpfuno loko ku tshuka ku va ni xiendlakalo xa xihatla. Murindzi u fanele a hakela riqingho leri a ri tirhiseleke swilo swa munhu hi xiyexe. Ku tlula kwalaho, huvo ya vakulu yi fanele yi tsala ntwanano ni murindzi lowu kombisaka rhente, nkarhi lowu a nga ta tshama wona, mintirho yakwe ni xitiviso xa ku suka kwalaho.
19 Minyikelo Ya Timali Yi Hambeta Yi Pfuna: Minyikelo ya malwandla leyi rhumeriwaka eNkwameni wa Sosayiti wa Tiholo ta Mfumo yi pfune mavandlha enkarhini lowu hundzeke naswona yi ta hambeta yi wa pfuna ni le nkarhini lowu taka. Xana Yehovha Xikwembu a hi yena murhangeri wa ku nyika ka ku pfumala vutianakanyi? (Yak. 1:17) Hambi ku ri ntiyiso leswaku vuswikoti bya hina ni nkarhi wa ku nyikela swa hambana, hi nga ha kuma leswaku hi ku endla mindzulamiso ya ndlela leyi hi tirhisaka mali ha yona, hi nga va ni xiphemu lexi heleleke xo seketela ntirho wo aka. Ku nyika ko tano ka malwandla ku tsakisa mbilu ya Yehovha, kun’we ni ku va xikhutazo lexikulu eka vamakwerhu.
20 Ku ni xilaveko xo hlawuleka xa Tiholo ta Mfumo eswidorobanini ni le tindhawini ta le makaya ta nsimu ya hina. Onge hi nga khutaza mavandlha lawa ku tirha hi ku hiseka eka pakani leyi hi 1994. Mi nga hlweli ku kuma ndhawu leyinene yo hlangana, hikwalaho ka xilaveko xa xihatla xa le minkarhini ya hina. Vakulu va khutaziwa ku pfula akhawunti ya vona ya Nkwama wa Holo ya Mfumo handle ko hlwela. Loko vandlha ri nga ta swi kota ku hakela mali leyi lombiweke ya Sosayiti, va fanele va lwela ku aka handle ka xikweleti.
21 Hi laha ku engetelekeke, “v̌unyingi le’byikulu” byi amukela rungula ra Mfumo namuntlha. “Le’ŝi ranḍekaka ŝa matiko” swi tlhandlukela etempeleni ya moya ya Yehovha, naswona u ‘tata yindlu yakwe hi ku kwetsima.’ (Nhlav. 7:9; Hag. 2:7) Ku fana ni Vayuda lava tshembekaka va le nkarhini wa Hagayi, onge hi nga veka timbilu ta hina entirhweni wa Xikwembu, hi seketela xilaveko xa xihatla xa Tiholo ta Mfumo leti engetelekeke. Hambi leswi Tiholo ta Mfumo letinene to tala ti akiweke emalembeni ya sweswinyana, ku andza ku ya emahlweni hi mpimo lowukulu naswona handle ka sweswo, mavandlha yo tala ma ha hlangana eka swiyimo leswi nga riki swinene. Ku hambeta ka hina hi seketela Nkwama Wa Sosayiti Wa Tiholo ta Mfumo i ndlela leyinene ngopfu yo hlanganyela entirhweni wa Xikwembu.
Tiholo Ta Mfumo Leti Nyiketeriweke
Malembe
Padfield Park, Pinetown
Spruitview, Johannesburg
Vosloorus, Johannesburg
Bushbuckridge, Eastern Transvaal